Pinammapiyana i Jesus ino Paralitiku
9
Antu nattakay i Jesus anneno disipulunera so barangay e naddammang ira so Balanaw na Galilea anna inang ira so Capernaum a nagyananna. 2 Dengke a dinumatang i Jesus, neyang ino korwan a tolayera sikwaneno tata paralitiku a nakaidda so piddanna. Sin naitana i Jesus ino angngurugga, kunna so paralitiku, “Wayi, patuyaggannu yo nakammu se napakomanin ino liwa-liwatnu.”3 Sin nadingngag iyaweno korwan a mapoporay si katunungan e kunda so nakamda, “Massipitta baggina sike Dios a ikunnanana yo baggina ingkepay sike Dios.”
4 Udde ammuna i Jesus ino ginanakamda.Kunna, “Saay se mannonot kayu si maral? 5 Ansa kad mas malan a sapitan, ‘Napakoman ino liwa-liwatnu’ onnu sapitan, ‘Gumumbwatka e mallakadka’? 6 Udde ipaitaknga sikwayu a ikkanak a yo Anak na Tolay e ana pakandamak sito lubag a mamakoma si liwa-liwat.” Kunna so paralitiku, “Itunduk sikwam, gumumbwatka, appannuweno niddannu anna mulikan so balem.”
7 Ginumumbwat ino tolay e inang so balena. 8 Sin naiteno tolayera, nalaggat anna natalawan irengke e dinayora i Dios so neyaddana a kunna sinay a pakandama si tolayera.
Inayanna i Jesus i Mateo
9 Dengke a mallaka-lakad i Jesus sitan a lugar, naitaneno tolay a minganan si Mateo a nakatuttud so lugar nu sintaw yo pappagan si biyenes. Kunna i Jesus sikwana, “Mebulungka sikwak.” Nattaddag i Mateo e dinumandan sikwana.
10 Sin mangnga-angngan da Jesus anneno disipulunera so balay i Mateo, dinumatang ino oddu a gumattuki si biyenes anneno sinaliwat ira e nakiakkan sikwara. 11 Sin naiteno Fariseowera iyaw, kunda so disipulunera, “Saay se makiakkan ino mestruyu so gumattukiyera si biyenes anna so sinaliwat ira?”
12 Udde sin nadingngag i Jesus iyaw, kunna sikwara, “Inoyera a magawa-gawayyan e ammera maawag ino gumàuru udde imbes inoyera a matakit. 13 Kalakammun diyaw si mapiya nu nenay yo kanggamma sapitan ino neturak a sapit i Dios a makkun ‘Mas kaawan sikwak a minaggikallak kayu si kasittoleyu ammat so walliyu sikwak,’a Antu itunduk sikwayu a ammek inang sitaw a ayan ino matunung a tolayera udde yo sinaliwat ira.”
Na Fuut meafu si Angngilin
14 Inumaranniyeno disipuluwera i Juan a Gumabbawtismu sike Jesus e finuutda baggina, “Ikkami anneno Fariseowera e maumid a mangngilin udde saay se ammena mangngilin ino disipulum ira?”
15 Nangarig i Jesus sikwara e kunna, “Damana kad a marraddam ino nakibodera sikwara a bulunda kepay yo lalaki a mangatawa? Ammena ay! Dumatangngeno aw a yo lalaki a mangatawa e meyanawna sikwara anna antuwenayneno tiyempu na angngilinda.”
Meafu so Tunturu i Jesus
16 Nangarig imman i Jesus a nakkun, “Awan a mappit si bawu a sinnun so dadan a barasi. Se nu makwa iyan, kumassan ino bawu a sinnun, agguranneno neyappitanna e tattullot a dumokal ino pissena. 17 E awan pay a mangiyekwa si bawu a binarayan so dadan a gaddang a pangiyekwanan ira, nu kunnana sitan a makwa, battakan ino bawu a binarayan ino pangiyekwanan. Massabbuneno binarayan anna madaralneno pangiyekwanan ira. Udde maawag a meyekweno bawu a binarayan so bawu a gaddang a pangiyekwanan takesi parefu irana a mabbayag.”
Nantotolayeno Abbing a Bafay anna Nammapiyeno Bafay
18 Sikwana a sapi-sapitanna i Jesus iyawera a kiya-kiyan sikwara, dinumatang ino tata afu-afu na Hudyuwera. Nallabba baggina so allanganna e kunna, “Kapapatayeno anakku a bafay e umangngu nad ipotun ino kamatnu sikwana takesi matolena baggina.”
19 Nattaddag i Jesus anna nebulun sikwana kunnapay yo disipulunera.
20 Sikwara a mallaka-lakad, ana tata bafay so kaodduwan na tolayera a nassalasufri a nappadā si tafulu adwa rawun e sinenggidneno lelay na barasi i Jesus. 21 Kunna si nakamma, “Nu masenggidku nad lamang yo barasina e mammapiyaakun.”
22 Sin nallangngi i Jesus, naitaneno bafay e kunna sikwana, “Wayi, patuyaggannuweno nakammu. Na angngurugnguweno nakapammapiya sikwam.” Anna siddarat a nammapiyeno bafay.
23 Sin dinumatang i Jesus so balayeno afu-afu na Hudyuwera, naitaneno gumattokera si fluta anneno oddu a tolayera a makkannawakaw. 24 Kunna, “Mallawang kayu. Ammena natayeno abbing udde nakaturug lamang.” E kinakatawanda i Jesus. 25 Udde pinalawanna amminan ino tolayera. Tinumallung i Jesus e iniggammanneno kamat na abbing e ginumumbwat baggina. 26 Na baga meafu sike Jesus e nassiwarak so interu a kalubbunan.
Pinammapiyana i Jesus ino Adwa a Bulag
27 Dengke a nanaw i Jesus so balayeno bafay, dinumandan sikwaneno adwa a lallakiyera a bulag e naggirawera a nakkun, “Gaka i David,b ikallak dakami!”
28 Sin nakatallung i Jesus so balay, inumaranni sikwaneno adwa a bulag, e kunna i Jesus sikwara, “Mangurug kayu kad a mapammapiya takayu?”
Kunda sikwana, “On, Afu!”
29 Antu sinenggidneno matara e kunna, “Meantu so angngurug diyaw sikwak, makwa iyaw sikwayu.” 30 E makaiteran. Antu nengangngad a tinunanna i Jesus ira a awan nad a makaammu so nedemmu.
31 Udde sin nakaanaw iran, netundureno amminan a inangwana i Jesus sikwara sitan a kalubbunan.
Pinammapiyana i Jesus ino Gumal
32 Kapiyena nanaweno adwa a nammapiya a bulag, neyangga sike Jesus ino gumal gumafu se naaffunan baggina si demonyu. 33 Pinaanawna i Jesus ino demonyu antu nakasapitin ino gumal. Nalaggat ino tolayera e kunda, “Ammetam kepay nakaita si kunna sitaw sito Israel!”
34 Udde kunneno Fariseowera, “Na afu-afu na demonyuwera e antu yo nangadda sikwana si pakapangwa a mappaanaw si demonyuwera.”
Naallakkan i Jesus so Tolayera
35 Naddoyug i Jesus so amminan a luga-lugar a manuntu-tunturu so sinagogarera. Nebalaggoneno Mapiya a Baga meafu so pattangngalan i Dios anna pinammapiyaneno amminan a matakit ira anna inoyera a ana ginna-ginnanda. 36 Sin naitana i Jesus ino oddu a tolayera, inallakkannera se maburung irengke anna awan ingke makwara a kunnangke karneru a awan mappastu sikwara. 37 Antu kunna so disipulunera, “Gakkurug a oddu a tolayera a nakaparan a mangarasaw so tunturu udde bisang lamang yo manuntu-tunturu si sapitkuwera. Manillera a nalutu a bungera a maani udde bisang lamang yo inang a maggani.c 38 Kunnantu, maddasal anna marang kayu sike Afu na aggani a mangidundun si oddu a tolayerad a manunturu si sapitkuwera.”