Na Pangarig na Gumappulla
4
Nanunturu imman i Jesus so idag na Balanaw na Galilea. Anna gumafu se odduwengkeno tolayera a narimummung so lebutna, inang a nattuttud so tata barangay a nakagaddang so danum sikwara a nagyan ino tolayera so dappit. 2 Anna tinunturuwannera si oddu a pangarig. Sikwana a manuntu-tunturu, kunna sikwara,3 “Maningngag kayu! Ana tata tolay a nappulla si trigu. 4 Sikwana a mappulla-pulla, nadarannag ino korwan a bukal so dalan. Dinumatang ino pappitut ira e inakkanda amminan ino bukal. 5 Nadarannag ino korwan a bukal so kabatuwan a kurwa bisang a lubagnga. Nalan a nattalofuweno bukal ira gumafu se ibbafaweno lubag. 6 Udde sin mapatuwengkeno sinag, nangu anna nalelayeno mulera gumafu se ammera kurwa naggamut. 7 Nadarannag ino korwan a bukal so maasit a kadda-kaddat anna naggagarindan ira a nattalofu. Ammera nattalofu si mapiya gumafu se nafuwaddan ira so maasit a kadda-kaddat antu ammera namunga. 8 Udde nadarannag ino korwan a bukal so malabwak a lubag e nallimubbut, dinumokal anna namungera. Ana yo namunga si tallufulu, si annam a fulu anneno korwan ira e tatut.”
9 Anna kunna i Jesus, “Seanya sikwayu a maningngag sikwak nonotanna si mapiya yo sinapitku!”
Na Kanggamma Sapitan ino Pangarig na Gumappulla
10 Sin tattatana i Jesus, naffuut sikwaneno korwan a dumaladandannera anneno tafulu adwa a disipulunera meafu so pangarigngera. 11 Kunna i Jesus sikwara, “Neyadden i Dios sikwayuweno pintindi a maammuwan ino kagakkuruwanna meafu so pattangngalna so tolenera a ammena kepay nepakaammu sinoy, udde si korwan nangarigak 12 takesi
‘maski maita-itara,
ammera ke kurug a maimunuwan,
maski maddingnga-dingngag ira,
ammera ke kurug a maintindiyan.
Anna nu naimunuwandeno kedumanna anna nu naintindiyanda,
tantaro muliyerana sike Dios, anna pakomannerana so liwa-liwatda.’a”
Na Kanggamma Sapitan ino Pangarig na Gumappulla
13 Anna kunna i Jesus sikwara, “Ammeyu kad maintindiyan iyaw a pangarig? Kasannayuna antu a maintindiyan amminan a pangarigkuwera? 14 Itunduk sikwayu, yo tolay a nappulla e antu yo mangibalaggaw si sapit i Dios so tolayera. 15 Na bukal a nadarannag so dalan e manilla nu maningngag ino tolayera si sapit i Dios e dinumatang i Satanas anna siddarat a arinna so nakamdereno sapit ira a nadingngagga.
16 “Na bukal a nadarannag so kabatuwan a dalan e manilla nu maningngag ino tolayera si sapit i Dios anna siddarat a mangga-anggam ira a nangarasaw sitaw. 17 Udde manillera mula a ammena naggamut si fustu e ammena nabbayag, nalelayera. Kunnapay, nu dumatang ino paddiriyat si akkatolera gumafu si sapit i Dios a naarasora, siddarat a talekkurandeno angngurugga.
18 “Na bukal a nadarannag so kaasitan e manilla nu maningngag ino tolayera si sapit i Dios, 19 udde gumafu si pakaburungan na akkatolay, kaodduna wara-wara anna panggamman na talubaggan, nafuwaddan ino sapit i Dios so akkatolera antu ammena namungeno angngurugga.
20 “Anneno bukal a nadarannag so malabwak a lubag e kakunna nu maningngag ino tolayera si sapit i Dios e nangurug ira anna namungera si tallufulu, annam a fulu anna tatut.”
Na Pangarig na Tata a Allamparan
21 Nebalinna i Jesus a nakkun, “Nu sigyantam ino allamparan, nenay akwantam sitan? Kallabbantam kad si timba onnu iyekwatam so gukab na piddan onnu itappattam so pappotunan? 22 Kakunna keppay, awan a netawu a ammenana melawan, awan a meyimad a ammenana maammuwan. 23 Seanya sikwayu a maningngag sikwak, nonotanna si mapiya yo sinapitku!”
24 Anna kunna kepay sikwara, “Nonotan diyaw si fustu meafu so ituntu-tunturuk sikwayu. Nu nenay a gukud a meyaddayu antuna pay yo gukud a maarasoyuna anna mas madagganna kepay. 25 So tolayera a ana pintindira si sapit i Dios e maindannera si mas oddu a pintindi, udde so inoyera a awan pintindira maski arigga a maintindiyanda e maawanna keppay sikwara.”
Na Pangarig meafu so Mattalo-talofu a Bukal
26 Kunna pay i Jesus sikwara, “Na pattangngalan i Dios e mekunna si tata tolay a mammula si bukal ira so pammulan. 27 Maturug ino tolay si gafi anna magamya si aw, anneno bukal ira a nemulana e mattalofu anna maddokal udde ammena ammu nu kasannera a dumokal. 28 Na lubag keppay yo mappadokal anna mappabunga so mulera. Mattalofu, maddokal anna maddaweno mulera liyena mabbaggat. 29 Udde nanu mataggattin ino baggatna, siddarat a mayag baggina si tolayera a maggani se tiyempunan a maani.”
Na Pangarig na Bisang Ingke a Bukal
30 Finuutna i Jesus, “Nenay kad kakunna yo pattangngalan i Dios? Anna nenay yo pangiyarigangku sitan? 31 Meyarig iyaw so tata kabisangngan a bukal sito lubag. 32 Udde nu memula anna dumokal e mattabali si kadokallan so amminan a nemulera e dorokkal ingkeno panga-pangana anna pumukan na pappitut ira.”
Na Pangiyusa i Jesus si Pangarig ira
33 Nangarig i Jesus si sapit i Dios so tolayera meantu so pannakadamara a mintindi. 34 Maumid baggina a mangarig sikwara udde itunduna so disipulunera nu nenay a kanggamma sapitan ino pangarig ira nu ira-ira pelamang.
Pinasinaknga i Jesus ino Matuyag a Leled
35 Sitan a aw, sin massillapin, kunna i Jesus so disipulunera, “Maddammang etam so balanaw.” 36 Antu inanawan ino disipuluwera yo tolayera e nakitakayera sike Jesus so barangay a nagyananna. Ana kepay korwan a barangayera a nebulun sikwara. 37 Dengkera a maddamma-dammang so balanaw, nalleled ingke si matuyag e nesayyu-sayyuk ino palung na barangay antu maggi a napannu si danum.
38 Udde nakaturug i Jesus so pampag na barangay a nakafungan. Antu ginamyara baggina e kunda sikwana, “Mestru, ammem kad a maginna a matay etamun?”
39 Ginumumbwat i Jesus e pinassapitanneno leled e kunna so bebay, “Suminakka! Mimemmakka!” Siddarat a nimemmak ino leled anna sinuminak ingkeno balanaw. 40 Kunna sikwara, “Saay se mattalaw kayu? Awan kad angngurug diyaw?”
41 Anna nalaggat irengke e kunda a siggatatan, “Yanya kad iyaw a tolay se maski yo leled anneno palung ira e makimoray so sapitanna?”