I Jesus anni Nicodemus
3
Ana tata Fariseo a minganan si Nicodemus, tata so afu-afuwera na Hudyuwera. 2 Inang i Nicodemus sike Jesus si gafina e kunna, “Rabbi, ammumi a i Dios ino nanundun sikwam a manunturu sikwami, se awan damana a makaangwa sitawera a pemunuwan a akakwannu nu awan i Dios sikwam.”3 Tinabbagnga i Jesus baggina, “Gakkurug yo itunduk sikwam, awan a tolay a mesapat so pattangngalan i Dios nu ammena meyanak imman.”
4 Kunna i Nicodemus sikwana, “Kasanna kad a meyanak imman ino tolay a manakammin? Damana kad a muli so kuyung na inana tapenu meyanak imman?”
5 Kunna i Jesus sikwana, “Gakkurug ingkeno sapitangku sikwam, awan a mesapat so pattangngalan i Dios nu ammena meyanak si danum anna si Espiritu i Dios. 6 Se yo meyanak ino tolay, antu yo anak inay a tolay. Udde yo meyanak si Espiritu i Dios antu yo anak i Dios. 7 Ammeka malaggat a sinapitku iyaw sikwam, ‘Meyanak kayu imman.’ 8 Gangngaryan, kakunna yo leled, malleled so kanggamma a palleleran anna madingngagnguweno unina udde ammem ammuweno naggabwatanna onnu sintaw yo anganna. Si kakunna keppay, ammem maintindiyan nu kasannana a meyanak ino tolay megafu si Espiritu i Dios.”
9 Kunna i Nicodemus sikwana, “Kasanna a medemmu iyawera?”
10 Tinabbagnga i Jesus baggina, “Mestruka kepay sito Israel, gampamade ammem maintindiyan iyawera. 11 Gakkurug yo itunduk sikwam. Sapitammiyeno ammumi anna taddammiyeno naitami udde ammeyu ke kuruwan ino sapitammi. 12 Nu ammeyu kuruwan ino netunduk sikwayu meafu so mededemmu sito lubag, kasannayu a kuruwan nu ana sapitangku sikwayu meafu si langit? 13 Awan a nakaumang si langit nu bakkan Ikkanak a yo Anak na Tolay a dinumassag a naggabwat si langit. 14 Nu nenay yo medemmuna sikwak e kakunnana yo nedemmu sin neyekwa i Moises ino tansu a iraw so poste a kayu so kulolawat.a Se ikkanak a yo Anak na Tolay e maawag a mepatak so kurut anna matay. 15 Seanya yo mangurug sikwak e matolena a bulun i Dios amu-amu.”
16 Gumafu se inidduk ingke i Dios ino tolayera sito talubaggan, neyaddaneno mittata Anaknga a matay takesi amminan a mangurug so Anaknga e ammenana mesina sike Dios udde matolena a bulunna amu-amu. 17 Se ammenak dinundun i Dios a Anaknga sito talubaggan a mannunut so tolayera a makastigu udde tapenu matabbut ira megafu sikwak. 18 Inoyera a mangurug sikwak e ammera manunut a makastigu udde inoyera a amme mangurug e nanunutin a makastigu gumafu se ammera nangurug sikwak a mittata Anak i Dios. 19 Antuweyaw yo gafuna so pannunut sikwara, inang sito talubaggan ino sirwat udde kinanggamman ino tolayera yo kalammukan ammat so sirwat gumafu se maral ino taddarera. 20 Se amminan a mangwa si maral kalussoreno sirwat e ammera kanggam a umaranni so sirwat takesi ammena maiteno maral a taddera. 21 Udde yo tolayera a mangwa si gakkurug e umaranni so sirwat a mangipaita a yo taddarera e pakimoray sike Dios.
I Jesus anni Juan a Gumabbawtismu
22 Akkabalinna iyaw, inang da Jesus anneno disipulunera so talubbunan na Judea e nagyan ira sinay anna nabbawtismuwera so tolayera. 23 Mabbawti-bawtismu pay i Juan so Aenon a aranni so Salim se oddu a danum sinay. Maddadarandan ino tolayera a umang sikwana e nappabawtismuwera. 24 Ammena kepay nefukuk i Juan sinoy.
25 Nakitinnulyat ino disipuluwera i Juan so tata Hudyu patamu so gagangera nu kasanna a mebilang a malinis. 26 Inang ino disipuluwera i Juan sikwana e kunda “Rabbi, ino bulun diyaw so tafik na māt na Jordan a sapi-sapitan diyaw e mabbawti-bawtismu pay sitaw anna uma-umang sikwaneno tolayera.”
27 Tinumabbag i Juan, “Awan a tolay a makaarasaw si maski sanna nu bakkan a uray i Dios. 28 Nadingngag diyawin ino sinapitku a bakkanak ino Mesiya udde dinundundak a mapalungu sikwana takesi iparangkuneno tolayera so paggumwangnga. 29 Gangngaryan, so tata paboda, ino bafay a makiatawa e para lamang so mangatawa sikwana. Na kolak ino mangatawa, a nakataddag a minda-indag anna maningngag sikwana, mammalamuwang ingke so ngaralna. Kunna keppay, ikkanak, a kakunna yo kolak na mangatawa, a mangiparan so paddatang i Mesiya e mammalamuwang ingke. 30 Maawag a mas kaawan baggina anna ikkanak e maawag a ammena kurwa kaawan.
I Jesus ino Naggabwat si Langit
31 “Na naggabwat si langit e kaatannangan si amminan, yo naggabwat sito lubag e taga-lubag anna massapit si mededemmuwera sito lubag. Na naggabwat si langit e kaatannangan si amminan. 32 Nepakaammuneno naitana anna nadingngagnga udde awan a nangurug so sinapitna. 33 Udde yo mangurug so sinapitna, taddanna a nu nenay yo sinapit i Dios e gakkurug. 34 Se yo dinundun i Dios awan a sapitanna nu bakkan ino sapit i Dios se neyaddana i Dios sikwaneno amminan a pakapangwa na Espirituna. 35 Iddukanna i Ama ino Anaknga anna neyaddana sikwaneno pakandama si amminan. 36 Seanya yo mangurug sikwak, yo Anak i Dios e matolena a bulun i Dios amu-amu udde seanya yo ammena makimoray sikwak e ammena mapureban iyan a akkatolay udde imbes ibali-balinna i Dios a makkastigu sikwana.”