I Jesus anneno Tolay a Ana Takitna si Gaddang
8
Sin nabalin a nanunturu i Jesus, dinumolam baggina so dangutul. Odduwengke a tolayera a dinumandan sikwana. 2 Ana yo lalaki sinay a kurwengkeno takitna si gaddang a inumaranni sikwana, nammalitud so allanganna e kunna, “Afu, nu kanggammu, mapammapiyanak.”3 Sinenggidna i Jesus baggina e kunna, “On, kanggammangku. Mammapiyakan.” Siddarat a naawan ino kurwengke takitna si gaddang e nammapiya baggina. 4 Netun i Jesus sikwana, “Ammem iyaw itundu si maski yanya a tolay udde umangka mappaita so pari na Templu takesi sapitannana a nammapiyakan. Antu iyaddam sikwaneno nedundun i Moises a iwallim sike Dios a pakaitan si amminan a nammapiyakan.”
Na Angngurug ino Kapitan na Romano a Sundaluwera
5 Sin inang i Jesus so Capernaum, inumaranniyeno kapitan na Romano a sundaluwera e nakigumallak sikwana. 6 Kunna, “Afu, nakaiddeno imbutku so balay e ammena makaguyu a mapadiyatan ingke.”
7 Kunna i Jesus, “Umangak e pammapiyangkuna baggina.”
8 Udde sinapit ino kapitan, “Ammek mepangngat a mangarasaw sikwam sito balek. Sapitannu lamang a mammapiyen e ammuk a mammapiyaneno imbutku. 9 Se maski ikkanak, ana mammandu sikwak e ana sundaluk ira a iggamku pay a makimoray sikwak anna itunduk so tata, ‘Ingkan,’ e manaw baggina, anna so tata, ‘Kataw,’ e umaranni pay, e nu kungku so imbutku, ‘Akwannu iyaw,’ anna akwan pay yo imbut.”
10 Sin nadingngagnga iyaw i Jesus, nalaggat baggina anna kunna so tolayera a dinumandan sikwana, “Gakkurug yo itunduk sikwayu, awan kepay naitak so Israel a ana kunna sitaw a angngurugnga. 11 Itunduk sikwayu, odduna yo bakkan a Hudyuwera a dumatangnga a maggabwat so naddadaruma a lugar a makiakkanna sike Abraham, Isaac anni Jacob so pattangngalan i Dios. 12 Udde oddu yo Hudyuwera a mesapat so pattangngalan i Dios a metappolna so infiyernu, mattangi-tangit anna mangngari-ngaritam irana sinay.” 13 E kunna i Jesus so kapitan, “Ingkan, se makwana sikwam yo ara-arangngannu meantu so angngurugngu.”
Nammapiyen ino imbut na kapitan sitan keppay a orat.
Pinammapiyana i Jesus ino Oddu a Tolayera
14 Sin inang i Jesus so balay i Pedro, naitaneno katuwanganna a bafay a nakaidda anna makkulikug. 15 Sinenggidna i Jesus ino kamat na bafay e lannat a naawan ino kulikugnga. Akkabalinna, ginumumbwat baggina e inindanna si maakkan.
16 Sin gafiyenin, neyanggeno tolayera sike Jesus ino oddu a naaffunan si demonyuwera. Pinaanawneno demonyuwera si sapitna lamang anna pinammapiyana amminan a matakit ira. 17 Inangwana iyaw takesi maparulot ino sinapitna i Dios megafu sike profeta Isaias, “Pinammapiyana etam so taki-takittam anna ginna-ginnantam.”a
Na Gumaladandan ira i Jesus
18 Sin naitana i Jesus ino odduwengke a tolayera a narimummung sikwana, tinunanneno disipulunera, “Maddammang etam so balanaw.”
19 Inumaranni sikwaneno tata maporay si katunungan e kunna, “Mestru, dumandanak sikwam maski sintaw yo angannu.”
20 Antu sinapitna i Jesus sikwana, “Ana pabbalayan ino simaron a atuwera so abbu-abbut anna pumukan ino pappitut ira, udde ikkanak a yo Anak na Tolay e awan pimemmangan onnu balay a paturuwangku.”
21 Tata so disipulunera yo nakkun sikwana, “Afu, pulinnak abbu se umangku ipetanam i amak.”
22 Udde sinapitna i Jesus sikwana, “Dandanannak, anna inoyera a ammena mangurug sikwak e neyarig so natay a tolayera. Itanamda inoyera a kakunnara.”
Pinasinaknga i Jesus ino Matuyag a Leled
23 Sin nattakay i Jesus so barangay, nebulun ino disipulunera sikwana. 24 Sikwara a maddamma-dammang so balanaw, nalleled ingke si matuyag e nesayyu-sayyuk ino palung na barangay. Udde nakaturug lamang i Jesus. 25 Antu inang ino disipulunera a nangamya sikwana e kunda “Afu, isalakngu etam! Matay etamun!”
26 Kunna i Jesus sikwara, “Saay se mattalaw kayu? Bisang ingkeno angngurug diyaw.” Ginumumbwat baggina e pinassapitanneno leled anneno palung ira e nimemmak ira.
27 Nalaggat ira amminan e kunda, “Yanya kad iyaw a tolay se maski yo leled anneno palung ira e makimoray so sapitanna?”
Pinammapiyana i Jesus ino Lalaki a Naaffunan si Demonyuwera
28 Sin naddammang da Jesus anneno disipulunera so Balanaw na Galilea so lubbun na Gerasene, dinumafung sikwaneno adwa a lallakiyera a naaffunan si demonyuwera a naggabwat so pattanamman ira. Mammuyung irengke nabu awan a mallakad sinay. 29 Lannat a naggirawera, “Ikkeno Anak i Dios, nenay kanggammu a akwan sikwami? Inumangka kad a mappadiyat sikwami liyeno tiyempu na annunutmi?”
30 Ana yo oddu a bafuyera a mangnga-angngan so ammena kurwa aroyu sikwara. 31 Nakigumallak ino demonyuwera sike Jesus, “Nu paanawan dakami, iyannutnu a makatallung kami so bafuyera.”
32 E kunna sikwara, “Manaw kayu!” Antu nallawan ino demonyuwera so adwa a lallakiyera e inumunag ira so bafuyera. Nakkakarantut ino bafuyera so dabbak e nadarannag ira so balanaw e nalimat ira.