Na Pammay sike Jesus so Nazaret
6
Nanaw i Jesus sitan a lugar e nuli so lubbunna a Nazaret. Anna dinumandan ino disipulunera sikwana. 2 Namefu baggina a nanunturu so sinagoga so Aw na Aggimemmang. Nalaggat ingkeno oddu a tolayera a naningngag sikwana. Kunda si nakamda, “Nangappanna si angngammuna? Nenay iyaw a poray a neyadda sikwana? Nakaangwa kepay baggina si milagruwera! 3 Bakkang kad baggineno karpinteru a anak i Maria anna wayira Santiago, Jose, Judas anni Simon anna bakkang kad a buluntam sitaweno wawwayinera a bafabbay?” Anna inarariyanda i Jesus.4 Anna kunna i Jesus sikwara, “Gakkurug a maski sintaw a lubbun a angan ino profeta i Dios, ilaweno tolayera baggina fuwera so kalubbunannera anna familyanera.” 5 Anna gumafu se ammera kuruwan baggina, ammena a makaangwa i Jesus sinay si milagru nu bakkan yo pangipotun si kamatnera so korwan a matakit ira e nammapiyera. 6 Nakkabbaw i Jesus so awan angngurugga sikwana.
Na Pakaidundunan na Tafulu Adwa a Apostol ira
Antu nilebutna i Jesus ino tarabbunan ira so pallebutan na Nazaret a nanunturu so tolayera. 7 Inayanna i Jesus ino tafulu adwa a apostolnera e dinundunnera a siggadwa anna inindannera si pakandama a mappaanaw si demonyuwera so tolayera a inaffunanda. 8 Netunna sikwara, “Amme kayu mangikangkalin si maski sanna so paddoyug diyaw nu bakkan a bangkulu. Amme kayu mangikangkalin si tinapay, pangiyekwanan si pakkukwayuwera anna pirak so gayakat diyawera. 9 Mangiyusa kayu si sandalyat udde amme kayu mangikangkalin si korwan a barasi.” 10 Kunna kepay sikwara, “Nu padulotan dakayu so tata balay, magyang kayu sinay makiyad si manaw kayu sitan a lubbun. 11 Nu ammera kayu padulotan anna dingngaggan ino tolayera so tata lugar, anawan diyaw iyan a lubbun anna pappaggan diyaweno girafuk so takkiyu tapenu ipaitayu so tolayera a kastiguwan irana i Dios se inammayandeno mensahena.”
12 Antu nanaweno apostolnera e nebalaggora so tolayera a mabboboli nad amminan si liwa-liwatda. 13 Pinaanoreno oddu a demonyuwera e inaffuryatanda si lana yo oddu a matakit ira anna nammapiyera.
Na Akkapatay i Juan a Gumabbawtismu
14 Nadingngag i Herodes Antipas a gumattangngal na Galilea meafu sike Jesus gumafu se mammannag baggina. Kundeno korwan a tolayera, “Nantotolay i Juan a Gumabbawtismu, antu gafuna a ana pakapangwana a mangwa si milagruwera.”
15 Udde kundeno korwan ira, “Baggina i Elias!”
Anna kunda pay yo korwan ira, “Tata a profeta baggina a kakunna yo profetera siin palungu a tiyempu.”
16 Udde sin nadingngag iyaw i Herodes Antipas, kunna, “Nantotolay i Juan a nepafugutku.” 17 Sinapitna iyaw gumafu se liyena iyaw a nedemmu, nepagafutna i Herodes i Juan. Nepakawadna anna nepafukuknga baggina gumafu sike Herodias a inatawana sikwana kepay a atawa i wayina a i Felipe.
18 Maumid a tunduwan i Juan i Herodes Antipas, “Ammena meyannut si katunungantam a atawannuweno atawa i wayim!” 19 Antu yo gafuna a makaallang ingke i Herodias sike Juan antu kanggamma a ipapatay baggina. Udde ammena iyaw a maangwa, 20 gumafu se mattalaw i Herodes sike Juan, se ammuna a makimoray baggina sike Dios anna tolay i Dios baggina, nabu kanggamma a awan maral a medemmu sikwana. Sin nadingngagngeno ituntu-tunturuwera i Juan, nakungkurwan ingkeno nonotna, udde maski kunna sinay, kanggamma kepay a maningngag sikwana.
21 Tata aw, sinilebran i Herodes ino aw na akkeyanaknga. Inimbitanneno kaawan a ofisyales, afu-afu a sundaluwera, anneno kaawan a afu-afuwera na Galilea. Antu ana tiyansa i Herodias a ipapatena i Juan. 22 Sin tinumallung anna nanalip ino bafay a anak i Herodias, naanggamman i Herodes Antipas anneno bisitanera. Antu kunna so sultera, “Marangka si maski nenay a kanggammu sikwak e iyaddak sikwam.” 23 Netambana kepay sikwana, “Iyaddaknga maski nenay yo arangngannu maski kepay yo gadwa na pappatulangku.”
24 Antu inang a naffuut ino sultera sike inana, “Nenay nad arangngangku?”
Netabbag i Herodias, “Arangngannuweno ulu i Juan a Gumabbawtismu.”
25 Siddarat a nuliyeno sultera sike Herodes Antipas e kunna, “Kanggammangku a iyaddam sikwak ino ulu i Juan a Gumabbawtismu a nakaiwagga si angngoran!”
26 Narraddam ingke i patul Herodes, udde gumafu se antu yo netambana so sultera so allangan na bisitanera, ammena inamammayan ino kanggammanna. 27 Siddarat a nanundun i Herodes si tata sundalu a meyadda sikwaneno ulu i Juan. Inang ino sundalu so paffukukan e finugutanna i Juan. 28 Na ulu i Juan e newaggat so angngoran anna nedawawa so sultera anna neyaddana pay so inana. 29 Sin naammuwan na disipulunera iyaw a nedemmu sike Juan, inaranggeno baggina e inappara anna netanamdan.
Namakkan i Jesus si Maturuk Limarifu a Tolay
30 Sin nuliyeno apostol ira sike Jesus, netundura sikwana amminan a inangwara anna netunturura. 31 Gumafu so kaodduna tolay a massidaratang, ammera matabbud a mangngan antu kunna i Jesus so apostolnera, “Umang etam so lugar a awan katole-tolena takesi makaimemmang etam.” 32 Antu nanawera a nakatakay so barangay e inang ira so lugar a ira-ira pelamang. 33 Udde oddu yo nakaita sin nanawera anna nakaammu sikwara. Antu nappala-palan ino tolayera a naggabwat so amminan a lubbu-lubbun e pinalunguwanda i Jesus a dinumatang. 34 Sin ginumaddang i Jesus so dappit, naitaneno odduwengke a tolayera e inallakkannera gumafu se manillera karneru a awan mappastu sikwara anna pinefunannera a tinunturuwan si oddu a kiya-kiyan.
35 Sin massillapin, inang ino disipulunera sikwana e kunda, “Awan a bafalay sitaw e mallammukin. 36 Paanawannuweno tolayera takesi umang ira a maggatang si akkananda so kaaranniyan a lubbu-lubbun anna tarabbunan.”
37 Udde tinabbagngera, “Pakkanan diyawera.”
Kunda sike Jesus, “Umang kami kad a maggatang si tinapay a mabbalor si adwatut a dinaryua se ipakkammi sikwara?”
38 Anna kunna sikwara, “Pigyeno tinapay a ana sikwayu? Umang diyaw itan.”
Sin nakatumpal ira, kunda, “Ana lima a tinapay anna adwa a napindang a busilad.”
39 Antu tinunanna i Jesus ino disipulunera a ammungan ino tolayera a mattuttud so kakaddattan. 40 Antu nattuttud ira si taggi-tatut anna ana pay taggi-limafulu. 41 Inappana i Jesus ino lima a tinapay anna adwa a busilad e nattangaw si langit anna nappabalat sike Dios. Anna ginadwa-gadwaneno tinapay e neyaddana so disipulunera se ibunnera so tolayera. 42 E Nangngan amminan anna nabattug ira. 43 Inammung ino disipuluwera yo nabuna e napannuweno tafulu adwa a kaba si tinapay anna napindang a busilad. 44 Ana limarifu a lallakiyereno nangngan, fuwera kepay yo bafabbayera anna abbing ira.
Nallakad i Jesus so Uttun na Danum
45 Siddarat a tinunduwanna i Jesus ino disipulunera a mattakayera so barangay. Inarangnga sikwara a mapalunguweran so tafik na balanaw paumang so Betsaida sikwana a pinaanawneno tolayera. 46 Akkabalinna a nepakammuweno panawna so tolayera, inang i Jesus so dangutul a maddasal.
47 Sin massillapin, ana yo barangay so tangnga na bebay. Tattatana i Jesus so dangutul. 48 Sin naitana a mapadiyatan ino disipulunera a mattagwan so barangay gumafu so tuyag na leled, maggibbat baggina a inang sikwara a mallaka-lakad so balanaw. Ginagguriyatna a talebaran ira. 49 Udde sin naitara baggina a mallaka-lakad so uttun na danum, nakkallit ira se arigga si banig baggina. 50 Natalawan irengke sin naitara baggina udde siddarat a kunna i Jesus sikwara, “Patuyaggan diyaweno nakam diyaw! Ikkanak iyaw! Amme kayu mattalaw.” 51 Nakitakay baggina sikwara so barangay e nimemmak ino leled. Nalaggat irengke amminan, 52 se maski naitara a nappaoddu i Jesus si tinapayera, ammerengke kurwa maintindiyan ino kanggamma sapitan se mataggat ino urera.
Pinammapiyana i Jesus ino Matakit a Tolayera so Genesaret
53 Sin nakadammang i Jesus anneno disipulunera, inang ira so lubbun na Genesaret e neyanggeno barangera so dappit. 54 Sin dinumassag ira so barangay, siddarat a naimunuwan ino tolayera i Jesus, 55 nabu pinalananda a netundu so katarabbunandera a dumatangin i Jesus. E neyanggeno matakit a tolayera a nakaidda so piddanda nu sintaw a pakadingngagganda a pagyanan i Jesus. 56 Maski nu sintaw a anganna i Jesus, so tarabbunan ira onnu lubbu-lubbun onnu so luga-lugar a aroyu so lubbun, nepaiddareno matakit so merkadowera anna nakigumallak ira sikwana a senggiranda nad lamang yo lelay na tafálna anna amminan inoyera a nanenggid e nammapiya.