Nappili i Jesus si Tafulu Adwa a Apostolnera
10
Inammungnga i Jesus ino tafulu adwa a disipulunera anna inindannera si pakandama a mappaanaw si demonyuwera anna mappammapiya si amminan a takit anna amminan a ginna-ginnan. 2 Antuweyawera yo ngan na tafulu adwa a apostol ira:I Simon a pinangananda si Pedro,
anni Andres a wayina,
da Santiago anni Juan a anak ira i Zebedeo,
3 da Felipe anni Bartolome,
da Tomas anni Mateo a gumattuki si biyenes,
i Santiago a anak i Alfeo,
anni Tadeo,
4 i Simon a pinangananda si Makalubbun a mangikalow so lubbunna,
anni Judas Iscariote a nattraydor sike Jesus.
Na Pakaidundunan na Tafulu Adwa a Apostol ira
5 Dinundunna i Jesus ino tafulu adwa a apostolnera e tinunannera, “Amme kayu umang so lugar na bakkan a Hudyuwera onnu amme kayu umang so lubbun na Samaritanuwera. 6 Udde umang kayu so Israelitera a nattalekkud sike Dios anna manilla nawawan a karneruwera. 7 Dengke kayu a umang, ibalaggoyu a aranniyen ino pattangngalan i Dios. 8 Pammapiyan diyaweno matakit ira, pantotolayan diyaweno natayera, pammapiyan diyaweno ana takitda si gaddang, anna paanawan diyaweno demonyuwera. Awan pinagan diyaw so pakapangwa a neyaddak sikwayu, kunnantu amme kayu marang si pageno duffun diyaw.
9 “Amme kayu mangikangkalin si pirak a bulawan, diplata onnu tansu. 10 Amme kayu mangikangkalin so paddoyug diyaw si pangiyekwanan si pakkukwayuwera, pattaliyan, sandalyat, onnu bangkulu. Se yo mattarabafuwera e mepangngat a maindan si pakkatolera.
11 “Maski nenay a lubbun onnu lugar ino angan diyaw, mintufuk kayu si tolay a manggam a mappadulot sikwayu e magyang kayu sinay makiyad si manaw kayu. 12 Anna nu maddulot kayu si tata balay, sapitan diyaw, ‘Na piya i Dios e ana sikwayu sitaw a balay!’ 13 Nu sibubukkat ira a mappadulot sikwayu, maddasal kayu a akwannana i Dios a mapiya yo akkatolera. Udde nu ammera sibubukkat a mappadulot sikwayu, golin diyaweno sinapit diyaw. 14 Anna nu ana tolay a ammena mappadulot sikwayu onnu maningngag so sapitan diyaw, pappaggan diyaweno girafuk so takkiyu dengke kayu a manaw sitan a balay tapenu ipaitayu si tolayera a kastiguwan irana i Dios se inammayandeno mensahena. 15 Gakkurug yo itunduk sikwayu, so Aw na Pannunut e mas madammatneno akkastiguna i Dios si tolayera sitan a lubbun ammat so akkastigu na tolayera so Sodoma anna Gomorraa siin nabayagin a tiyempu.
Nepakaammuweno Pallupet
16 “Maningngag kayu! Dundunan takayu so maral a tolayera a kakunna kayu a karneru a umang so agyanan na simaron a atuwera. Antu mangngammu kayu a kakunna yo irawera anna masimpat a kakunna yo guruk ira. 17 Mimud kayu, se gafutan dakayuna anna medawawa kayuna so affuyug na Hudyuwera anna malassitang kayuna so sinagogarera. 18 Gumafu so paddandan diyaw sikwak, metallang kayuna so allangan ino gubernador anneno patul ira. Gumafu sitaw, mepakaammuneno Mapiya a Baga sikwara anna so bakkan a Hudyuwera. 19 Nu gafutan dakayu, amme kayu maburung nu nenay yo sapitan diyaw onnu kasannayu a sapitan se sinay a orat mepakaammuna sikwayuweno fustu a sapit ira a maawag a sapitan diyaw. 20 Se bakkan a naggabwat sikwayuweno sapitan diyaw, udde yo sapitan diyaw e maggabwatna sike Espiritu i Dios a Amayu.
21 “Traydoranneno wayi yo wayina tapenu ipapatena, kunnapay yo parefu a akwan na gagginafan so anakdera. Anna kapakwanneno anak ira yo gagginafandera e ipapatera. 22 Anna ikalussaw dakayuneno amminan a tolayera gumafu se mangurug kayu sikwak. Udde yo tolay a mangibali-balin a makimoray sike Dios si kiyanna e matabbutna. 23 Nu ilupe-lupet dakayu si tata lubbun, umang kayu so korwan a lubbun. Gakkurug yo itunduk sikwayu, ammeyu keppena mabalin ino tarabafuyuwera so amminan a lubbun na Israel nanu muliyaknga, ikkanak a yo Anak na Tolay.
24 “Awan a disipulu a tammapiya ammat so mestruna, anna awan a imbut a mas atannang ammat so amuna. 25 Kunnapay, maanggammengkeno disipulu nu mekunnana baggina si mestruna e kunnapay yo imbut so amuna. Nu ikkanak a meyarig si ama na familya a nelupe-lupet ino tolayera e kunda a ikkanak i Beelsebulb a afu-afu na demonyuwera, annanotinna sikwayu a disipuluk ira a parte na familyak.
Na Maawag a Katalawan
26 “Kunnantu, amme kayu mattalaw sikwara, se awan a netawu a ammenana melawan, anna awan a meyimad a ammenana maammuwan. 27 Na itunduk sikwayu a ikkayu pelamang yo makadingngag, ibalaggoyu si amminan a tolayera, anneno nepanifig sikwayu, ibalaggoyu si mapiya so tolayera.
28 “Amme kayu mattalaw si tolayera a mamapatay si baggi gumafu se ammera mapapatayeno karalwayu. Udde imbes, mattalaw kayu sike Dios a damana darallan ino baggiyu anna karalwayu si infiyernu. 29 Ammuyu a maski nu nelaku si malamak ino adwa a dinnat, awan maski tata sikwara a madannagnga so lubag nu bakkan a uray i Amayu si langit. 30 Ikkayu pay, maski na būk ira so uluyu e nabilangin amminan i Dios. 31 Nabu, amme kayu mattalaw se mas ikengana kayuwengke i Dios ammat so oddu a dinnat ira!”
Pangngurug onnu Pangiyambafag sike Jesus
32 Kunna pay i Jesus, “Kunnantu, seanya yo massapit so tolayera a mangurug baggina anna dumandan sikwak, ammeknga iyambafag a disipuluk baggina so allangan i Amak a ana si langit. 33 Udde nu iyambafagnga a disipuluk baggina so korwan ira, iyambafagkuna pay baggina so allangan i Amak si langit.
I Jesus ino Pakegafuwan na Pakkakaratway na Tolayera
34 “Ammeyu nonotan a inangngak sitaw a mangiyang si piya sito lubag. Ammek a nangiyang si piya udde nangiyangngak si pakkakaratwayan ino tolayera. 35 Gumafu sikwak, makkakalussawneno matama anna masina maski yo makkatuwangan ira. 36 Anneno kapakwa na tata tolay e yo kafamilyana ingkepay.
37 “Seanya yo midduk sike amana onnu inana mas ingke sikwak e ammena mepangngat a mattabali si disipuluk anna seanya yo midduk si anakngera mas ingke sikwak e ammena mepangngat a mattabali si disipuluk. 38 Anna seanya yo ammena makaattam si diyatc maski nu pakegafuwan na patena anna dumandan sikwak e ammena mepangngat a mattabali si disipuluk. 39 Seanya yo mangikenga pelamang si angatna e ammena matolay a bulun i Dios amu-amu. Seanya yo manggam a matay maipegafu sikwak e matolena a bulun i Dios amu-amu.
Na Pammakapiyan Ira
40 “Seanya yo mangarasaw sikwayu e mangarasaw sikwak, anna seanya yo mangarasaw sikwak e arasawanna pay yo nanundun sikwak. 41 Seanya yo mangarasaw so profeta gumafu se profetana i Dios baggina e makaarasawna si makkakunna a pammakapiyan a arasawan na tata profeta. Anna seanya yo mangarasaw si tata tolay a nebilang i Dios a matunung anna mapiya e makaarasawna si kaparefu a pammakapiyan kakunna iyan a tolay. 42 Anna seanya yo mappainum si tata basu a malabbat a danum so tata kaibbafan so disipuluk ira e gakkurug a makaarasawna si pammakapiyan.”