I Jesus Anneno Bafay A Taga-Samaria
4
Sin naammuwanna i Jesus a nadingngag ino Fariseowereno baga a akakwanna anna oddu yo dumaladandan a bawti-bawtismuwanna ammat sike Juan, 2 udde yo kagakkuruwanna bakkan i Jesus ino nabbawtismu nu bakkan ino disipulunera. 3 Sin naammuwan i Jesus anneno disipulunera meafu sitaw, nanawera so Judea e nuliyera so Galilea. 4 Maawag a talebarandeno Samaria.5 E dinumatang ira so Sicar, tata lubbun na Samaria a aranni so lubag a neyaddana i Jacob sike Jose a anaknga siin nabayagin a tiyempu. 6 Ana yo bufun i Jacob sinay. Gumafu se mattangnganawin anna napakelin i Jesus so paddoyugnga, nattuttud baggina so idag na bufun takesi mimemmang. 7 Ammena nabbayag, dinumatang ino tata bafay a taga-Samaria a umang mattab so bufun. Kunna i Jesus sikwana, “Makiinumak ay.” 8 Inang ino disipuluwera i Jesus so lubbun a maggatang si maakkan.
9 Kunneno bafay sikwana, “Saay kad a makiinumka sikwak e Hudyuka anna tataak a Samaritana?” Ammena gagangayeno Hudyuwera a makilamu-lamu so Samaritanuwera.
10 Tinabbagnga i Jesus baggina, “Nu ammum nad lamang nu nenay yo meyadda i Dios anna yanyaak a marang sikwam si inuman, ikka nad yo marang sikwak e indan takana si danum a makapanolay.”
11 Kunneno bafay sikwana, “Afu, awan a pattabnu e arollam ino bufun. Sintaw pangappannu si danum a makapanolay? 12 Naerensiyami iyaw a bufun sike Jacob a aggidiyafuwammi. Mas atannangka kad ammat sikwana? Antuweyaw yo bufun a ninumanna anneno anakngera maski yo aggayammera.”
13 Tinumabbag i Jesus sikwana, “Na minum sito danumma iyaw a bufun e mawawna imman, 14 udde inoyera a minum sito danum a iyaddaknga e ammerengkena mawaw. Na danum a iyaddaknga sikwara e kakunna yo bitufut a mallifi-lifi a makaiyadda si angat a bulun i Dios amu-amu.”
15 Kunneno bafay sikwana, “Afu, iyaddam sikwak iyaw a danum takesi ammek ingke nad mawaw onnu makkaraumang a mattab sitaw.”
16 Kunna i Jesus sikwana, “Ingka ayan i atawam anna mulika sitaw.”
17 Kunneno bafay sikwana, “Awan atawak.”
Kunna i Jesus sikwana, “Gakkurug yo sinapitnu a awan atawam, 18 se naminlimaka a nakiatawa e yo bulunnu sitoye e bakkannu a atawa. Gakkurug yo sinapitnu sikwak.
19 Kunneno bafay sikwana, “Afu, masapitku a gakkurug a profetaka. 20 Dinayaweno aggidiyafuwantam ira i Dios sitaw a bakulud na Gerizim udde ikkayu a Hudyuwera kun diyaw a so Jerusalem nad yo maawag a paddayawan ino tolayera sike Dios.”
21 Kunna i Jesus so bafay, “Kuruwannuweno sapitangku sikwam, dumatangngeno tiyempu a bakkan sitaw a bakulud onnu so Jerusalem ino paddayawan ino tolayera sike Dios a Amatam. 22 Ikkayu a Samaritano, ammeyu ammu i Dios a dayawan diyaw. Udde sikwami a Hudyuwera, ammumiyeno dayawammi gumafu se yo Mannabbut na amminan a tolayera e meyanaknga a Hudyu. 23 Udde dumatangngeno tiyempu e anen sitaweno gakkurug a gumaddayawera sike Ama e maddayawerana si espiritu anna si kagakkuruwan. Se iyawera yo gumaddayawera a kinanggamman i Ama. 24 Na Dios e espiritu antu maawag a dayawan baggina si espiritu anna si kagakkuruwan.”
25 Kunneno bafay sikwana, “Ammuk a dumatang i Mesiya a mingan si Kristo e nanu dumatang baggina, ibalaggonana amminan sikwatam.”
26 Kunna i Jesus sikwana, “Ikkanak i Mesiya a makiteta-tetabbag sikwam.”
27 Akkabalinna iyaw a sinapit, dinumatang ino disipulunera. Nalaggat ira sin nadatangnganda i Jesus a makiteta-tetabbag so bafay. Udde awan sikwara a naffuut so bafay nu nenay maawagnga onnu saay a makiteta-tetabbag i Jesus sikwana.
28 Antu, inanawan ino bafay yo buwodna e nuli so lubbunna. Kunna so tolayera, 29 “Intam itan ino lalaki a nangitundu sikwak so amminan a inangwa-angwak! Baggina kad nakuyin i Mesiya?” 30 Antu nallawan ino tolayera so lubbun e inang ira sike Jesus.
31 Daggun, nelillin ino disipuluwera a sinapit sike Jesus e kunda, “Rabbi, katawin e mangngangkan.”
32 Udde kunna sikwara, “Ana akkanangku a ammeyu ammu.”
33 Antu naffifinnuut ino disipuluwera, “Ana kad nangiyang sikwana si akkananna?”
34 Kunna i Jesus sikwara, “Na akkanangku e yo mangwa so urayeno nanundun sikwak anna balinangkuweno ipaangwa-angwana sikwak. 35 Ammeyu kad a sapitan, ‘Appat kepay a dakkag liyena paggani?’ Udde sapitangku sikwayu, aggaganiyen. Itan diyaweno tolayera a umara-aranni sikwatam. Ira yo iyarigku si nalutu a trigu a damanan a magani. 36 Nakaarasawin ino maggani si pagana anna ammu-ammunganneno tolayera e matolena a bulun i Dios amu-amu. Antu mammalamuwangngeno nappulla anneno naggani. 37 Gakkurug yo kasapitan, ‘Tateno mammula anneno tata e maggani.’ 38 Dinundun takayu a maggani so ammeyu nemula. Tameteno nappakel e ikkayuweno naggani so nappakelanda.”
39 Oddu a Samaritano sitan a lubbun a nangurug sike Jesus gumafu so sinapit ino bafay, “Sinapitna sikwak amminan a inangwa-angwak.” 40 Antu sin inang ino Samaritanuwera sike Jesus, inarangga a magyan baggina sikwara e nagyan sinay si adwa aw.
41 E oddu kepay yo nangurug sikwana gumafu so tunturunera. 42 Kunda so bafay, “Bakkanin ino sinapitnu yo panguruwammi, se nadingngagmi ingkepay yo tunturunera e ammumin a gakkurug a baggineno Mannabbut na talubaggan.”
Pinammapiyana i Jesus ino Anak na Ofisyal na Gubyernu
43 Nappasa si adwa aw, nanaw i Jesus so Samaria e nuli so Galilea. 44 (Se i Jesus ingkepay yo nassapit a awan profeta a dinayaweno kalubbunannera.) 45 Sin dinumatang i Jesus so Galilea, maanggam amminan ino tolayera sinay a nangarasaw sikwana se naitara amminan ino kakkapallat a kiya-kiyan a inangwana so Jerusalem se anera pay sinay sin Fiyesta na Attalebad.
46 Akkabalinna, inang imman i Jesus so Cana so lubbun na Galilea e sinay, pinattabalina si binarayan ino danum. Anna so aranni a lubbun na Capernaum, ana tata ofisyal na gubyernu a matakit ino anaknga a lalaki. 47 Sin nadingngagnga a dinumatang i Jesus so Galilea a naggabwat so Judea, inang baggina a nakigumallak sikwana a umang so Capernaum takesi pammapiyannaneno anaknga a gammamatayin. 48 Kunna i Jesus sikwana, “Amme kayu mangurug nu awan maitayu a kallalaggat a milagruwera.”
49 Kunneno ofisyal sikwana, “Afu, intan liyena matay yo abbing a anakku.”
50 Kunna i Jesus sikwana, “Mulikan, matolena yo anakngu.” Kinurug ino lalaki yo sinapit i Jesus e nanawin.
51 Sin ana kepay baggina so dalan, dinumafung sikwaneno imbutnera e sinapitda sikwana a natolay kepay yo anaknga. 52 Finuutneno lalaki yo imbutnera nu nenay orat a nammapiyeno anaknga e kunda, “Sin fuwab na ala una si fuwab sin awanin ino kulikugnga.”
53 Nadandam ino ama a antuweyaw yo orat sin sinapitna i Jesus sikwana, “Matoleneno anakngu.” Antu gafuna a nangurug baggina anneno amminan a katabbalena sike Jesus.
54 Antuweyaw yo meka-adwa a kakkapallat a milagru a inangwa i Jesus so Galilea kapiyena naggabwat so Judea.