Na Pangarig meafu so Dokal a Paboda
22
Nangarig imman i Jesus so tolayera e kunna, 2 “Na pattangngalan i Dios e neyarig sitaw. Ana tata patul a nangiparan si paboda na anaknga a lalaki. 3 Dinundunneno imbutnera takesi maayan inoyera a naimbitan so paboda udde nammayera.4 “Nangidundun imman baggina si korwan a imbut ira a nakkun, ‘Itunduyu so naimbitan ira a neparangkun ino paboda, napartiyen ino bulug a bakak anneno napatafa a ubbun a bakak ira anna nakaparanin amminan. Itunduyu sikwara a umang ira so paboda.’ 5 Udde inoyera a naimbitan e ammera nekabeng anna nanawera, inang ino tata so umana, tinabbud pay yo tata yo negosyona. 6 Na korwan ira e finuwersara a inappeno imbutnera, minaltraturera anna pinaterera.
7 “Antu nakaallang ingkeno patul so inangwara. Dinundunneno sundalunera a patayan inoyera a namapatay so imbut ira anna tinaggabdeno lugarda. 8 E sinapitneno patul so imbutnera, ‘Nakaparanin ino paboda, udde ammena mepangngat ino inayangkuwera. 9 Umang kayu antu so dala-dalan so kaodduwan ino tolayera e imbitan diyaweno amminan a maitayu sinay.’ 10 Inang ino imbut ira so dala-dalan e inimbitanda amminan a tolayera a naitara, mapiya anna maral ira. Antu napannuweno pabbodan si tolayera.
11 “Udde sin tinumallung ino patul tapenu itanneno bisitera, naitaneno tolay a nabbarasi si ammena meantu si paboda. 12 Kunna sikwana, ‘Wayi, kasannaka nakatallung sitaw e ammeka nakabarasi si meantu si paboda?’ Ammena nakamimmit ino lalaki. 13 E kunneno patul so gumasserbinera, ‘Siguttan diyaweno kamatna anna takkina e itappol diyaw baggina so lawan nu sintaw a malammuk, mattangi-tangit anna mangngari-ngaritam irana sinay.’
14 “Se oddu yo naayan i Dios, udde bisangke yo pinilina a mesapat so pattangngalanna.”
Na Fuut so Pappaga si Biyenes
15 Nanaweno Fariseowera e nattataretabbag ira nu kasannara a magafut i Jesus so sapi-sapitannera. 16 E dinundunda sike Jesus ino disipulurera anneno korwan a gumaladandan ira i Herodes a umang sikwana e kunda, “Mestru, ammumi a matalakka anna ituntu-tunturum ino gakkurug a uray i Dios so tolayera. Ammeka mappeduma si tolayera se parefu yo aggitam sikwara. 17 Itundum antu sikwami nu nenay yo ana so nakammu. Meyannut kad si katunungantam a mappaga kami si biyenes so Emperador na Roma onnu ammena?”
18 Udde ammuna i Jesus ino maral a gakkatda sikwana e kunna, “Mappesimpat kayu! Saay se kanggammandak a pureban? 19 Ipaitayu sikwak ino tata dinaryu a pabbiyenes diyaw!” E neyaddareno dinaryu sikwana. 20 Antu kunna i Jesus sikwara, “Makan-mutung anna makan-ngan ino ana sitaw?”
21 Kunda sike Jesus, “Na Emperador na Roma.”
Antu kunna sikwara, “Nu kunna sitan, iyaddayu sike Emperador ino para si Emperador anna sike Dios ino para si Dios.”
22 Nalaggat ira sin nadingngagga iyaw anna inanawanda i Jesus.
Na Fuut meafu so Panantotolay
23 Sitan keppay a aw, inang sikwaneno korwan a Saduseowera a nakkun a yo natayera e ammenana a mantotolay. 24 Kunda, “Mestru, kunna i Moises a nu matay yo lalaki a awan anaknga, atawan na wayina a lalaki yo baluna takesi manakngera a mebilang a anak ira yo natay a wayina a lalaki. 25 Ana pitu lalaki a mawwawayi a nagyan sitaw a lugar sinoy. Nangataweno palungu udde natay a awan anaknga antu inataweno meka-adwa a wayina a lalaki yo balu. 26 Udde iyan keppay yo nedemmu so meka-adwa, meka-tallu makiyad so meka-pitu a wayi. 27 Akkabalinna, natay pay yo bafay. 28 Kunnantu, so aw na panantotolayeno natayera, yanya so pitu lalaki a mawwawayi yo makan-atawana so bafay se inatawara amminan baggina?”
29 E tinabbagngera i Jesus, “Amme kayu fustu, gumafu se ammeyu ammuweno neturak a sapit i Dios e ammeyu pay ammuweno pakapangwana. 30 Se so aw a mantotolena yo natayera, ammeranna a mataweno tolayera e mekunnerana so anghel ira si langit. 31 Patamu so panantotolayeno natayera, ammeyu kad kepay nabibbid ino sinapit i Dios sikwayu? 32 Kunna, ‘Ikkanak ino Dios i Abraham, ino Dios i Isaac anneno Dios i Jacob.’a Kunna iyaw a maski nabayagin a natay i Abraham, kanggamma sapitan, bakkan baggineno Dios na natayera nu bakkan Dios na aggatolayera.”
33 Nalaggat amminan ino tolayera so nadingngagga a netunturuna.
Na Kaawan Ingke a Dundun
34 Sin nadingngag ino Fariseowera a napasinaknga i Jesus ino Saduseowera, nammu-ammung ira amminan. 35 Anna tata sikwara a maporay si katunungan i Moises ino naffuut sike Jesus tapenu purebanna baggina. 36 “Mestru, ansa so dundun ino mas kaawan ingke si amminan?”
37 E kunna i Jesus sikwana, “‘Iddukannu i Afu a Diosnu si amminan a nakammu, anna si amminan a karalwam anna si amminan a porem.’b 38 Antuweyaw yo kaawan ingke a dundun si amminan. 39 Na meka-adwa a dundun kakunna iyan so palungu a dundun, ‘Iddukannuweno kasittolem kakunna yo piddukngu si baggim ingkepay.’ 40 Iyawera adwa a dundun i Afutam a Dios antu yo paffungallan ino amminan a tunturu i Moises anneno tunturu na profetera.”
Na Fuut meafu sike Mesiya
41 Sin nammu-ammung ino Fariseowera, finuutna i Jesus sikwara. 42 “Nenay yo mekun diyaw meafu sike Mesiya? Makan-anak sikwana?”
Kunda, “Gaka i David.”
43 Kunna i Jesus sikwara, “Kasanna antu a yo Espiritu i Dios netunduna sike David a ayanna i Mesiya si ‘Afu?’ Kunna i David,
44 ‘Kunna i Afu Dios sike Afuk,
“Mattuttudka sito diwanangku
makiyad si maaffutkuweno kapakwam ira anna iyekwak ira so pattangngalannu.” ’
45 Nu ayanna i David i Mesiya a Afuna, kasanna antu a gaka i David i Mesiya?”
46 Awan nakatabbag maski tata sikwara anna mamefu sinoy, awanin a matuyag a nakamma a maffuut sikwana.