Na Fuut meafu so Pakandama i Jesus
20
Namitta aw, sikwana a manunturu i Jesus so tolayera so lawan na Templu anna mangipakaammu baggina si Mapiya a Baga, inumaranni sikwaneno afu-afu a pariyera, ino mapoporay si katunungan anneno manannakam na Hudyuwera. 2 Kunda sikwana, “Itundum antu sikwami, sintaw naggabwatanna yo pakandamam a akwan iyawera a kiya-kiyan? Yanya yo nangadda sikwam sitaw a pakandama?”3 Kunna i Jesus sikwara, “Ana pay fuutangku sikwayu e itunduyu sikwak, 4 nu sintaw a naggabwatan ino pakandama i Juan a mabbawtismu? Sike Dios kad onnu so tolayera?”
5 Antu nattataretabbag ira e kunda, “Nu kuntam a naggabwat sike Dios, kunnana sikwatam, ‘Saay se amme kayu nangurug sikwana?’ 6 Udde nu kuntam, ‘Naggabwat so tolayera,’ lappagganda etam ino tolayera gumafu se mangurug ira amminan a profeta i Juan.”
7 Antu tinabbagga i Jesus, “Ammemi ammu nu sintaw a naggabwatanna.”
8 Kunna pay i Jesus sikwara, “Ammek pay antu itundu sikwayu nu yanya yo nangadda si pakandamak a mangwa sitawera a kiya-kiyan.”
Na Pangarig na Maral a Katalak ira na Kaubasan
9 Nangarig imman i Jesus so tolayera a nakkun, “Ana tata tolay a nammula si oddu a ubas so umana. Pinaabangnga iyaw so katalak ira na kaubasan anna inang baggina so korwan a talubbunan e nabayag a nagyan sinay. 10 Sin dinumatang ino tiyempu na pabbuwat si ubas, dinundun ino makan-akwa so kaubasan ino tata a imbutna a umang so katalak ira na kaubasan takesi appanneno ballena. Udde sinuntukdeno imbut anna pinaulira a kama-kamat. 11 Nangidundun imman ino makan-akwa so kaubasan si tata imbut udde kakunna keppay yo inangwara, sinuntukda, neyatatalda anna pinaulira a kama-kamat. 12 Nangidundun kepay baggina si meka-tallu a imbutna udde pinalowanda anna finuwersara a pinalawan baggina so kaubasan.
13 “Antu kunneno makan-akwa so kaubasan, ‘Nenay nakuyeno mapiya a akwangku? Dundunangkuneno iddu-iddukangku a anak. Tantaro ilawara baggina si mapiya.’ 14 Udde sin naitareno katalak ira na kaubasan ino anak na makan-akwa so ubasan, nattataretabbag ira e kunda, ‘Antuweyaw yo marensiya so kaubasan! Patayantam baggina takesi akwatamun ino erensiyanna.’ 15 Antu finuwersara baggina a pinalawan so kaubasan e pinatera.”
Kunna i Jesus sikwara, “Nenay nakuy akwan ino makan-akwa so katalak ira na kaubasan? 16 Umangnga baggina sinay e patayannera anna ipabalatnana si korwan ino kaubasanna.”
Sin nadingngag iyaweno tolayera sinay e kunda, “Ammena nad a iyannut i Dios a medemmu iyaw!”
17 Udde minunnakkannengke i Jesus ino tolayera e kunna, “Nu kunna sitan, nenay yo kanggamma sapitan iyaw a nakaturak a sapit i Dios?
‘Na batu a inammayan ino gumappataddag ira si balay
antu yo nattabali si gakkurug a fundasyon na balay.’a
18 Seanya yo madannag sitaw a batu e magure-guremaknga anneno madannaganna e maburi-burifugnga a manilla girafuk.”
19 Ammuweno mapoporay si katunungan anneno afu-afu a pariyera a nangarig i Jesus metulyat sikwara. Antu gafuna, pinurebanda a gafutan baggina sitan keppay a orat udde mattalawera so tolayera.
Na Fuut so Pappaga si Biyenes
20 Antu nindag ino mapoporay si katunungan anneno afu-afu a pariyera si makasta a tiyempu. Nanundun ira si korwan a tolayera a massalasasan a mapiya yo gakkadda a umang sike Jesus. Inangwara iyaw takesi gafutanda i Jesus so sapi-sapitannera tapenu ana pangakiran a medawawara baggina so Gubernador na Roma a ana nammuna a maggafut sikwana. 21 Kunda sike Jesus, “Mestru, ammumi a gakkurug yo sapi-sapitan anna ituntu-tunturuyu. Ammeka mappeduma si tolayera nu bakkan ituntu-tunturum ino gakkurug a uray i Dios so tolayera. 22 Itundum sikwami nu meyannut kad si katunungantam a mappaga si biyenes so Emperador na Roma onnu ammena?”
23 Udde ammuna i Jesus ino maral a nono-nonotanda antu kunna sikwara, 24 “Ipaitayu sikwak ino tata dinaryu. Makan-mutung anna makan-ngan ino ana sitaw?”
Kunda sike Jesus, “Na Emperador na Roma.”
25 Kunna pay i Jesus sikwara, “Nu kunna sitan, iyaddayu sike Emperador ino para si Emperador, anna sike Dios ino para si Dios.”
26 Gumafu se ammera magafut baggina so pabi-abidna so allangan na tolayera, ammera nakamimmit gumafu se nalaggat ira so netabbagnga.
Na Fuut meafu so Panantotolay
27 Inumaranniyeno korwan a Saduseowera sike Jesus. Ammera mangurug a yo natayera e mantotolena. 28 Kunda sikwana, “Mestru, neturak i Moises para sikwatam a nu matay yo lalaki a awan anaknga, atawan na wayina a lalaki yo baluna takesi manakngera a mebilang a anak ira yo natay a wayina a lalaki. 29 Namitta, ana pitu lalaki a mawwawayi. Nangataweno palungu udde natay a awan anaknga. 30 Inataweno meka-adwa a lalaki yo balu a bafay udde natay pay a awan anaknga. 31 Kunnapay yo nedemmu so meka-tallu makiyad so meka-pitu a wayira e natayera amminan a awan anakda. 32 Si kauddiyanna, natay pay yo bafay. 33 Sitoye, so panantotolay na natayera, yanya so pitu lalaki a mawwawayi yo makan-atawa so bafay se inatawara amminan baggina?”
34 Kunna i Jesus sikwara, “Mangataweno lallakiyera anneno bafabbayera sito lubag. 35 Udde yo tolayera a nebilang i Dios a mepangngat a matolay si langit kapiyera mantotolay e ammeranna a mangatawa. 36 Ammeranna pay a matay gumafu se mekunnerana so anghel ira. Anak ira i Dios gumafu se nebilang ira so nantotolayera. 37 Maski i Moises e taddagganna a mantotoleneno natayera. Neturakngeno kunna i Dios megafu so gumalla-gallayaf a kayub, inayanna i Afu a ‘Dios i Abraham, Dios i Isaac anna Dios i Jacob.’ 38 Antu i Dios e bakkan a Dios na natayera nu bakkan Dios na aggatolayera, se para sikwana natolayera amminan.”
39 Kundeno korwan a mapoporay si katunungan, “Mestru, makasteno netabbagngu!” 40 Anna mamefu sinoy, awanin a matuyag a nakamma a maffuut sikwana.
Na Fuut Meafu sike Mesiya
41 Finuutna i Jesus sikwara, “Kasanna a sapitan ino tolayera a gaka i David ino Mesiya? 42 Maski i David, kunna so libru na Salmo ira:
‘Kunna i Afu Dios sike Afuk,
“Mattuttudka sito diwanangku,
43 makiyad si maaffutkuweno kapakwam ira anna iyekwak ira so pattangngalannu.” ’
44 Nu ayanna i David i Mesiya a Afuna, kasanna antu a gaka i David i Mesiya?”
Inarariyanna i Jesus ino Mapoporay si Katunungan
45 Sikwara a maningnga-ningngag ino tolayera, kunna i Jesus so disipulunera, 46 “Maumid a mimud kayu so mapoporay si katunungan se kalakanggammanda a mallakad a nakabarasi si asoddag anna mapadayawan so allangan na tolayera so plasa. Pili-pilinda kepay a mattuttud so pattutturan ira na kaawan a tolayera so sinagogera anna so nakaparan a funsyon ira para so kaawan a tolayera. 47 Illo-illokun anna koko-kokotandeno pakkukwera na baluwera anna massalasasan ira a pabayaggan ino dasalda takesi kaangga-anggam ira so aggiteno tolayera. Gumafu sitan, arasawandaneno madammat a akkastigu.”