Namakkan i Jesus si Maturuk Limarifu a Tolay
6
Akkabalinna iyaw, naddammang i Jesus so Balanaw na Galilea a maayan keppay si Balanaw na Tiberias. 2 Odduwengke a tolayera a dumaladandan sikwana se naitareno milagruwera a inangwa-angwana so matakit ira. 3 Nunek i Jesus so dangutul e nattuttud sinay a bulunneno disipulunera. 4 Antu aranniyen ino Fiyesta na Attalebad na Hudyuwera. 5 Sin nallanga-langa i Jesus, naitaneno oddu a tolayera a umang sikwana. Kunna sike Felipe, “Sintaw paggatangantam si tinapay a akkanan iyawera a tolayera?” 6 Sinapitna iyaw sike Felipe a mamureba sikwana se ammunan i Jesus ino akwannana.7 Tinabbag i Felipe baggina, “Yo annam a dakkag a suweldu e makurang a paggatang si tinapay maski taggi-bisang ira.”
8 Tata so disipulunera a i Andres a wayi i Simon Pedro a nakkun sikwana, 9 “Ana abbing a lalaki sitaw a ana lima a tinapay anna adwa a busiladna. Ammena iyaw maffustu so kaodduna tolay.”
10 Kunna i Jesus, “Pattutturan diyawera.” Kakaddattan ino lugar antu nattuttud ino tolayera anna mallimarifu a lallakiyereno ana sinay. 11 Inappa i Jesus ino tinapay e nappabalat sike Dios liyena nepabunnay so disipulunera so tolayera a nakatuttud sinay. Kakunna keppay yo inangwana so busilad. Nangngan ira amminan makiyad si kanggamda. 12 Sin nabattugin ino tolayera, kunna i Jesus so disipulunera, “Ammungan diyaw amminan ino nabunera takesi awan a metappolna.” 13 Antu inammunggeno nabuna so lima a sebada a tinapay e napannuweno tafulu adwa a kaba.
14 Sin naiteno tolayera ino milagruwera a inangwa i Jesus, kunda, “Antuwen iyawin ino profeta a umang sito talubaggan.”
15 Sin naammuwanna i Jesus a umang ino tolayera a fuwersanda baggina a mappatul, inanawannera e tattatana a inang so dangutul.
Nallakad i Jesus so Danum
16 Sitan a gafi, inang ino disipuluwera i Jesus so balanaw a mindag sikwana. 17 Nattakayeno disipuluwera si barangay e naddammang ira so balanaw so dunan na Capernaum. Lammukin e ammena kepay dinumatang i Jesus, 18 Dinumokal ino palung na balanaw gumafu se nattuyag ino leled. 19 Sin nakatagwan ira si mallima onnu màannam a kilometro, naitara i Jesus a mallaka-lakad so uttun na danum a umara-aranni so barangay e natalawan ira. 20 Udde sinapitna i Jesus sikwara, “Amme kayu mattalaw sikwak. Ikkanak iyaw, i Jesus.” 21 Inarasora a pinatakay i Jesus so barangay e siddarat ira a nakadatang so anganda.
Inintufuk ino Tolayera i Jesus
22 Kadaddaramatanna, naiteno oddu a tolayera a nagyan so tafik na balanaweno tata lamang a barangay a ana sinay. Naitara pay i Jesus a ammena nattakay so barangay bulunneno disipulunera udde nanaweno disipulunera a ira-ira pelamang. 23 Ana pay yo barangayera a naggabwat so Tiberias a dinumatang so lugar aranni so nangngananda si tinapay kapiyena nappabala-balat i Afu. 24 Sin naammuwan ino tolayera a awan i Jesus anneno disipulunera sinay, nattakayera so barangayera anna inang ira so Capernaum takesi intufukanda i Jesus.
I Jesus ino Tinapay a Mangadda si Angat
25 Sin naintufukanda i Jesus so tafik na balanaw, kunda sikwana, “Mestru, kansaka a inumang sitaw?”
26 Tinabbagngera i Jesus, “Gakkurug yo itunduk sikwayu, intufukandak bakkan a gumafu so naitayu a milagruwera a inangwak udde gumafu se nakaakkang kayu si tinapay e nabattug kayu. 27 Bakkan lamang yo maakkan a madara-daral ino kumanan diyaw a maappa kunsi kunnapay yo maakkan a mangiyadda si angat a awan pakiyaranna a iyaddak a yo Anak na Tolay se ikkanak ino inindan i Dios Ama si kunna sitaw a damarama.”
28 Antu kunda sikwana, “Nenay nad maawag a akwammi takesi makwamiyeno ipaangwa i Dios sikwami?”
29 Tinabbagngera i Jesus, “Iyaweno uray i Dios a akwan diyaw, mangurug kayu sikwak a dinundunna.”
30 Antu kunda sikwana, “Nenay milagruwera a ipaitam sikwami takesi mangurug kami sikwam? Nenay akwannu? 31 Nangngan ino aggidiyafuwammiyera si manna so kulolawat e neturak, ‘Inindandera i Moises si tinapay a naggabwat si langit.’ ”a
32 Tinumabbag i Jesus, “Gakkurug ingkeno itunduk sikwayu, bakkan i Moises ino nangadda sikwara si tinapay a naggabwat si langit udde i Amak a nangwa sitan anna baggineno nangadda sikwayu si gakkurug a tinapay a naggabwat si langit. 33 Se yo tinapay i Dios antu yo tinapay a naggabwat si langit a mangiyadda si angat a awan pakiyaranna so tolayera sito talubaggan.”
34 Kunda sikwana, “Afu, maumid a indan dakami si kunna sitaw a tinapay.”
35 Kunna i Jesus sikwara, “Ikkanak ino tinapay a mangiyadda si angat. Seanya yo umang sikwak, ammenengkena mabisinan anneno mangurug sikwak ammenengkena mawaw. 36 Udde netunduk sikwayu a naitarakun udde amme kayu kepay mangurug. 37 Amminan a netalak i Ama sikwak, mangurugngera sikwak anna amminan a mangurug sikwak ammekngera ingke a ammayan, 38 se naddassagak si langit e bakkangku akwan ino urek udde yo urayeno nanundun sikwak. 39 Antuweyaw yo uray i Amak a nanundun sikwak, a imurangkuneno amminan a netalaknga sikwak anna pantotolayangkunera so Aw na Pannunut. 40 Antuweyaw yo uray i Amak a amminan a makaammu sikwak a Anaknga e mangurug sikwak anna matolena a bulun i Dios amu-amu anna pantotolayangkunera so Aw na Pannunut.”
41 Marekla-reklamuweno Hudyuwera gumafu so sinapit i Jesus a baggineno tinapay a naggabwat si langit. 42 Sapi-sapitanda, “Bakkang kad iyaw i Jesus a anak i Jose anni Maria a ammu-ammutam? Kasannana a sapitan a naggabwat baggina si langit?”
43 Tinabbag ira i Jesus, “Amme kayu marreklamu. 44 Awan a mattabali si gumaladandangku nu bakkan a i Amak a nanundun sikwak a mangiyang sitan a tolay sikwak anna pantotolayangkuna baggina so Aw na Pannunut. 45 Neturak ino profetera siin nabayagin a tiyempu, ‘Matunturuwannera amminan i Dios.’ Amminan a naningngag anna natunturuwan i Ama e mattabali si gumaladandangku. 46 Ammena kanggam a sapitan a anen nakaita sike Ama. Na naggabwat sikwana antu pelamang yo nakaita sikwana. 47 Gakkurug yo itunduk sikwayu, seanya yo mangurug sikwak e matolena a bulun i Dios amu-amu. 48 Ikkanak ino tinapay a mangiyadda si angat. 49 Maski inakkan ino aggidiyafuwan diyawera yo manna so kulolawat natayera keppay. 50 Udde, antuweyawin ino tinapay a naggabwat si langit, seanya yo mangngan sitaw a tinapay e matolena a bulun i Dios amu-amu. 51 Ikkanak ino tinapay a mangiyadda si angat a naggabwat si langit. Seanya yo mangngan sitaw a tinapay e matolena a bulun i Dios amu-amu. Iyaw a tinapay e baggik a iyaddaknga takesi amminan a tolayera sito talubaggan e maindanna si angat.”
52 Nattitinnulyat ino afu-afuwera na Hudyuwera a nakkun, “Kasanna kad a iyadda iyaw a tolay yo baggina sikwatam a akkanantam?”
53 Antu kunna i Jesus sikwara, “Gakkurug yo itunduk sikwayu, nu ammeyu akkanan yo baggik, ikkanak a yo Anak na Tolay, anna nu ammeyu inuman yo dāk amme kayuna matolay. 54 Udde inoyera a mangngan sito baggik anna minum sito dāk e matolena a bulun i Dios amu-amu e pantotolayangkunera so Aw na Pannunut. 55 Se yo baggik antu yo gakkurug a maakkan anneno dāk antu yo gakkurug a mainum. 56 Inoyera a mangngan sito baggik anna minum sito dāk e ibalindana a makisittata sikwak anna kunnaak pay sikwara. 57 Kakunna yo aggatolay a Amak a nanundun sikwak anna natolayak gumafu sikwana, antu seanya yo mangngan sito baggik e matolena a bulun i Dios amu-amu gumafu sikwak. 58 Ikkanak ino tinapay a naggabwat si langit. Bakkan a kakunna yo manna a inakkan ino aggidiyafuwan diyawera e natayera keppay. Udde yo mangngan sitaw a tinapay e matolena a bulun i Dios amu-amu.”
59 Antuweyaw yo sinapit ira i Jesus sin nanunturu baggina so sinagoga so Capernaum.
Na Sapit i Jesus a Mangadda si Angat
60 Sin nadingngag ino disipulunera iyaw a sinapitna, kunda, “Madiyat iyaw a tunturu. Yanya yo makaintindi so sinapitna?”
61 Ammuna i Jesus a marekla-reklamuweno disipulunera meafu sitaw antu kunna sikwara, “Gumafu so nadingngag diyaw e talekkurandakun? 62 Kasanna nakuy nu maitarak a yo Anak na Tolay a tumullu-tullu so naggabwatangku? 63 I Espiritu i Dios ino mangiyadda si angat a ammena dama maangweno tolay. Na sinapitkuwera amminan sikwayu e naggabwat sike Espiritu i Dios a mangiyadda si angat. 64 Udde ana sikwayuweno ammena mangurug sikwak.” Se ammu i Jesus mamefu so palunguna inoyera ammena mangurug anna yanya yo mattraydorna sikwana. 65 E kunna, “Antuweyaw yo gafuna a sinapitku sikwayu a awan mattabali si gumaladandangku nu bakkan a uray i Ama.”
66 Gumafu sitaw, oddu so disipulunera a nuli so dadan a akkatolera anna ammera dinumandan sikwana. 67 Antu finuutna i Jesus ino tafulu adwa a disipulunera, “Kanggam diyaw pay a manaw?”
68 Tinabbagnga i Simon i Jesus, “Afu, pakaidandanammi antu? Ana sikwam ino sapit ira a mangiyadda si angat a bulun i Dios amu-amu. 69 Mangurug kamin anna ammumi a ikkeno Dinundun i Dios.”