Pinammapiyana i Jesus ino Matakit so Aw na Aggimemmang
5
Akkabalinna iyaw, inang i Jesus so Jerusalem e nakifiyesta so Hudyuwera. 2 So Jerusalem ana paddiyutan a maayan si Betsata so sapit a Hebreo. Aranni iyaw so tarangka a Pattallungan na Karneruwera e ana lima a passiyonganna. 3 Odduwera a matakit a nassiyong sinay, maski yo bulag ira, pilayera, anneno paralitikuwera. Inda-indaggandeno pagguyu na danum, 4 se nu korwan, mullug ino anghel i Dios e pagguyunneno danum so paddiyutan. E seanya yo palungu a mattubbu so danum kapiyena iyaw a magguyu e mammapiyana si maski sanna a takitna. 5 Ana tata lalaki sinay a tallufulu walu rawunin a matakit. 6 Sin naitana i Jesus ino lalaki a nakaidda anna ammuna a nabayagin a matakit, kunna sikwana, “Kanggammu a mammapiya?”7 Tinumabbag ino lalaki a matakit, “Afu, kanggammangku pay udde awan a mangitubbu sikwak nu magguyuweno danum. Paumangak kepay lamang e anen napalungu sikwak.”
8 Kunna i Jesus sikwana, “Gumumbwatka, appannuweno niddannu e mallakadka.” 9 Siddarat a nammapiyeno lalaki, inakkitneno niddanna e nallakarin.
Nedemmu iyaw so Aw na Aggimemmang. 10 Antu kunneno afu-afuwera na Hudyuwera so lalaki a napammapiya, “Ammena meantu so katunungantam a makkitka si niddannu so Aw na Aggimemmang.”
11 Udde tinabbagngera, “Kunneno lalaki a nakapammapiya sikwak a akkitangkuweno niddangku e mallakarak.”
12 Finuutda baggina, “Yanya yo lalaki a nangitundu sikwam a akkitannuweno niddannu e mallakadka?”
13 Ammena ammuweno lalaki nu yanya yo nakapammapiya sikwana se ammenan naita i Jesus so kaodduwan ino tolay. 14 Ammena nabbayag, naintufukanna i Jesus ino lalaki so lawan na Templu e kunna sikwana, “Itannu, nammapiyakan. Ammekan malliwat takesi awaninna maral a medemmu sikwam.” 15 Nanaweno lalaki anna netunduna so afu-afuwera na Hudyuwera a i Jesus ino nakapammapiya sikwana. 16 Gumafu sitaw, pinefunan ino afu-afuwera na Hudyuwera a ilupe-lupet i Jesus gumafu se pinammapiyaneno tolay so Aw na Aggimemmang. 17 Udde kunna i Jesus sikwara, “Ibali-balin i Amak a akwan ino akakwanna e kunnapay sikwak.”
18 Sin sinapit iyaw i Jesus, tattullot a ana pangakiran ino afu-afuwera na Hudyuwera a patayan baggina se bakkan lamang a tinulyatneno dundun patamu so Aw na Aggimemmang udde itundu-tunduna kepay a Amana i Dios e ikunnana yo baggina sike Dios.
Na Pakandameno Anak i Dios
19 Kunna i Jesus sikwara, “Gakkurug yo itunduk sikwayu, ikkanak a yo Anak i Dios, awan a makwak nu ikkanak pelamang a tata udde akakwangku pelamang yo akakwan i Amak. Se amminan a akakwan i Amak, akakwangku pay a anaknga. 20 Se iddukannak i Amak e ipaitana amminan sikwak ino akakwanna. Ipaitanana sikwak ino kakkapallat ingke a kiya-kiyan a kanggamma a ipaangwa sikwak mas ingke so akakwangku takesi malaggat kayuna. 21 Pinantotolena i Amak ino natayera e inindannera si angat, antu kunnapay ikkanak a Anaknga a mangiyadda si angat so kanggammangku a indan. 22 Se i Ama ammena mannunut si maski yanya a tolay udde neyaddanan sikwak a Anaknga amminan a pakandama a mannunut, 23 takesi dayawandakngeno amminan a tolayera a kunnapay yo paddayora sike Amak. Na ammena maddayaw sikwak e ammena dayawan i Amak a nanundun sikwak.
24 “Gakkurug yo itunduk sikwayu, maski yanya yo maningngag anna makimoray nu nenay yo sapitangku anna mangurug sike Ama a nanundun sikwak e matolena a bulun i Dios amu-amu. Ammenana manunut udde nappasen si akkapatay e matolena a bulun i Dios amu-amu. 25 Gakkurug yo itunduk sikwayu, dumatangngeno tiyempu e sitoyen a yo tolayera a nekatwaya sike Dios e maningngag anna makimoray sikwak e matolena a bulun i Dios amu-amu. 26 I Ama yo paggabwatan na angat antu ikkanak a yo Anak i Dios e naindan pay si pakapangwa a paggabwatan na angat. 27 Inindannak si pakandama a mannunut so tolayera se ikkanak a yo Anak na Tolay. 28 Amme kayu nad malaggat so sinapitku se dumatangngeno tiyempu a inoyera a netanam e madingngagganeno ngaralku, 29 e mallawannera so nattanammanda. Inoyera a nangwa si mapiya e matolena a bulun i Dios amu-amu udde inoyera a nangwa si maral e makastiguna amu-amu.
Na Testimonyera Meafu sike Jesus
30 “Awan a makwak nu ikkanak pelamang a tata. Dengke a madingngagkuweno sinapit i Amak, mannunutak. Antuweyaw yo gafuna a mannunutak si fustu se bakkan ino nakamkuweno tuntulangku udde yo uray i Amak a nanundun sikwak.
31 “Nu itunduk so tolayera meafu sikwak, ammerana kuruwan ino sapitangku. 32 Udde ana i Amak a makaimammat meafu sikwak, e ammuk si gakkurug yo sapitanna. 33 “Nanundungka si tolayera a maffuut sike Juan e sinapitneno kagakkuruwan meafu sikwak. 34 Ammek maawag a tolayera a massapit so korwan ira meafu sikwak udde ipakaammuk sikwayuweno sinapit i Juan takesi kuruwandaknga anna tabbutannana kayu i Dios. 35 Kakunnana i Juan ino mabaggaw a kumilikillit a allamparan anna nammalamuwang kayu si baggawna si pigya a tiyempu. 36 Udde ana yo manaddag sikwak a mas ingke so sinapit i Juan meafu sikwak. Na ipaangwa i Ama sikwak a maawag a balinangku anna nu nenay yo akakwangku e antu yo manaddag sikwak a i Ama ino nanundun sikwak. 37 I Ama a nanundun sikwak baggina keppay yo nanaddag sikwak. Ammeyuwengke nadingngag ino ngaralna se ammeyuwengke naita baggina. 38 E amme kayu nakimoray so sinapitna se ammerak kinurug a dinundunna. 39 Kinalakammuyuwengkeno neturak a sapit i Dios se arig diyaw a maintufukan diyawna sitawera nu kasanna a matolay a bulun i Dios amu-amu. Na sapit i Dios antu yo mangitaddag sikwak. 40 Udde amme kayu ke mangurug sikwak takesi matolay kayuna a bulun i Dios amu-amu.
41 “Ammek mintufuk si pammadayaweno tolayera. 42 Udde ammuk a awan sikwayuweno idduk na Dios. 43 Inangngak sitaw si pakandama i Amak udde ikkanak ammeyu a inarasaw. Nu wara korwan a dumatang si pakandamana ingkepay e arasawan diyawna baggina. 44 Kasanna kayu kad a mangurug sikwak nu arasawan diyaweno pammadayaw na kasittoleyu udde ammeyu kanggam ino pammadayaw a maggabwat so mittata a Dios? 45 Ammeyu nonotan a akusan takayuna so allangan i Amak, se yo màakusana sikwayu e i Moises a antu yo innanaman diyaw a maffabor sikwayu. 46 Nu kinurug diyaw i Moises, e kuruwandak pena se baggineno natturak meafu sikwak. 47 Udde nu amme kayu mangurug so neturaknga, kasannayu a kuruwan yo sapitangku?”