Pinammapiyana i Jesus ino Paralitiku
2
Sin nuli i Jesus so Capernaum akkabalinna pigya aw, naammuwan ino tolayera a nuliyen baggina so balay a pagyananna. 2 Odduwengke yo narimummung a tolay sinay makiyad a awanin pagyanan ino korwan ira so unag maski so lawan na balay. Nepakaammuna i Jesus sikwareno sapit i Dios. 3 Anna dinumatang ino appat a lallakiyera a nakkit si tata paralitiku. 4 Udde ammera dama a meyaranni sike Jesus gumafu se odduwengke a tolayera. Nunek ira so atapa e inarireno parte na atap so batug i Jesus anna nedolamdeno nakaidda a paralitiku so niddanna. 5 Sin naitana i Jesus ino angngurugga sikwana, kunna so paralitiku, “Wayi, napakomanin yo liwa-liwatnu.”6 Ana yo korwan a mapoporay si katunungan a nakatuttud sinay e kunda so nakamda, 7 “Yanya iyaw a tolay a massipitta sike Dios? I Dios lamang a mamakoma si liwa-liwat.”
8 Udde ammuna i Jesus ino ginanakamda. Kunna sikwara, “Saay se mannonot kayu si kunna sitan? 9 Ansa kad mas malan a sapitan sitaw a paralitiku, ‘Napakomanin ino liwa-liwatnu,’ onnu sapitan, ‘appannuweno niddannu e mallakadka’? 10 Udde ipaitaknga sikwayu a ikkanak a yo Anak na Tolay e ana pakandamak sito lubag a mamakoma si liwa-liwat.” Kunna so paralitiku, 11 “Itunduk sikwam, gumumbwatka, appannuweno niddannu anna mulikan so balem.”
12 Anna nattaddag baggina e siddarat a inakkitneno niddanna anna inanawannera. Nalaggat ira amminan anna dinaya-dayora i Dios e kunda, “Ammetam kepay nakaita si kunna sitaw!”
Inayanna i Jesus i Levi
13 Inang imman i Jesus so idag na Balanaw na Galilea. Anna oddu yo tolayera a narimummung so nagyananna e tinunturuwannera. 14 Dengke a mallaka-lakad i Jesus sinay a lugar, naitana i Levib a anak i Alfeo a nakatuttud so lugar nu sintaw yo pappagan si biyenes anna kunna i Jesus sikwana, “Mebulungka sikwak.” Antu nattaddag i Levi e dinumandan sikwana.
15 Sin mangnga-angngan da Jesus anneno disipulunera so balay i Levi, dinumatang ino oddu a gumattuki si biyenes anneno sinaliwat ira e nakiakkan sikwara se oddu sikwareno dinumandan sikwana. 16 Sin naiteno mapoporay si katunungan a nebilang pay so grupu na Fariseowera a makiakka-akkan i Jesus so sinaliwat ira anna so gumattukiyera si biyenes, kunda so disipulunera, “Saay se makiakkan baggina so gumattukiyera si biyenes anna so sinaliwat ira?”
17 Udde sin nadingngag i Jesus iyaw, kunna sikwara, “Inoyera a magawa-gawayyan e ammera maawag ino gumàuru udde imbes inoyera a matakit. Antu sapitangku sikwayu a ammek inang sitaw a ayan ino matunung a tolayera udde yo sinaliwat ira.”
Na Fuut meafu si Angngilin
18 Namitta aw, mangngili-ngilin ino disipuluwera i Juan a Gumabbawtismu anneno Fariseowera. Inang ino korwan a tolayera e kunda sike Jesus, “Mangngilin ino disipuluwera i Juan a Gumabbawtismu anneno disipuluwera na Fariseowera udde saay se ammena mangngilin ino disipulum ira?”
19 Nangarig i Jesus sikwara e kunna, “Damana kad a mangngilin ino nakibodera sikwara a bulunda kepay yo lalaki a mangatawa? Ammena ay! 20 Dumatangngeno aw a yo lalaki a mangatawa e meyanawna sikwara anna antuwenayneno tiyempu na angngilinda.”
Meafu so Tunturu i Jesus
21 Nangarig imman i Jesus a nakkun, “Awan a mappit si bawu a sinnun so dadan a barasi. Se nu makwa iyan, kumassan ino bawu a sinnun, agguranneno neyappitanna e tattullot a dumokal ino pissena. 22 E awan pay a mangiyekwa si bawu a binarayan so dadan a gaddang a pangiyekwanan ira, nu kunna sitan a makwa, battakan ino bawu a binarayan ino pangiyekwanan. Massabbuneno binarayan anna madaralneno pangiyekwanan ira. Maawag a meyekweno bawu a binarayan so bawu gaddang a pangiyekwanan.”
Na Fuut meafu so Aw na Aggimemmang
23 Namitta so Aw na Aggimemmang, sikwana a mattale-talebad i Jesus anneno disipulunera so uma a namulan si trigu. Dengkera a mallaka-lakad, pinefunan ino disipuluwera i Jesus a narruddut si ungkay na trigu. 24 Ana pay yo korwan a Fariseowera sinay. Naitara nu nenay akakwan ino disipuluwera i Jesus e tata sikwara a nakkun, “Itannu, saay kad se akakwandeno ammena meyannut so Aw na Aggimemmang?”
25 E kunna i Jesus sikwara, “Ammeyu kad nabibbid yo inangwa i David anneno bulunnera sin nabisinan ira anna kaawandeno maakkan? 26 Tinumallung i David so balay i Diosc e nangngan si tinapay a newalli sike Dios. Inindanna pay yo bulunnera. Nedemmu iyaw sin i Abiatar ino katannangan a pari. Meantu so katunungan, pariyera lamang yo meyannut a mangngan sitan a tinapay.”