Pinakkanna i Jesus ino Appat a Rifu a Tolayera
8
Sinoy a tiyempu, nammu-ammung imman ino odduwengke a tolayera sike Jesus. Anna gumafu se awan maakkanda, inayanna i Jesus ino disipulunera e kunna sikwara, 2 “Maallakkanak so tolayera se tallu awin a bulungkuwera e awan a maakkanda. 3 Nu pulingkuwera so balera a mabisin tantaro mabbanilawera so dalan se naggabwat ino korwan ira so aroyu a lubbu-lubbun.”4 Tinumabbag ino disipulunera, “Sintaw pangappantam si maffustu a maakkan na odduwengke a tolayera sitaw a lugar a aroyu so lubbu-lubbun?”
5 Finuutnera, “Pigyeno tinapay a ana sikwayu?”
Kunda, “Pitu.”
6 Netun i Jesus so tolayera a mattuttud so lubag. Inappaneno pitu a tinapay e nappabala-balat sike Dios anna akkabalinna, ginadwa-gadwana e neyaddana so disipulunera se ira yo mangibunnay so tolayera. 7 Ana pay pigya a bawissang a busiladda anna nappabalat i Jesus sike Dios para sikwara, netunna a mebunnay nad iyaw so tolayera.
8 Nangngan ira amminan e nabattug ira. Sin nabalin iran a nangngan, inammunggeno nabuna a maakkan, pitu a kaba ino napannu. 9 Maggi appat a rifu amminan ino tolayera a nangngan. Akkabalinda a nangngan, pinaulinera so balera. 10 E siddarat a nattakay i Jesus anneno disipulunera so barangay e inang ira so Dalmanutaa.
Naarangngan i Jesus si Milagru
11 Inang ino korwan a Fariseowera sike Jesus a makitinnulyat sikwana se marang ira si milagru sike Dios a pamureba sikwana.
12 Nannangat si arollam i Jesus e kunna, “Saay se yo diyafuwan sitoye e marang si milagru? Gakkurug yo itunduk sikwayu, awan milagru a mepaitak sikwayu sito diyafuwan.” 13 Inanawannera e nabbarangay imman anna naddammang baggina so tafik.
Na Labadura na Fariseowera anni Herodes
14 Sitoye, nakalyawan ino disipuluwera i Jesus a nangikangkalin si tinapay, tata lamang a tinapay yo ana sikwara so barangay. 15 Netun i Jesus sikwara a nakkun, “Malertu anna mimud kayu so labadura na Fariseowera anneno labadura i Herodes.”
16 Nattataretabbag ira, “Sinapitna inay se ammetam nangikangkalin si maski sanna a tinapay.”
17 Ammuna i Jesus ino pattataretabbanda e kunna, “Saay se pattataretabban diyaweno ammeyu pangikangkalin si tinapay? Ammeyu kad kepay maita onnu maintindiyan makiyad sitoye? 18 Ana matayu udde amme kayu makaita? Ana layag diyaw udde amme kayu makadingngag? Ammeyu kad madandam? 19 Sin ginadwa-gadwak ino lima a tinapay a inakkan ino limarifu a tolayera, pigyeno kaba a napannu si nabuna a nakampat diyaw?”
Kunda sikwana, “Tafulu adwa.”
20 Naffuut pay i Jesus, “Sin ginadwa-gadwak ino pitu a tinapay a inakkan ino appat a rifu a tolayera, pigya kaba a napannu si nabuna a nakampat diyaw?” E kunda sikwana, “Pitu.”
21 Kunna sikwara, “Ammeyu kad kepay maintindiyan makiyad sitoye?”
Pinammapiyana i Jesus ino Lalaki a Bulag so Betsaida
22 Dinumatang i Jesus anneno disipulunera so Betsaida. Neyang ino korwan a tolayera sike Jesus ino tata lalaki a bulag e nakigumallak ira sikwana a senggiranneno lalaki a bulag. 23 Anna sin inekwananna si luppa yo matera na lalaki a bulag anna nepotunna yo kamatna sikwana, finuutna baggina a nakkun, “Anen maitam?”
24 Nallangiyeno lalaki e kunna, “On, maitak ino tolayera udde manillera kayuwera a mallaka-lakad.”
25 Antu sinenggidna imman i Jesus ino matera na lalaki. Pakatulangnganna e nantotoliyeno aggitana anna mabaggaw amminan yo maitana. 26 Nepulina i Jesus ino lalaki so balera a nakkun, “Ammeka muli sitan a lugar.”
Pakaammu i Pedro meafu so Akkatolay i Jesus
27 Inang i Jesus anneno disipulunera so tara-tarabbunan na Cesarea Filipos. Sin mallaka-lakad ira, finuutneno disipulunera, “Yanyaak so tolayera?” 28 Tinumabbag ira, “Ana pigya a massapit a ikka kanu i Juan a Gumabbawtismu udde kunda pay yo korwan ira a ikka i profeta Elias, e kunna kepay yo korwan ira a ikkeno tata so profetera.”
29 Kunna sikwara, “Ikkayu pay ay, yanyaak sikwayu?”
Netabbag i Pedro, “Ikka i Mesiya i Dios!”
30 Anna nengangngadna a tinunan ira a awan pangitunduwanda meafu sikwana.
Nepakaammuna i Jesus ino Akkapatena anna Panantotolena
31 Pinefunanna i Jesus a itundu so disipulunera nu nenay yo medemmu sikwana e kunna, “Ikkanak a yo Anak na Tolay e maawag a massufriyengke anna pammayan na manannakam na Hudyuwera, afu-afu a pariyera anneno mapoporay si katunungan anna ipapateraknga udde akkabalin na tallu aw mantotolayaknga.” 32 Kunna iyaw i Jesus si mapiya sikwara. Neyaroyuna i Pedro i Jesus si bisang anna pinassapitanna baggina.
33 Udde tinallangnga i Jesus ino disipulunera anna pinassapitanna i Pedro e kunna, “Aroyuwannak, Satanas! Bakkan a uray i Dios yo nono-nonotannu udde urayeno tolayera.”
Na Paddandan Sike Jesus
34 Inayanna i Jesus ino oddu a tolayera anneno disipulunera e kunna sikwara, “Nu ana manggam a mattabali si gumaladandangku, anawanneno panggammanna a akwan anna kinaaw a ibali-balinna a mangurug sikwak maski nu antuweyan yo pakegafuwan a passufrina anna akkapatena. 35 Seanya yo mangikenga pelamang si angatna e ammena matolay a bulun i Dios amu-amu anna seanya yo manggam a matay maipegafu sikwak anna maipegafu so Mapiya a Baga e matolena a bulun i Dios amu-amu. 36 Nenay kad mapiya a maappeno tata tolay maski nu akwana amminan a wara-wara sito talubaggan udde ammena matolay a bulun i Dios amu-amu? 37 Nenay kad a meyaddana a panali si angatna a bulun i Dios amu-amu? 38 Inoyera a mangikaatal sikwak anneno sapitkuwera, so tolayera a ammera makurug sike Dios anna sinaliwat a diyafuwan sitoye a tiyempu, ikkanak a yo Anak na Tolay e ikaatalkuna payera nanu muliyak a bulun ino anghel ira i Dios a mangipaita si pakadayawan i Amak.”