9
Anna kunna i Jesus so disipulunera, “Gakkurug yo itunduk sikwayu, ana korwan sikwayu sitaw a ammena matay makiyad si ammera maiteno makapangwa a pattangngal i Dios.”Na Pangangkakwa na Baggi i Jesus
2 Akkabalinna annam a aw, nebulunna i Jesus da Pedro, Santiago anni Juan, nunek ira so tata atannang a bakulud a ira-ira pelamang. Sin anera sinay, naitara a nangangkakweno baggi i Jesus so allanganda. 3 Mangngilikilit a naffuraweno barasina e awan maski yanya sito talubaggan a makapafuraw si kunna sinay.
4 Anna naitara pay sinay i Elias anni Moises a nakiteta-tetabbag sike Jesus.
5 Kunna i Pedro sike Jesus, “Mestru, mapiya se ana etam sitaw. Mangwa kami si tallu a pimemmangan, tata para sikwam, tata para sike Moises anna tata para sike Elias.” 6 Nasapitna iyaw i Pedro gumafu se ammena ammu nu nenay a sapi-sapitanna se kurwengkeno talora.
7 Nappaddeno dulam a naniyong sikwara e nadingngaggeno tata ngaral a naggabwat sinay a nakkun, “Antuweyaw yo Anakku a iddu-iddukangku. Maningngag kayu sikwana!”
8 Siddarat a nallangiyeno disipulunera, awan korwan a naitara nu bakkan i Jesus lamang.
9 Sin padolam iran so bakulud, tinundera i Jesus, “Awan korwan a pangitunduwan diyaw so naitayu makiyad si ikkanak a yo Anak na Tolay e mantotolena.” 10 Antu kinuruggeno pannunturuna, udde sittatera a nappipinnakifut nu nenay yo kanggamma sapitan ino panantotolay yo natayera. 11 Anna naffuut ira sike Jesus, “Saay se netunduweno mapoporay si katunungan a maawag a mapalungu a umang i Elias liyena dumatang i Mesiya?”
12 Kunna i Jesus sikwara, “Gakkurug a mapalungu abbu a dumatang i Elias takesi pinangayanna amminan a nangidundunangku sikwana. Udde saay se kunna so neturak a sapit i Dios a ikkanak a yo Anak na Tolay e maawag a maddalan si odduwengke a paddiriyat anna arariyandaknga ingke? 13 Udde itunduk sikwayu a dinumatangngin i Elias. Anna inangweno tolayera ino kanggamda a akwan sikwana kakunna yo neturak meafu sikwana.”
Pinammapiyana i Jesus ino Abbing a Lalaki a Naaffunan si Demonyu
14 Sin nuli da Jesus anneno tallu a disipuluwera so nagyanan na korwan a disipuluwera, naitareno odduwengke a tolayera so lebutda anneno mapoporay si katunungan a nakitinnulyat sikwara. 15 Nalaggat ino tolayera sin naitara i Jesus, siddarat a nakkarantut ira a nakkidyot sikwana.
16 Finuutna i Jesus ino disipulunera, “Nenay yo pattitinnulyatan diyaw?”
17 Tinumabbag ino tata a naggabwat so tolayera, “Mestru, iyangku sikwayuweno anakku a lalaki a naaffunan si demonyu antu yo nappagumal sikwana. 18 Kada affunan ino demonyu yo abbing, ibale-baletwaknga baggina so lubag. Malluluweno bifignga anna mangngari-ngaritam ino ngipannera anna mattalataggat ino baggina. Inarangku so disipulum ira a paanawandeno demonyu udde ammera a mapaanaw.”
19 Tinumabbag i Jesus, “Ikkayu a diyafuwan sitoye, awan angngurug diyaw anna ammeyu ammuweno fustu onnu bakkan a fustu. Kasanna kad ingke kabayag yo pagyangku onnu pàattamku sikwayu? Iyang diyaweno abbing sikwak.”
20 Anna neyangga sikwaneno abbing. Udde sin naitaneno demonyu i Jesus, siddarat a pinabbanilawneno abbing e nabaletwak anna naddaro-darolig so lubag. Malluluweno bifignga.
21 Finuutna i Jesus ino ama na abbing, “Kansa kepay iyaw a nedemmu sikwana?” Kunneno ama, “Mamefu kepay sin akkabbingnga. 22 Maumid a itappol ino demonyu baggina so afuy anna ilammad so danum takesi patayanna. Udde nu ana a makwam, ikallak anna duffunan dakami!”
23 Kunna i Jesus sikwana, “Saay kunnu se ana makwak? Makwa amminan so ana angngurugnga.”
24 Siddarat a naggiraweno ama na abbing e kunna, “Mangurugak! Patuyaggannuweno angngurugku se makurang kepay.”
25 Sin naitana i Jesus a inumoddu yo tolayera a inumaranni sikwana, pinassapitanneno demonyu e kunna, “Ikka a demonyu yo gafuna a pakkabangngagnga anna pakkagumalna, idundungku sikwam, anawannun baggina anna ammemun toliyan.”
26 Akkabalinna a nakkallit ino demonyu e pinabbanilawnengkeno abbing liyena nanaw. Anna manilla natayeno abbing antu kunneno tolayera, “Natayin baggina!”
27 Udde iniggammanna i Jesus ino kamat na abbing anna ginumbwatna e nakattaddagin.
28 Sin nakatallungin i Jesus anneno disipulunera so balay a paffunduwanda, finuutda baggina sin ira-ira pelamang, “Saay se ammemi mapaanaweno demonyu?”
29 Kunna i Jesus sikwara, “Na addasal lamang yo damana a makapaanaw si kunna sitaw a garannud na demonyuwera e awanin korwan.”
Nepakaammuna Imman i Jesus ino Akkapatena anna Panantotolena
30 Nanaw i Jesus sitan a lubbun e nattalebad ira so Galilea. Ammena kanggam i Jesus a maammuwan ino tolayera ino nagyananna, 31 gumafu se tinunturuwanneno disipulunera, e kunna iyaw sikwara,
“Ikkanak a yo Anak na Tolay e traydorandakngeno tolayera anna papatayandaknga udde tallu aw kapiyek a natay, mantotolayaknga.”
32 Udde ammena maintindiyan ino disipulunera yo sinapitna anna mattalawera a maffuut sikwana.
Gakkurug a Kaatannangan
33 E nuli i Jesus anneno disipulunera so Capernaum anna sin aneran so balay, finuutna i Jesus sikwara, “Nenay yo pattitinnulyatan diyaw so dalan?”
34 Udde ammera tinumabbag, gumafu se nattitinnulyat ira so dalan nu yanya sikwareno kaatannangan.
35 Nattuttud i Jesus e inayanneno tafulu adwa a apostolnera e kunna sikwara, “Seanya yo manggam a mebilang a kaawan a tolay, maawag a mappataibbafa a masserbi si tolayera.”
36 E inappaneno tata abbing, anna pinataddagnga so allanganda. Inakkuyneno abbing e kunna sikwara, 37 “Seanya yo mangarasaw sito abbing maipegafu sikwak e arasawannak, anna seanya yo mangarasaw sikwak e arasawanna pay yo nanundun sikwak.”
Buluntam ino Ammena Mattulyat Sikwatam
38 Tinumabbag i Juan, “Mestru, nakaita kami si tata tolay a mappaana-anaw si demonyu a usa-usandeno ngannu. Ginaggaddammi baggina se bakkantam a bulun.”
39 Udde kunna i Jesus, “Ammeyu fuwaddan baggina se awan a mangwa si milagru a usa-usanneno ngangku a mabidna si maral metulyat sikwak. 40 Seanya yo ammena mammay sikwatam antu yo buluntam. 41 Se gakkurug yo itunduk sikwayu, seanya yo mangadda sikwayu si maski tata basu a danum gumafu se ikkayu e gumaladandan dakayu i Kristo, makaarasaw kayuna si pammakapiyan.”
Na Pakegafuwan na Pakaliwatan
42 Nebalinna i Jesus a nakkun, “Nu yanya sikwayuweno pakegafuwan na pakaliwatan ino tata mangurug sikwak a ibbafa a tolayera a mangurug sikwak a kakunna si abbing ira, tammapiya a bassinan si dokal a aggilingan ino tangngadna anna itappol so bebay. 43 Nu yo kamatnuweno pakegafuwan na pakaliwatannu, gabbungannu. Mas mapiya kepay a awan kamatnu a matolay a bulun i Dios amu-amu, ammat si ana adwa a kamat anna umangkana si infiyernu a ana afuy a ammena maadda-addap. 44 Na uggit ira a mangngan si baggirera e ammena matay anneno afuy sinay e ammena matay. 45 Anna nu takkim ino pakegafuwan na pakaliwatannu, gabbungannu. Mas mapiya kepay a awan a takkim a matolay a bulun Dios amu-amu, ammat si ana adwa a takkim anna metappol so infiyernu a ana afuy a ammena maadda-addap. 46 Na uggit ira a mangngan si baggirera e ammena matay anneno afuy sinay e ammena matay. 47 Anna nu matam yo pakegafuwan na pakaliwatannu, kulotannu. Mas mapiya a awan matam a magyan so pattangngalan i Dios ammat si ana matam e metappolka so infiyernu a ana afuy a ammena maadda-addap. 48 Na uggit ira a mangngan si baggirera e ammena matay anneno afuy sinay e ammena matay.
49 “Se amminan a tolayera e mapurebanna so passufrira takesi kaangga-anggam irana si aggita i Dios a mallengke sakrifisyu a nataggab a naasinan anna kaangga-anggam sikwana. 50 Mapiya yo asin, udde nu maawanin yo kinaasinna, kasannam kad kepay a metoli yo tantamma? Mapammakapiyangka nad a kakunna yo asin anna makipiyaka si kasittolem.”