Na Pangarig na Gumappulla
13
Sitan keppay a aw, nallawan i Jesus so balay e inang so idag na balanaw na Galilea. 2 Gumafu se odduwengke a tolayera a narimummung so lebutna, inang baggina a nattuttud so tata barangay a nakagaddang so danum sikwara a nagyan ino tolayera so dappit. 3 Anna tinunturuwannera si oddu a pangarig. Kunna,“Maningngag kayu! Ana tata tolay a nappulla si trigu. 4 Sikwana a mappulla-pulla, nadarannag ino korwan a bukal so dalan. Dinumatang ino pappitut ira e inakkanda amminan ino bukal ira. 5 Nadarannag ino korwan a bukal so kabatuwan a kurwa bisang a lubagnga. Nalan a nattalofuweno bukal ira gumafu se ibbafaweno lubag. 6 Udde sin mapatuwengkeno sinag, nangu anna nalelayeno mulera gumafu se ammera kurwa naggamut. 7 Nadarannag ino korwan a bukal so maasit a kadda-kaddat anna naggagarindan ira a nattalofu. Ammera nattalofu si mapiya gumafu se nafuwaddan ira so maasit a kadda-kaddat. 8 Udde nadarannag ino korwan a bukal so malabwak a lubag e nallimubbut anna namungera. Ana yo namunga si tatut, si annam a fulu anneno korwan ira si tallufulu. 9 Seanya sikwayu a maningngag sikwak, nonotanna si mapiya yo sinapitku!”
Na Kanggamma Sapitan ino Pangarig na Gumappulla
10 Akkabalinna, inumaranni sike Jesus ino disipulunera e naffuut ira sikwana, “Saay se mangngarigka so panunturum so tolayera?”
11 Kunna i Jesus sikwara, “Neyadden i Dios sikwayuweno pintindi a maammuwan ino kagakkuruwanna meafu so pattangngalna so tolenera, udde ammena nepakaammu so korwan a tolayera. 12 So tolayera a ana pintindira si sapit i Dios e maindan irana si mas oddu a pintindi, udde so inoyera a awan pintindira maski arigga a maintindiyanda e maawanna keppay sikwara. 13 Nangarigak sikwara gumafu se ‘maita-itara udde ammera ke kurug a maimunuwan, maski madingnga-dingngagga udde ammera ke maintindiyan.’ 14 Na mededemmu sitaw a tolayera e naparulot ino sinapit i Dios meafu sikwara siin nabayagin a tiyempu megafu sike profeta Isaias a nakkun,
‘Maski maddingnga-dingngag ira, ammera ke maintindiyan.
Maski maita-itara, ammera ke kurug a maimunuwan.a
15 Sapitangku iyaw gumafu se madiyat ira a makatunturu.
Ana layagga udde ammera kanggam a maningngag,
ikiddamdeno matara gumafu se ammera kanggam a maammuwan ino gakkurug a mededemmu.
Nu ammera nad iyaw a inangwa, tantaro maintindiyandeno akakwangku,
anna nu gakkurug a maningngag ira,
maintindiyandak si mapiya.
Mabboboliyera e pakomangkuwera.’
16 “Udde mapiya i Dios sikwayu se makaiteno matayu anna makadingngag ino layag diyaw. 17 Gakkurug yo itunduk sikwayu, oddu a profetera anna matunung a tolayera a natolay siin nabayagin a tiyempu a manggam a maiteno naitayu udde ammera naita anna madingngag ino madingnga-dingngag diyaw.”
Na Kanggamma Sapitan ino Pangarig na Gumappulla
18 Nebalinna i Jesus a nakkun, “Dingngaggan diyaweno kanggamma sapitan ino pangarig na gumappulla. 19 Nu yo tata tolay e maningngag si mensahe meafu so pattangngalan i Dios udde ammena ke maintindiyan, meyarig baggina si bukal a nadannag so dalan. Dinumatang i Satanas anna arinna so nakamdereno sapit ira a nadingngagga. 20 Na bukal a nadarannag so kabatuwan a dalan e manilla nu maningngag ino tolayera si sapit i Dios anna siddarat a mangga-anggam ira a nangarasaw sitaw. 21 Udde manillera mula a ammena naggamut si fustu e ammena nabbayag, nalelayera. Kunnapay, nu dumatang ino paddiriyat si akkatolera gumafu si sapit i Dios a naarasora, siddarat a talekkurandeno angngurugga. 22 Na bukal a nadarannag so kaasitan e manilla nu maningngag ino tolayera si sapit i Dios udde gumafu si pakaburungan na akkatolay anna panggamman na talubaggan, nafuwaddan ino sapit i Dios so akkatolera antu ammena namungeno angngurugga. 23 Anneno bukal a nadarannag so malabwak a lubag e kakunna nu maningngag yo tolayera si sapit i Dios e maintindiyanda. Mekunnera so mulera a mamunga si tatut, annam a fulu anneno korwan si tallufulu.”
Na Pangarig Meafu si Kadda-kaddat so Triguwera
24 Nangarig imman i Jesus so tolayera, “Na pattangngalan i Dios e meyarig so tata tolay a nappulla si trigu so umana. 25 Udde kagafiyananna, sikwara a matu-maturug ino tolayera, dinumatang ino kapakwana e nappulla si bukal na kadda-kaddat so nammulan na trigu kapiyena a nanaw. 26 Sin nattalofuweno trigu anna namungera, nattalofu pay yo kadda-kaddat. 27 Inang ino gumasserbiyera so makan-akwa so uma e kunda, ‘Afu, bakkang kad mapiya a bukal ino nepullami so umam? Sintaw naggabwatan ino kadda-kaddat?’ 28 Kunneno makan-akwa so uma, ‘Tata a kapakweno nangwa sitaw.’ Kunda sikwana, ‘Kanggammu a umangmi a siddutan ino kadda-kaddat?’ 29 Udde kunna sikwara, ‘Ammeyu akwan tantaro masiddut diyaw pay maski yo trigu. 30 Purayan diyaw a dumorokkal ira makiyad si panaggagani. Itunduknga so gumagganiyera a palungunda a siddutan ino kadda-kaddat anna babbaddanda tapenu taggabbanda. Akkabalinna, ipaganik sikwareno trigu anna iyekwara so alangku.”
Na Pangarig na Bisang Ingke a Bukal
31 Nangarig imman i Jesus so tolayera, “Na pattangngalan i Dios e kakunna yo bisang ingke a bukal a nemula ino tata tolay so umana. 32 Antuweyaw yo kabisangngan a bukal so amminan a bukal, udde nu mattalofu anna dumokallin, mattabali si kadokallan so amminan a mulera a manilla kayuweno kaatannangnga, e pumukan na pappitut ira yo panga-pangana.”
Na Pangarig na Labadura
33 Nangarig imman i Jesus so tolayera, “Na pattangngalan i Dios e kakunna yo labadura a nelamud ino bafay so tata dokal a palanggana na arina makiyad si inumalsa amminan.”
Na Pangiyusa i Jesus si Pangarig ira
34 Nangiyusa i Jesus si pangarig ira so amminan a panunturuna meafu so pattangngalan i Dios. Ammena nanunturu so tolayera nu bakkan mangiyusa si pangarig. 35 Antu naparulot ino sinapit i Dios so profetera siin nabayagin a tiyempu,
“Mangarigak so tolayera.
Itunduk sikwareno ammena kepay nebalaggaw mamefu sin naparatu yo talubaggan.”b
Na Kanggamma Sapitan ino Pangarig meafu si Kadda-kaddat so Triguwera
36 Akkabalinna, inanawanna i Jesus ino tolayera e tinumallung baggina so balay a pigyananna so Capernaum. Inumaranniyeno disipulunera sikwana e kunda, “Itundum sikwami nu nenay kanggamma sapitan ino pangarig meafu si kadda-kaddat a nattalofu so triguwera.”
37 Sinapit i Jesus, “Na nappulla si mapiya a bukal e awan korwan nu bakkan ikkanak a yo Anak na Tolay. 38 Na uma e antu yo talubaggan, anneno mapiya a bukal e yo tolayera a nebilang so tangnga-tangngallan i Dios. Na kadda-kaddat e yo tolayera a nebilang so tangnga-tangngallan na Maral a i Satanas. 39 Na kapakwa a nappulla sikwara e i Satanas a diyablu. Na pagganiyan e antu yo tamfut na talubaggan, anneno gumagganiyera e yo anghel ira. 40 “Kakunna yo siddu-sidduttan anna tagga-taggabban ino kadda-kaddat, kunna keppay yo mededemmu so tamfut na talubaggan. 41 Ikkanak a yo Anak na Tolay e mangidundun si anghelkuwera tapenu arinda so pattangngalangkuweno pakegafuwan na pakaliwatan na korwan ira anneno mangwera si maral. 42 Itappolderana so mafu-afuy a infiyernu, mattangi-tangit anna mangngari-ngaritam irana sinay. 43 Udde yo tolayera a matunung si aggita i Dios, mabbaggaw a manilla sinag so pattangngalan i Amara. Seanya sikwayu a maningngag sikwak, nonotanna si mapiya yo sinapitku!”
Na Pangarig meafu si Nakakokkot a Wara-wara
44 Kunna kepay i Jesus, “Na pattangngalan i Dios e meyarig si wara-wara a nakakokkot so uma. Sin natumpalan iyaweno tata tolay, netawuna keppay iyaw. Mangga-anggam ingke a nuli e nelakuneno amminan a ana sikwana anna ginatangngeno uma.”
Na Pangarig meafu si Perlas
45 Kunna kepay i Jesus, “Na pattangngalan i Dios e meyarig si tata gumallaku a mintu-intufuk si kanginan a perlas ira. 46 Sin nakaintufuk baggina si tata kanginan a perlas, nelakuna amminan a pakkukwanera e ginatangnga inay a perlas.”
Na Pangarig meafu si Angngallut
47 Kunna kepay i Jesus, “Na pattangngalan i Dios e meyarig si tata angngallut a neyassab na misesirera so balanaw e nakagafut ira si naddadaruma a busilad. 48 Sin napannuweno angngallutda, negaddangga so dappit. Akkabalinna, nattuttud ira tapenu isinareno busilad ira so pangiyekwanan ira a damana a maakkan udde yo ammera dama a maakkan e netappolda. 49 Kunna sitan pay yo mededemmu so tamfut na talubaggan. Gumumwangngeno anghel ira sito talubaggan e isinareno maral a tolayera so tolayera a makimoray so dundun ira i Dios. 50 Itappoldaneno maral a tolayera so mafu-afuy a infiyernu, mattangi-tangit anna mangngari-ngaritam irana sinay.”
51 Akkabalinna, finuutna i Jesus ino disipulunera, “Naintindiyan diyaw kad amminan ino sinapitku?”
“On” kunda.
52 Antu kunna i Jesus sikwara, “Kada maporay si katunungan a nakkalakammu meafu si pattangngalan i Dios e meyarig si tata makan-akwa si balay a mangilawan si dadan anna bawu a kaawan a rumentanera.”
Na Pammay sike Jesus so Nazaret
53 Sin nabalinin i Jesus a nangarig, nanaw baggina sinay. 54 Nuli baggina so Nazaret a naddokallanna e inang nanunturu so sinagogara. Nalaggat ino tolayera a naningngag sikwana. E kunda, “Nangappanna sinay a angngammu anna pakapangwa a mangwa si milagruwera? 55 Bakkang kad a anak baggineno tata karpinteru? Bakkang kad i Maria yo inana anna wawwayinera da Santiago, Jose, Simon, anni Judas? 56 Anna taga-sitaw pay yo wawwayinera a bafabbay, bakkang kad? Nangappanna si kunna sitan a angngammu anna pakapangwa a mangwa si milagruwera?” 57 E ammera kanggam baggina a dingngaggan anna kuruwan.