Na Katunungan i Dios anneno Gagangay na Tolay
7
Namitta aw narimummung ino Fariseowera anneno korwan a mapoporay si katunungan sike Jesus. Naggabwat ira so Jerusalem. 2 Naitareno korwan a disipulunera a ammera bagguwan yo kamatda liyera mangngan meantu so negagangera. 3 (Amme mangngan ino Fariseowera anneno amminan a Hudyuwera nu ammera abbu mamaggu si kamat meantu so gagangera a inarensiyara so aggidiyafuwandera. 4 Anna ammera mangngan si maski sanna a naggabwat so merkado nu bakkan bagguwanda iyawa. Anna oddu kepay yo gagangay na aggidiyafuwantam ira a tuntulanda kakunna yo passinaw so pakkafeyan ira, bangera anna kalderuwera.b)5 Antu finuutdeno Fariseowera anneno mapoporay si katunungan i Jesus, “Saay se yo disipulum ira e ammera tuntulan ino annunturuwera na aggidiyafuwantam ira se iyan yo gagangera? Ammera mamaggu si kamatda liyera mangngan meantu so gagangera.”
6 Tinabbagngera i Jesus a nakkun, “Mappesimpat kayu! Gakkurug ingkeno sinapit i Isaias meafu sikwayu. So turakngera a kunna i Dios,
‘Daya-dayawandak iyawera a tolayera si sapitda,
udde yo nakamda e aroyu sikwak.
7 Awan serbineno paddayora sikwak
gumafu se sapi-sapitanda a naggabwat sikwak ino ituntu-tunturura udde inoyera e angwa lamang yo tolay.’c
8 Anna netunduna i Jesus sikwara, “Dengke sikwayu, pinurayan diyaweno dundun i Dios gumafu se tinuntul diyaweno gagangayera a angweno tolayera.”
9 Antu kunna sikwara, “Manilla kayuwengke gagakkurug! Pinurayan diyaweno dundun i Dios tapenu matuntul diyaw lamang yo gagangeyuwera! 10 Gangngaryan, netun i Moises, ‘Ilawam i amam anni inam,’ anna ‘Seanya yo massapit si maral sike amana onnu inana e maawag a matay.’ 11 Udde itunturuyu so tolayera a nu sinapit ino tata tolay so amana onnu inana, ‘Newallikun sike Dios ino amminan a duffungku sikwayu,’ 12 antu ammeyun iyannut iyan a tolay a mangwa si mapiya so gagginafanna. 13 Nabu ammeyu kinengan ino dundun i Dios gumafu so gagangayera a nepakamat so tolayera. Anna oddu yo netunturuyu a kiya-kiyan a kakunna iyaw.”
Na Mappadakkut si Tolay so Allangan i Dios
14 Inayanna imman i Jesus ino tolayera e kunna sikwara, “Maningngag kayu amminan sikwak anna intindin diyaweno sapitangku. 15 Bakkan yo tumallung so bifig na tata tolay a mappadakkut sikwana, nu bakkan yo maral a maggabwat so nonotna.” 16 (“Seanya sikwayu a maningngag sikwak, nonotanna si mapiya yo sinapitku.”)
17 Sin inanawanna i Jesus ino tolayera, tinumallung baggina anneno disipulunera so balay. Finuutda baggina nu nenay kanggamma sapitan ino pangarignga. 18 Kunna i Jesus sikwara, “Saay, ammerak kad kepay maintindiyan? Ammeyu kad ammu se bakkan a yo tumallung so baggiyeno tolayeno mappadakkut sikwana? 19 Ammena a tumallung iyan si nakamma udde so kuyungnga e ilawanna keppay.” (Sin sinapit iyaw i Jesus, neyannutna a damatam a akkanan amminan a maakkan.)
20 Anna kunna, “Na mappadakkut si tata tolay si aggita i Dios e nu nenay mallawan si nakamma. 21 Se maggabwat so nonot ino tolay yo maral a ginanakam. Nabu, ana inoyera a makidurug si bakkanna atawa, makkokot, mamapatay, makikkarallaw, 22 maagum, mapara-paral, mangilloku, umifag, mapassil, manandaral si kasittolay, mabbalagasay anna millaw. 23 Amminan iyawera a maral a kiya-kiyan e maggabwat so nakam na tolay, antu yo mappadakkut sikwana so allangan i Dios.”
Na Angngurug na Bafay a Bakkan a Hudyu
24 Nanaw i Jesus so Galilea e inang baggina so kalubbunan na Tiro. Paddatangnga sinay, nagyan baggina so tata balay, udde ammena kanggam a maammuwan ino korwan ira. Maski nu kunna sinay, naammuwan keppay yo tolayera meafu sinay. 25 Ana tata ina a naaffunan yo anaknga si demonyu. Sin nadingngagnga meafu sike Jesus, siddarat a inang sikwana e nallabba so allanganna. 26 Iyaw a bafay e bakkan a Hudyu. Neyanak so Fenisia, tata lubbun so Siria. Nakigumallak baggina sike Jesus a paanawanneno demonyu so anaknga. 27 Udde kunna i Jesus sikwana, “Palungunnu abbu a pakkanan ino abbing ira se ammena mepangngat a appan ino akkananda anna itappol so atuwera.”
28 Udde tinabbag ino bafay i Jesus, “Afu, maski yo atuwera so gukab na dulang, akkanandeno buttera na abbing ira.”
29 Kunna i Jesus sikwana, “Gumafu so sinapitnu, damamun a muli so balem. Inanawanneno demonyu yo anakngu!” 30 Sin nakauliyeno bafay so balena, nadatangnganna a nakaiddeno anaknga so piddan e naammuwanna a nallawanin ino demonyu so baggina.
Pinammapiyana i Jesus ino Lalaki a Bangngag anna Gumal
31 Sin nanaw da Jesus anneno disipulunera so Tiro, nattalebad ira so Sidon e nilebutdeno lubbu-lubbun na Decapolis anna nattaffut ira so Balanaw na Galilea. 32 Neyang ino tolayera sikwaneno tata lalaki a bangngag anna gumal. Nakigumallak ira sike Jesus a ipotunna yo kamatna so lalaki takesi mammapiyana baggina.
33 Neyaroyuna i Jesus baggina so kaodduwan ino tolayera e netullatneno tata so tamurunera so kada layag ino lalaki. Niluppanna i Jesus yo tamurunera anna sinenggidneno dila na gumal. 34 Nattangaw i Jesus si langit anna nannangat e kunna so lalaki, “Efata” kanggamma sapitan, “Mabbukkatka.” 35 Sinoy keppay e nakadingngaggin ino lalaki anna nakaabirin si mapiya.
36 Netunna i Jesus so tolayera a ammera itundu so korwan ira nu nenay a nedemmu. Udde maski netunnera, mattalaginnay ingke a nebalaggoreno kakkapallat a kiya-kiyan a inangwana. 37 Nalaggat ingkeno tolayera a nakadingngag so baga e kunda amminan, “Mapiya amminan yo inangwana e napadingngagngeno bangngag anna napaabidneno gumal.”