Na Mapiya a Baga Meantu Sike
Markus
Netundu i Juan a Gumabbawtismu a i Jesus ino Mesiya
1
Antuweyaw yo Mapiya a Baga meafu sike Jesu Kristo, yo Anak i Dios. 2 Dengke so pefuna iyaw a baga, antu yo kaparulotan ino neturak i profeta Isaias a sinapit i Dios so Anaknga,“Dingngaggannu, palunguk a idundun ino gumabbanduk,
a mangiparanna so paddatangngu.a
3 Ana a maggira-girawa so tolayera
a mattale-talebad so kulolawat a nakkun,
‘Iparan diyaweno baggiyu so paddatang i Afu
kakunna yo pattunung so dalan para so kaawan a tolay.’ ”b
4 E ana i Juan a Gumabbawtismu so kulolawat. Nebalaggona so tolayera a mattale-talebad a mabboboliyera anna mappabawtismuwera takesi pakomanna i Dios ino liwatdera. 5 Odduwengke tolayera a inang naningngag sikwana a naggabwat so Jerusalem anna so kalubbunan na Judea. Nepakolira sike Dios amminan a liwa-liwatda so allangan na tolayera antu binawtismuwan ira i Juan so māt na Jordan.
6 Nabbarasi si duddut na kamelyu i Juan anneno gayakatna e naangwa si gaddang na aggayam. Durun anna diyuweno akka-akkananna. 7 Nebalaggona i Juan so tolayera a nakkun, “Ana tata dumatang a makapangwengke ammat sikwak. Ammek mepangngat a maddomak anna manguttar so siggut na sandalyatna a kakunna yo akwan ino tata gumasserbi so amuna. 8 Bawtismuwan takayu si danum a mangipaita a nabboboli kayu so liwa-liwat diyawera, udde sikwana, bawtismuwannana kayu si Espiritu i Dios.”
Na Akkabawtismu i Jesus
9 Sitan a tiyempu sin mabbawti-bawtismu i Juan so tolayera, dinumatang i Jesus a naggabwat so Nazaret na Galilea e binawtismuwan i Juan baggina so māt na Jordan. 10 Anna sin nakagaddangin i Jesus so danum, naitana a nabbukkat ino langit anneno Espiritu i Dios e dumassa-dassag a nafforma a tata guruk anna inumaffun sikwana. 11 Ana ngaral a naggabwat si langit a nakkun, “Ikkeno anakku a iddu-iddukangku, pakaanggamman takangke.”
Na Akkekakkap i Jesus
12 Siddarat a negiyana i Espiritu i Dios i Jesus so kulolawat. 13 Ana i Jesus sinay si appat a fulu aw e kinakkap i Satanas baggina. Ana pay sinayeno simaron a aggayam ira anna inang ino anghel ira a nanuffun sikwana.
Na Pamefu i Jesus a Manunturu so Galilea
14 So akkefukuk i Juan a Gumabbawtismu, nuli i Jesus so Galilea e nebalaggoneno Mapiya a Baga a naggabwat sike Dios. 15 Anna antuwengke iyaweno ituntu-tunturu i Jesus so tolayera, “Dinumatangin ino fustu a tiyempu. Aranniyen a gumumwang ino pattangngalan i Dios so tolenera. Mabboboli kayu si amminan a liwat diyawera anna mangurug kayu so Mapiya a Baga meafu sike Afutam a Jesu Kristo.”
Nappili i Jesus si Palungu a Disipulunera
16 Dengkena a mallaka-lakad i Jesus so idag na Balanaw na Galilea, naitaneno mawwayi a Simon anni Andres. Mangiyassa-assab ira si angngallutda so balanaw se misesirera. 17 Anna kunna i Jesus sikwara, “Dandanandak anna ammungan diyawneno tolayera a mangurugngera sikwak.” 18 Siddarat a inanawandeno angngallutdera e dinumandan ira sikwana.
19 Dengkera a nakaaroyu si bisang, naitana i Jesus da Santiago anni Juan a anak ira i Zebedeo. Anera so barangera a mappi-appit si angngallutdera. 20 Siddarat a inayandera i Jesus anna dinumandan ira sikwana e nebattangga i Zebedeo a amara so barangay bulunneno natandanan a tolayera.
Na Lalaki a Naaffunan si Demonyu
21 Antu inang i Jesus anneno disipulunera so Capernaum. So Aw na Aggimemmang, inang i Jesus so sinagoga anna nanunturu. 22 Inoyera a naningngag sikwana e nalaggat so annunturuna, se tinunturuwannera a ana pakandamana anna bakkan a kakunna yo mapoporay si katunungan na Hudyuwera.
23 Sin manunturu baggina sitan a tiyempu, tinumallung ino tata lalaki a naaffunan si demonyu so sinagoga. 24 E naggirawa baggina a nakkun, “Anawan dakami! Jesus a Nazareno, ammeka mammolestiya sikwami. Inumangka kad a manaral sikwami? Ammu taka. Ikkeno Dinundun i Dios.”
25 Udde pinassapitanna i Jesus baggina e kunna so demonyu, “Suminakka, anawannu baggina!” 26 Pinabbanilaw na demonyu iyan a lalaki anna naggirawa si madappa antu nallawan baggina sikwana.
27 Nalaggat ira amminan so naitara e kunda si siggatatan, “Nerayaw? Tata bawu a panunturu? Ana sikwaneno pakandama anna pakapangwa a manundun so demonyuwera a mallawan so tolay e makimorayera sikwana.” 28 Antu yo baga meafu sike Jesus e siddarat a nassiwarak so lubbu-lubbun na Galilea.
Pinammapiyana i Jesus ino Oddu a Tolayera
29 Kapiyera a nallawan da Jesus so sinagoga, tinumallung ira so balera Simon anni Andres. Bulunna i Santiago anni Juan. 30 Nakaidda a makkulikug ino bafay a katuwangan i Simon. Siddarat a netundura sike Jesus meafu sikwana. 31 Inumaranni i Jesus sikwana e iniggammanneno kamatna anna dinuffunanna a gumumbwat. Antu naawan ino kulikugnga e inindannera si maakkan.
32 Maggafiyen sin tinumallap ino sinag nu sintaw a yo Aw na Aggimemmang e nabalinin, neyang ino tolayera sike Jesus amminan a matakit ira anneno naaffunan si demonyuwera. 33 Anna nammu-ammung ino odduwengke a tolayera sinay a lugar so lawan na balay a nagyanan i Jesus. 34 Odduwengke a pinammapiyana a matakit ira a ana naddadaruma a takitna anna pinaanawneno oddu a demonyuwera udde ammena nepabulun a mabid ino demonyuwera gumafu se ammura baggina.
Nanundu i Jesus so Galilea
35 Kadaddaramatanna si maggibbat, ginumumbwat i Jesus e inang so lugar a awan katole-tolena e tattatana a naddasal sinay. 36 Inintu-intufuk i Simon anneno bulunnera i Jesus. 37 Sin naintufukanda baggina, kunda sikwana, “Intu-intufukan dakeno tolayera.”
38 Tinumabbag baggina, “Umang etam so makkakarebbing a lubbun ira takesi manunturuwaknga pay si Mapiya a Baga meafu so pattangngalna i Dios so tolenera, se antuweyaw yo nangidundunan i Dios sikwak.” 39 Naddoyug i Jesus so amminan a luga-lugar na Galilea a manuntu-tunturu si mensahe so pattangngalna i Dios so tolenera so sinagogarera anna nappaanaw si demonyuwera.
I Jesus anneno Tolay a Ana Takitna si Gaddang
40 Namitta aw, ana lalaki a inang sike Jesus a kurwengkeno takitna si gaddang, nakigumallak anna nammalitud so allanganna e kunna, “Afu, nu kanggammu, mapammapiyanak.”
41 Naallakkan i Jesus so lalaki anna sinenggidna baggina e kunna, “On, kanggammangku. Mammapiyakan!” 42 Siddarat a naawan ino kurwengke takitna si gaddang e nammapiya baggina. 43 Nengangngad a pinalanánna i Jesus ino tolay liyena a pinaanaw baggina. 44 “Ammem iyaw itundu si maski yanya a tolay udde ingka mappaita so pari na Templu takesi sapitannana a nammapiyakan. Antu iyaddam sikwaneno nedundun i Moises a iwallim sike Dios a pakaitan na amminan a nammapiyakan.”
45 Udde sin nanaweno lalaki, nebalaggona so tolayera nu nenay yo nedemmu sikwana. Nabu, ammenan makaang i Jesus so luga-lugar nu sintaw a maita baggineno oddu a tolayera antu nagyan so tarabbunan a bisang yo tolayera a migigyan. Udde oddu kepay yo tolayera a uma-umang sikwana a naggabwat so naddadaruma a lubbun.