Pinammapiyana i Jesus ino Lalaki a Naaffunan si Demonyuwera
5
Naddammang i Jesus anneno disipulunera so Balanaw na Galilea so lubbun na Gerasene. 2 Sin ginumaddang i Jesus so barangay, siddarat a dinumafung sikwaneno tata lalaki a naaffunan si demonyu a naggabwat so pattanamman ira. 3 Nagyan baggina so pattanamman ira. Awan a makapaimemmak sikwana maski kepay nu nakakawad baggina, 4 gumafu se namimpigya a kinawaranda baggina udde kinattangnga anna dinaralna lamang e awan a maggaggad sikwana. 5 Gafi anna aw a ana baggina so pattanamman ira anna so bakulud ira a maggira-girawa anna barya-baryananneno baggina si batuwera.6 Sin naitana i Jesus so ammena kurwa aroyu, nakkarantut baggina anna nallabba so allanganna e naggirawa baggina a nakkun, 7 “Jesus, Anak i Dios a Makapangwengke si amminan, nenay maawagngu sikwak? Itambam so allangan i Dios a ammenaknengke a padiyatan.” 8 Se kunna i Jesus sikwana, “Mallawangka sitaw a tolay, ikka a demonyu!”
9 Antu finuutna i Jesus sikwana, “Nenay ngannu?”
Kunna, “Rinifuweno ngangku, se oddu kami.” 10 Nakigumallak ino demonyuwera sike Jesus se ammenera a paanawan sitan a lubbun.
11 Ana yo oddu a bafuyera a mangnga-angngan so idag na dangutul. 12 Nakigumallak ino demonyuwera sike Jesus e kunda, “Iyannutnu a makatallung kami so bafuyera.” 13 Antu neyannutna i Jesus ino inarangga. Nallawan ino demonyuwera so lalaki e tinumallung ira so bafuyera a mabbilang si maggi adwarifu. Nakkakarantut ino bafuyera so dabbak e nadarannag ira so balanaw e nalimat ira.
14 Nakkakarantut ino gumattaron ira si bafuy e netundura so tolayera so lubbun anna so pallebutan na tarabbunan ira nu nenay yo nedemmu. Antu inang initeno tolayera nu nenay yo nedemmu. 15 Inang ira sike Jesus e naitareno lalaki a nallawanan ino rinifu a demonyuwera. Nakatuttud baggina, nakabarasiyen anna matunungin ino nonotna. Natalawan ino tolayera. 16 Inoyera a nakaita e netundura so tolayera nu nenay yo nedemmu so lalaki a naaffunan si demonyuwera anna so bafuyera. 17 Antu nakigumallak ino tolayera sike Jesus a manaw so lubbunda.
18 Sin mattakayin i Jesus so barangay, nakigumallak sikwaneno tolay a nallawanan ino demonyuwera nu damana a mebulun sike Jesus. 19 Inammayanna i Jesus ino pakigumallaknga e kunna, “Mulikan so familyam anna so kolaknguwera e itundum amminan a inangwa i Afu anna itundum ino allak a nepaitana sikwam.”
20 Nanaweno lalaki e pinefunanna a ibalaggaw so luga-lugar na Decapolis ino amminan a inangwa i Jesus sikwana anna nalaggat ino tolayera so nedemmu.
Nantotolayeno Abbing a Bafay anna Nammapiyeno Bafay
21 Sin naddammang imman i Jesus so balanaw a nakatakay si barangay, pinalebutan baggineno odduwengke a tolayera so dappit. 22 Dinumatang ino afu-afu na sinagoga a minganan si Jairo. Nallabba baggina so takki i Jesus anna nakigumallak sikwana se umang so balena. 23 Anna namimpigya a nakigumallak baggina sike Jesus e kunna, “Gammamatayin yo anakku a abbing a bafay e umangngu nad ipotun yo kamatnu sikwana takesi mammapiyana anna matolena baggina.”
24 Antu nebulun i Jesus sikwana. Oddu a tolayera a dinumandan e nassisinnissik ira sike Jesus.
25 Ana tata bafay so kaodduwan na tolayera a nassalasufri a nappadā si tafulu adwa rawun. 26 Nassufriyengke baggina so takitna. Oddu a gumàuruwera a namureba a nanuffun sikwana e nagastunan amminan a piraknga udde ammena nammapiya imbes tattullot a nammaral ino takitna. 27 Nadingngagnga meafu sike Jesus antu inang baggina so likudna so kaodduwan na tolayera e sinenggidneno tafálna. 28 Kunna si nakamma, “Nu masenggidku nad lamang yo barasina e mammapiyaakun.” 29 Siddarat a nimemmak ino paddāna so assenggidna so lelay na barasina. Naginnana a nammapiyen baggina.
30 Siddarat a naginna i Jesus a yo pakapangwana e nakapammapiya si tolay. Antu tinallangngeno tolayera e finuutnera, “Yanya yo nanenggid so barasik?”
31 Kunneno disipulunera sikwana, “Maitam ino oddu a tolayera a massisinnissik sikwam, udde saay se fuutannu kepay, ‘Yanya yo nanenggid sikwak?’ ”
32 Udde nallanga-langa i Jesus takesi itanna nu yanya yo nanenggid sikwana. 33 Udde naammuwan ino bafay nu nenay yo nedemmu sikwana, nayyayya-yayyak si talona e nallabba so allangan i Jesus. Netunduna sikwaneno kagakkuruwanna. 34 Kunna i Jesus so bafay, “Wayi, yo angngurugnguweno nakapammapiya sikwam. Ammekan maburung se nammapiyakan.”
35 Sikwana kepay a mabi-abid i Jesus, ginumumwang ino korwan a tolayera a naggabwat so balay i Jairo e kunneno tata sikwara, “Natayin yo anakngu. Ammemun a talantanan i Mestru.”
36 Nadingngag i Jesus nu nenay pattataretabbanda udde kunna sike Jairo, “Ammeka mattalaw. Mangurugka lamang.”
37 Antu awan ingke a pinadandanna sikwana nu bakkan i Pedro anneno mawwayi a Santiago anni Juan. 38 Sin dinumatang ira so balay i Jairo, naitana i Jesus ino makkannawakaw a tolayera, mattangi-tangit anna massamba-sambaluwera si madappa. 39 Sin tinumallung i Jesus so balay, kunna sikwara, “Saay se makkannawakaw anna mattatarangit kayu amminan? Amme kayu mattangit se ammena natayeno abbing udde nakaturug lamang baggina.”
40 Kinakatawanda i Jesus se ammura a natayeno abbing. Udde pinalawanna amminan ino tolayera e inayanneno ama anna ina na abbing anna inoyera a nebulun sikwana e tinumallung ira so nagyanan na abbing. 41 Iniggammanna i Jesus ino kamat na abbing a bafay e kunna, “Talita kum!” kanggamma sapitan, “Eteng, gumumbwatka!” 42 Siddarat a ginumumbwat ino abbing e namefuwen a nallakad (Tafulu adweno dawunna). Nalaggat ingke inoyera a nakaita so nedemmu. 43 Nengangngad a tinunandera i Jesus a awan nad a makaammu so nedemmu anna netunduna sikwara a indanda baggina si maakkan.