Na Paboda so Cana
2
Nappasa si adwa aw, ana paboda so Cana so lubbun na Galilea. Ana sinayeno ina i Jesus. 2 Naimbitan pay i Jesus anneno disipulunera so paboda. 3 Sin natamfutin ino naiserbi a binarayan, kunna i inana i Jesus sikwana, “Awanin a binarayan.”4 E kunna i Jesus sikwana, “Ina, saay se sapitannu iyaw sikwak? Bakkan kepay iyaweno fustu a tiyempu a mappaita si pakapangwak.”
5 Kunna i inana so gumasserbiyera, “Akwan diyaw maski sanneno ipaangwana sikwayu.”
6 Sitoye, ana annam a dorokkal a buwod ira a damana mapannuwan si adwafulu makiyad si tallufulu a galon kada tata. Usan yo Hudyuwera ino danum a pallinis a kaawan so relihiyonda. 7 Kunna i Jesus so gumasserbiyera, “Pannun diyaweno buwod ira si danum.” E pinannura amminan ino buwod si danum. 8 Kunna sikwara, “Mangappa kayu si bisang anna iyang diyaw so makammu so paboda.” Inayeno inangwara. 9 Sin tinantaman ino katalak ino danum a nattabali si binarayan anna ammena ammu nu sintaw naggabwatanna (udde ammuweno gumasserbiyera a nattab si danum), inayan ino katalak ino lalaki a mangatawa 10 e kunna sikwana, “Maiserbi abbuweno mammit a binarayan e nanu nabukin ino bisitera, maiserbiyeno ammena kurwa mammit a binarayan. Udde pinauddiyu a nelawan ino mammit a binarayan.”
11 Inayeno inangwa i Jesus so Cana, tata lubbun na Galilea. Antu yo palungu a milagru a inangwana a nangipaita si kadayawanna anna nangurug ino disipulunera sikwana.
12 Akkabalinna iyaw, inang i Jesus anni inana, ino wawwayinera a lallaki anneno disipulunera so Capernaum. Nagyan ira sinay si pigya aw.
Pinatamangnga i Jesus ino Gumallakuwera a Ana so Templu
13 Aranniyen ino Fiyesta na Attalebad na Hudyuwera e inang i Jesus so Jerusalem. 14 Naitaneno tolayera so lawan na Templu a mallaku-laku si baka, karneru, guruk ira anneno gumattaliyera si pirak a nakatuttud so lamesarera. 15 Nangwa i Jesus si pamesi a siggut e nepaanawneno gumallakuwera a ana so Templu maski yo karneruwera anna bakera. Newarakngeno pirak na gumattaliyera si pirak anna binakolluneno lamesarera. 16 Sinapitna so gumallakuwera si guruk, “Ilawan diyaw iyawera sitaw! Ammeyu akwan si merkado yo balay i Amak!”
17 Nadandam ino disipuluwera i Jesus nu nenay yo neturak so sapit i Dios a makkun, “Afu Dios, yo angngikalok so balem antu yo katayangkua.”
18 Finuutneno tata so afu-afuwera na Hudyuwera baggina, “Nenay a milagru a maangwam tapenu mepaitam a ana pakandamam a maggabwat sike Dios a mappaanaw so gumallakuwera?”
19 Tinabbagngera i Jesus, “Darallan diyaw iyaw a templu e pataddaggangkuna keppay si tallu aw.”
20 Kunneno afu-afu, “Nenay? Napataddag iyaw a Templu si appat a fulu anna annam a dawun e damam kad a pataddaggan lamang si tallu aw?” 21 Udde yo Templu a sinapitna i Jesus e antu yo baggina ingkepay. 22 Antu sin nantotolay i Jesus so akkapatena, nadandam ino disipulunera a sinapitna iyaw e nangurug ira so neturak a sapit i Dios anneno sinapit i Jesus.
23 Sin ana i Jesus so Jerusalem so Fiyesta na Attalebad, oddu yo nangurug sikwana se naitareno milagruwera a akakwanna. 24 Udde ammena netalak i Jesus ino baggina sikwara, gumafu se ammuna amminan ino ginanakam na tolayera. 25 Ammenan maawag a ana mangitundu sikwana meafu so tolayera se ammunan ino ana so nonotdera.