Na Mapiya A Baga Meantu Sike
Juan
Na Sapit Nattabali si Tolay
1
Liyena a naparatu yo lubag, anen ino Sapit. Na Sapit e bulun i Dios anneno Sapit e i Dios. 2 Sin pefuna bulunnan i Dios. 3 Naparatu amminan megafu sikwana e awan ingke nad naparatu nu bakkan a megafu sikwana. 4 Naggabwat sikwaneno angat si amminan a naparatu anneno angatna e kakunna yo sirwat a mapabaggawan ino nakam na tolayera. 5 Mabbaggaweno sirwat so kalammukan e yo kalammukan ammena maaddap ino sirwat.6 Ana tata lalaki a minganan si Juan a dinundun i Dios. 7 Inang baggina a mangipakaammu so tolayera patamu si sirwat takesi amminan nad e mangurug si sirwat. 8 Bakkan i Juan ino sirwat udde inang baggina a mangipakaammu so tolayera meafu si sirwat. 9 Na gakkurug a sirwat a mabbaggaw so nakam ino amminan a tolayera e umang so talubaggan.
10 Dinumatang ino Sapit sito talubaggan. Maski nu pinaratu i Dios yo talubaggan megafu sikwana, ammena naimunuwan ino tolayera nu yanya baggina. 11 Inang so lubbunna udde inammayanda baggina. 12 Udde seanya yo nangarasaw anna nangurug sikwana, inangwana a damana para sikwara a mattabali si anak ira i Dios. 13 Nattabaliyera a anak i Dios, bakkan so naggabwatanda a gakara onnu yo nakam na matawa udde megafu so uray i Dios.
14 Na Sapit e nattabali si tolay anna nakipanolay sikwami e naitamiyeno gakkurug a kadayawanna dengkeno mittata anak i Ama. Maumid a mapiya baggina anna ipakaammuna amminan a kagakkuruwan meafu sike Dios.
15 Nassapit i Juan meafu sikwana so tolayera e naggirawa a nakkun, “Baggineno itundu-tunduk sikwayu sinoy sin sinapitku, ‘Na dumatang a metufad sikwak e mas kaawan ammat sikwak gumafu se anen baggina sinay siin liyek kepay a neyanak.’ ” 16 Gumafu si idduknga a awan pakiyaranna, mapurebantam ino mallifiyengke a simpat i Dios. 17 Na katunungan i Dios e neyadda megafu sike Moises udde nepaitana i Jesu Kristo ino simpat i Dios anneno kagakkuruwan meafu sikwana. 18 Awan kepay a nakaita sike Dios. Na mittata Anak e baggineno nangipaita sikwatam nu yanya yo keyarigan i Dios. Madikkat ingke baggina sike Ama. Baggina ingkepay i Dios.
Netundu i Juan a Gumabbawtismu a i Jesus ino Mesiya
19 Nangidundun ino afu-afuwera na Hudyuwera si pariyera anna Levitera a naggabwat so Jerusalem takesi fuutandana sike Juan nu yanya baggina. 20 Ammena inambafag i Juan ino kagakkuruwanna e kunna, “Bakkanak ino Mesiya.”
21 Anna finuutda baggina. “Yanyaka kad antu? Ikka kad i Elias?”
Kunna, “Bakkanak.”
Kunda, “Ikka kad yo korwan a profeta a netamba i Dios a medundun?”
Tinumabbag baggina, “Bakkan.”
22 Antu kunda sikwana, “Yanyaka kad antu? Itundum antu sikwami takesi ana masapitmi so inoyera a nanundun sikwami. Nenay masapitnu meafu sikwam?”
23 Netundu i Juan sikwara nu nenay yo sinapit i profeta Isaias,
“Ikkanak ino maggira-girawa so tolayera
a mattale-talebad so kulolawat a nakkun,
‘Iparan diyaweno baggiyu so paddatang i Afu
kakunna yo pattunung so dalan para so kaawan a tolay.’ ”a
24 Na korwan ira a maffuut sike Juan e dinundun ino Fariseowera. 25 Finuutda baggina, “Saay se mabbawtismuka nu bakkangkeno Mesiya, onnu Elias onnu yo korwan a profeta?”
26 Tinabbag i Juan ira, “Bawtismuwangku si danum ino tolayera a mangipaita a nabboboliyera so liwa-liwatda udde ana tata sikwayu sitaw a ammeyu ammu, 27 na metufad sikwak, ammek mepangngat a manguttar so siggut ira na sandalyatna a kakunna yo akwan ino tata gumasserbi so amuna.” 28 Nedemmu iyaw so Betania so dammang na māt na Jordan a pabbawtismuwan i Juan.
Na Ubbun a Karneru i Dios
29 So metufad a aw, naita i Juan a Gumabbawtismu i Jesus a umara-aranni sikwana e kunna, “Antuweyaw yo ubbun a karneru i Dios a mangari si liwa-liwat na tolayera. 30 Baggineno itundu-tunduk sin sinapitku, ‘Na metufad sikwak e mas kaawan ammat sikwak gumafu se anen baggina liyek a neyanak.’ 31 Ammek naimunuwan baggina a Mesiya. Udde inangngak a bawtismuwan ino tolayera si danum takesi maammuwan ino taga-Israel ira a baggineno Mesiya a dinundun i Dios.”
32 Kunna i Juan, “Naitak ino Espiritu i Dios e dumassa-dassag a naggabwat si langit a nafforma a tata guruk anna inumaffun sikwana. 33 Ikkanak mismu ammek naimunuwan baggina, udde i Dios a nanundun sikwak a mabbawtismu so tolayera si danum e sinapitna sikwak, ‘Yanya yo maitam a dassan anna affunan na Espirituk, baggineno mabbawtismu si Espirituk.’ 34 Naitak e taddangku a baggineno Anak i Dios.”
Na Appat a Palungu a Disipuluwera i Jesus
35 So metufad a aw, mattadda-taddag imman i Juan a Gumabbawtismu bulunneno adwa a disipulunera so māt na Jordan. 36 Naitana i Jesus a nattalebad e kunna, “Itan diyaw, ana sitaweno ubbun a karneru i Dios!”
37 Nadingngag ino adwa disipuluwera baggina a nassapit e dinumandan ira sike Jesus. 38 Sin nallangngi i Jesus, naitanera a tumuntufad sikwana, finuutnera, “Nenay kanggam diyaw?”
Kunda, “Rabbi, sintaw pagyanannu?” (Na kanggamma sapitan ino Rabbi e Mestru.)
39 Kunna sikwara, “Kayutaw e maitayu.” Antu dinumandan ira sikwana. Naitareno lugar a pagyananna e nakiigyan ira sikwana sitan a aw. Ma-alas kwatruwen si fuwab sinoy.
40 I Andres a wayi i Simon Pedro e tata sikwara a naningngag so sinapit i Juan anna dinumandan sike Jesus. 41 Pinalungu abbu i Andres a nintufuk sike Simon e kunna sikwana, “Naitamiyeno Mesiya.” (Kanggamma sapitan e Kristo.) 42 Neyangnga i Andres i Simon sike Jesus.
Initana i Jesus i Simon e kunna, “Ikka i Simon a anak i Juan. Minganangkana si Cefas” (a nesalin a Pedrob).
Inayanna i Jesus da Felipe anni Natanael
43 So metufad a aw, kanggamma i Jesus a umang so Galilea. So dalan, nadafungnga i Felipe e kunna sikwana, “Dandanannak.” 44 Taga-Betsaida i Felipe a kalubbunanda Andres anni Pedro.
45 Naitana i Felipe i Natanael e kunna sikwana, “Naitamiyeno tolay a neturak i Moises so libru na katunungan e kunnapay yo neturak ino profetera. Baggina i Jesus, na anak i Jose a taga-Nazaret.”
46 Kunna i Natanael sikwana, “Ana kad mapiya a maggabwat si Nazaret?”
Kunna i Felipe sikwana, “Kataw e maitam.”
47 Sin naitana i Jesus i Natanael a umaranni sikwana, kunna, “Antuweyaw yo gakkurug a Israelita a awan ingke naillokuna.”
48 Finuut i Natanael, “Nangammuwannu sikwak?”
Tinumabbag i Jesus, “Naita taka so passiyongan ino kayu a igos liyena inayan naka i Felipe.”
49 Netabbag i Natanael, “Rabbi, ikkeno Anak i Dios! Ikkeno Patul na Israel!”
50 Kunna i Jesus, “Mangurugka kad gumafu se sinapitku a naita taka so passiyongan ino kayu a igos? Makaitakana si mas oddu a kakkapallat a mededemmu ammat sitawera.” 51 Kunna i Jesus sikwara, “Gakkurug yo itunduk sikwayu, maitayuneno langit a mabbukkat anneno anghel ira i Dios a tumullu-tullu anna dumassa-dassag sikwak yo Anak na Tolay.”