Na Pangarig na Maral a Katalak ira na Kaubasan
12
Nangarig imman i Jesus so tolayera a nakkun, “Ana tata tolay a nammula si oddu a ubas so umana. Nilasanganna si batuweno pallebutanna. Anna nabbut baggina si pangipappattanda si ubas ira tapenu maappeno danumma anna namataddag baggina si atannang a passiyongan a batu para so gumabbantay so uma. Akkabalinna, pinaabangnga iyaw so katalak ira na kaubasan anna inang baggina so korwan a talubbunan. 2 Sin dinumatang ino tiyempu na pabbuwat si ubas, dinundun ino makan-lubag ino imbutnera so katalak ira tapenu appan ino ballena. 3 Udde ginafutda, sinuntukda, anna pinaulira a kama-kamat. 4 Nangidundun imman ino makan-akwa so kaubasan si korwan a imbut sikwara. Udde sinuntukdeno uluna anna ininsultura baggina. 5 Antu nangidundun imman baggina si korwan a imbut udde pinatera baggina. Anna parefu yo inangwara so korwan ira a nedundun, sinuntukdeno korwan ira anna pinapatereno korwan ira. 6 Ana lamangin tata nabattang a medundunna, yo iddu-iddukanna a mittatanak a anaknga. Antu dinundunna sikwara a nakkun, ‘Ilawareno anakku.’ 7 Udde nattataretabbag ino katalak ira na kaubasan e kunda, ‘Antuweyaw yo marensiya so kaubasan! Kayutaw, patayantam baggina takesi akwatamun ino erensiyanna.’ 8 Antu finuwersara a inappa, pinatera anna netappolda baggina so lawan na kaubasan.”9 Kunna i Jesus sikwara, “Nenay nakuy akwan ino makan-akwa so kaubasan? Umangnga baggina sinay e patayannera anna ipabalatnana si korwan ino kaubasanna. 10 Ammeyu kad nabibbid ino kunna so neturak a sapit i Dios?
‘Na batu a inammayan ino gumappataddag ira si balay
antu yo nattabali si gakkurug a fundasyon na balay.
11 Inangwa iyaw i Afu,
e kallalaggat so aggitatam.’a”
12 Ammuweno afu-afu a pariyera, mapoporay si katunungan anneno manannakam na Hudyuwera a nangarig i Jesus metulyat sikwara. Kanggamda a gafutan baggina udde mattalawera so tolayera. Antu inanawanda i Jesus e nanawera.
Na Fuut so Pappaga si Biyenes
13 Antu dinundunda sike Jesus ino korwan a Fariseowera anneno korwan a gumaladandan ira i Herodes a umang maggafut sikwana meafu so sapi-sapitanna. 14 Inang ira sikwana e kunda, “Mestru, ammumi a matalakka anna ammeka mappeduma si tolayera se parefuweno aggitam sikwara. Ituntu-tunturum ino gakkurug a uray i Dios so tolayera. Itundum sikwami nu meyannut kad si katunungantam a mappaga kami si biyenes so Emperador na Roma onnu ammena?”
15 Udde ammu i Jesus a massalasasan ira antu kunna sikwara, “Saay se kanggammandak a pureban? Ipaitayu sikwak ino tata dinaryu e itangku.”
16 Inindanda si tata. Anna finuutna i Jesus sikwara e kunna, “Makan-mutung anna makan-ngan ino ana sitaw?”
Kunda sike Jesus, “Na Emperador na Roma.”
17 Kunna pay i Jesus sikwara, “Nu kunna sitan, iyaddayu sike Emperador ino para si Emperador, anna sike Dios ino para si Dios.” Nalaggat ira amminan so netabbag i Jesus.
Na Fuut meafu so Panantotolay
18 Inumaranniyeno korwan a Saduseowera sike Jesus a nakkun a yo natayera e ammenana a mantotolay e finuutda baggina, 19 “Mestru, neturak i Moises para sikwatam a nu matay yo lalaki a awan anaknga, atawan na wayina a lalaki yo baluna takesi manakngera a mebilang a anak ira yo natay a wayina a lalaki. 20 Namitta, ana pitu lalaki a mawwawayi. Nangataweno palungu udde natay a awan anaknga. 21 Anna inataweno meka-adwa a lalaki yo balu a bafay udde natay pay a awan anaknga. Kunnapay yo nedemmu so meka-tallu. 22 Amminan inoyera a pitu a mawwawayi e natayera a awan anakda. Anna natay pay yo bafay. 23 So panantotolay na natayera, yanya so pitu lalaki a mawwawayi yo makan-atawa so bafay se inatawara amminan baggina?”
24 Kunna i Jesus sikwara, “Amme kayu fustu gumafu se ammeyu ammuweno neturak a sapit i Dios e ammeyu pay ammuweno pakapangwana. 25 Se nu mantotolena yo natayera, ammeranna a mataweno tolayera e mekunnerana so anghel ira si langit. 26 Anna dengke so panantotolay na natayera, ammeyu kad a nabibbid so libru i Moises ino megafu so kayu a gumalla-gallayaf, a kunna i Dios sikwana, ‘Ikkanak ino Dios i Abraham, Dios i Isaac anneno Dios i Jacob.’ 27 Baggineno Dios na aggatolayera bakkan a Dios na natayera. Ikkayu a Saduseowera, amme kayuwengke fustu so nononotan diyaw awan a panantotolay na natayera.”
Na Kaawan Ingke a Dundun
28 Sikwara a mattitinnulyat da Jesus anneno Saduseowera, inumaranniyeno tata so mapoporay si katunungan e nadingngagngera. Ammuna se maporay a tumabbag i Jesus so fuut na Saduseowera antu finuutna baggina, “Ansa so dundun yo mas kaawan ingke si amminan?”
29 Kunna i Jesus, “Iyaweno mas kaawan ingke: ‘Maningngag kayu, ikkayu a tolayera na Israel! I Afu a Diostam, baggina lamang yo Diostam. 30 Kunnantu, iddukannu i Afu a Diosnu si amminan a nakammu, anna si amminan a karalwam, anna si amminan a porem anna si amminan a tuyagngu.’b 31 Antuweyaw yo meka-adwa, ‘Iddukannuweno kasittolem kakunna yo piddukngu si baggim ingkepay.’ Iyawera adwa a dundun e mas kaawan ingke ammat si korwan ira.”
32 Kunneno tata so mapoporay si katunungan sike Jesus, “Mestru, fustuka so sinapitnu! Baggina lamang yo mittata a Dios, awanin korwan nu bakkan baggina lamang. 33 Antu iddukantam i Afu a Diostam si amminan a nakamtam, anna si amminan a poretam anna si amminan a tuyagtam, anna iddukantam ino kasittoletam kakunna yo pidduk si baggitam. Antuweyaw yo mas kaawan sike Dios ammat ino newalli a aggayam ira anna korwan a kiya-kiyan a iwalliyeno tolayera sike Dios.” 34 Sin naitana i Jesus ino tata so mapoporay si katunungan a mangngammu a tinumabbag, kunna sikwana, “Maginnak a madesisyonannuna a tangngallan i Dios yo akkatolem.”
Akkabalinna, awanin a matuyag a nakamma a maffuut sike Jesus.
Na Fuut Meafu sike Mesiya
35 Sikwana a manuntu-tunturu i Jesus so lawan na Templu, kunna so tolayera, “Kasanna a sapitan ino mapoporay si katunungan a i Mesiya e gaka i David? 36 Negiyana i Espiritu i Dios i David e kunna,
‘Kunna i Afu Dios sike Afuk,
“Mattuttudka sito diwanangku,
makiyad si maaffutkuweno kapakwam ira anna iyekwak ira so pattangngalannu.” ’
37 Nu ayanna i David i Mesiya a Afuna, kasanna antu a gaka i David i Mesiya?” Mangga-anggam ingkeno oddu a tolayera a maningnga-ningngag sike Jesus.
Inarariyanna i Jesus ino Mapoporay si Katunungan
38 Sikwana a manuntu-tunturu i Jesus so tolayera e kunna, “Maumid a mimud kayu so mapoporay si katunungan se kalakanggammanda a mallakad a nakabarasi si asoddag anna mapadayawan so allangan na tolayera so plasa. 39 Pili-pilinda kepay a mattuttud so pattutturan ira na kaawan a tolayera so sinagogera anna so nakaparan a funsyon ira para so kaawan a tolayera. 40 Illo-illokunda anna koko-kokotandeno pakkukwera na baluwera anna massalasasan ira a pabayaggan ino dasalda takesi kaangga-anggam ira so aggiteno tolayera. Gumafu sitan, arasawandaneno madammat a akkastigu.”
Na Newalliyeno Balu a Bafay
41 Akkabalinna, nattuttud i Jesus so Templu a aranni so pangiyekwanan si wallira a pirak e buya-buyanneno tolayera a mangiyadda-adda si pirakda para so Templu. Oddu yo dammak a tolayera a nangiwaggat si oddu a pirak. 42 Antu dinumatang ino tata madidiyat a balu a nangiwaggat si pirak a mabbalor si adwa sentimu.