Na Newalliyeno Balu a Bafay
21
Langnga-langngaddanna i Jesus ino dammak ira a mangiwagga-waggat si wallira a pirak so pangiyekwanan para so Templu. 2 Naitana pay yo tata madidiyat a balu a nangiwaggat si adwa tansu a sentimu. 3 Kunna i Jesus so disipulunera, “Gakkurug yo itunduk sikwayu, mas oddu yo newaggat iyaw a madidiyat a balu ammat so newaggat ino korwan a tolayera. 4 Na newaggatda e parte lamang na wara-warara, udde yo madidiyat a balu e newaggatna amminan a pakkatolena.”Nepakaammuweno Akkadaral na Templu
5 Pattataretabban ino korwan a disipuluwera i Jesus ino Templu gumafu so makarasta a batuwera a neyusa sitaw anneno adornowera a ana so dinding a newalli sike Dios. Kunna i Jesus sikwara, 6 “Dumatangngeno tiyempu a amminan a maita-itayu sitaw e darallandana iyawera yo kapakwera anna awan maski tata batu a mabattangnga so nakapotunanna, amminan e madabbuknga.”
Na Pallupe-lupet anna Passufri a Dumatang
7 Finuutdeno disipuluwera i Jesus, “Mestru, nainsana a medemmu yo sinapitnu? Anna nenayna yo pemunuwammi a aranniyen a maangwa inay?”
8 Kunna i Jesus, “Mimud kayu a awan mangillokuna sikwayu se oddu a tolayera yo dumatangnga e massasan a baggira e ikkanaka anna sapitanda, ‘Ikkanak i Mesiya!’ anna ‘Dinumatangngin ino tiyempu!’ Amme kayu dumandan maski yanya sikwara. 9 Amme kayu mattalaw nu makadingngag kayu si giyerera anna guluwera. Maawag abbu a medemmu iyawera udde ammena siddarat a medemmuweno tamfut na talubaggan.”
10 Anna kunna i Jesus sikwara, “Oddu a talubbunan a makigiyera so korwan a talubbunan ira anna kunnapay a mappipinnarakwa amminan ino gubyernuwera so lubag. 11 Anana yo matutuyag a lunig, nafulotan a bisin anna takit a mamapatay si oddu a tolayera si naddadaruma a talubbunan. Anana pay yo maita a kattantalawengke a kiya-kiyan anna kakkapallat ingke a pemunuwan a naggabwat si langit.
Nepakaammuweno Pallupet
12 Nebalinna i Jesus a nakkun, “Udde liyena medemmu iyawera, gafutan anna ilupet dakayuneno tolayera. Iyangga kayuna so sinagoga anna ipafukuk dakayuna. Itallang dakayuna so patul ira anna gubernador ira gumafu se mangurug kayu sikwak. 13 Iyawin yo tiyansayu a mangitundu si kagakkuruwan sikwara meafu sikwak. 14 Antu pakanonotan diyaw si mapiya anna amme kayu maburung nu nenay yo itabbag diyaw, 15 se duffunan takayu nu nenay yo sapitan diyaw anna indan takayu si angngammu a ammera matabbag anna matulyat na kapakwayuwera. 16 Udde traydoran dakayuneno gagginafan diyawera, wawwayiyu, kawayyan diyawera anna kolak diyawera. Ipapateraneno korwan sikwayu. 17 Ikalussaw dakayuneno amminan a tolayera gumafu se mangurug kayu sikwak, 18 udde amme kayu maawanan maski tata būk so uluyu. 19 So pàattam diyaw e matabbut diyaweno baggiyu.
Nepakaammuweno Akkadaral na Jerusalem
20 “Se nu maitayuweno Jerusalem a napalebutan si sundaluwera, maammuwan diyaw se aranniyen yo pakadarallanna iyaw. 21 Antu inoyera a ana so Judea e makkarelera nad so kabakuluran. Na anera so lubbun na Jerusalem e maawag a manawera siddarat, anneno anera so tarabbunan e ammeran muli so Jerusalem. 22 Se antu yo awera na pangastigu i Dios so taga-Jerusalem ira takesi maparulot ino amminan a nakaturak a sapit i Dios.b 23 Sitan a aw, pakekkallak pay yo bafabbayera a mabussit anneno mappasusu a inera se dumatangngeno dokal a paddiriyat sitaw a talubbunan gumafu so kurwengke a allang i Dios sitaw a tolayera. 24 Na korwan sikwara e papatayandana si dukyal, anneno korwan pay e gafutandanera anneno korwan e iyanggera a mebilang a fukuk ira so amminan a talubbunan. Anna sakupan ino bakkan a Hudyuwera ino lubbun na Jerusalem makiyad si mabalin yo pattangngalda a neyaddana i Dios sikwara.
Na Pannuliyeno Anak na Tolay sito Lubag
25 “Anana yo pemunuwan ira a maita so sinag, so dakkag, anna so bitun ira. Sito lubag, matalawanna anna maburunganna ingkeno amminan a talubbunan gumafu so uni anna matutuyag a palung na bebay. 26 Mabbanilawna si talaweno tolayera so pindagga nu nenay a medemmuna so interu a lubag se mayuyyuknga amminan ino ana so kalawatan. 27 Antu maitaraknga a yo Anak na Tolay a ana so dulam a dumata-datang si pakapangwak anna pakadayawangku. 28 Nanu mamefuwenna a medemmu amminan iyaw, mangurug kayu anna patuyaggan diyaweno nakam diyaw se aranniyen yo pannabbut sikwayu.”
Na Makalakammu so Kayu a Igos
29 Akkabalinna, nangarig i Jesus sikwara, “Itan diyaweno kayu a igos anneno amminan a kayuwera. 30 Nu mallimubbutin ira iyaw, ammuyu se aranniyen a mattaliyeno tiyempu. 31 Kunnapay a nanu maitayu amminan ino pemunuwan ira a sinapitku, ammuyu a aranniyen ingkeno pattangngal i Dios.
32 “Gakkurug yo itunduk sikwayu, mededemmuna amminan iyawera so amminan a tolayera a aggatolay liyera matay. 33 Tumallapneno kalawatan anna lubag, udde ammenengke maawan ino sapitkuwera amu-amu.”
Malertu Kayu
34 Nebalinna i Jesus a nakkun, “Mimud kayu takesi amme kayu a mangampag si panggamman na talubaggan, si pakkabuk anna pakaburungan na akkatolay se tantaro lannat a dumatangnga inay a aw 35 a ammeyu innanaman. Se dumatangnga inay a aw so amminan a tolayera so interu a talubaggan. 36 Antu malertu kayu kada orat anna maumid kayu a maddasal takesi indan nakayu i Dios si tuyag a maattamman diyaw amminan a paddiriyat a mededemmuna sikwayu, anna maanggam kayu a tumallang sikwak a yo Anak na Tolay.”