Amme Nangurug sike Jesus ino Wawwayina
7
Akkabalinna iyaw, nilebut i Jesus ino Galilea. Nilillikanna a umang so Judea se kanggamma afu-afuwera na Hudyuwera a mintufuk si pakapatayanna. 2 Aranniyen ino Fiyesta na Passiyongan.a 3 Antu kunneno wawwayinera a lalaki sikwana, “Maawag a manawkan sitaw e umangka so Judea takesi maita na disipulum ira yo milagruwera a akakwannu. 4 Awan a tolay a mangiyimad si akakwanna nu kanggamma a mammannag. Akakwannu keppena iyawera a kiya-kiyan, ipakaammumum yo baggim so tolayera.” 5 Se maski yo wawwayinera a lalaki e ammera mangurug sikwana.6 Kunna i Jesus sikwara, “Bakkangku kepay a tiyempu a umang sinay, udde sikwayu, damayu a umang maski nenay a tiyempu. 7 Ammera kayu ikalussaweno tolayera sito talubaggan udde ikalussorak se sapitangkuweno maral a taddarera. 8 Ikkayu lamangin ino makifiyesta. Ammek kepay dama a umang se bakkangku kepay a tiyempu.” 9 Kapiyena a sinapit iyaw, nappabattang baggina so Galilea.
I Jesus so Fiyesta na Passiyongan
10 Udde kapiye a nanaweno wawwayinera i Jesus a inang nakifiyesta so Jerusalem, nebulun pay baggina a amme ammuweno korwan ira.
11 So paffiyestan, intu-intufukan ino afu-afuwera na Hudyuwera i Jesus. Kunda, “Ope mangke baggina?”
12 Marekla-reklamuweno oddu a tolayera a nammu-ammung sinay meafu sike Jesus. Kundeno korwan sikwara, “Mapiya a tolay baggina.” Udde kundeno korwan ira, “Bakkan, illo-illokunneno oddu a tolayera!” 13 Udde awan a nangipakaammu si korwan ino sapi-sapitanda meafu sike Jesus gumafu se mattalawera so afu-afuwera na Hudyuwera.
14 Sin mattangngen ino fiyesta, inang i Jesus so lawan na Templu e namefu a nanunturu sinay. 15 Nalaggat ino afu-afuwera na Hudyuwera e kunda, “Sintaw kad yo nangappanna si aggammuna meafu so neturak a sapit i Dios e awan ke mestru a nanunturu sikwana patamu sitaw?”
16 Sin nadingngag i Jesus ino sinapitda e kunna, “Na intuntu-tunturuk sikwayu e bakkan a naggabwat sikwak, udde naggabwat sike Dios a nanundun sikwak. 17 Seanya yo manggam a mangwa so uray i Dios, maammuwannana nu yo ituntu-tunturuk e naggabwat sike Dios onnu si urek ingkepay. 18 Na tolay a manunturu a naggabwat si ginanakamma ingke pay e mintufuk si kadayawanna ingkepay. Udde yo tolay a mintufuk si pammadayaweno nanundun sikwana, passi gakkurug yo sapitanna anna ammenengke massalasiri. 19 Bakkang kad a neyaddana i Moises sikwayuweno katunungan i Dios? Udde awan sikwayu a nakimoray si katunungan. Saay se mintufuk kayu si pakapatayangku?”
20 Kunneno tolayera, “Demonyuka! Yanya yo manggam a mamapatay sikwam?”
21 Antu kunna i Jesus sikwara, “Pinammapiyak ino tata matakit so Aw na Aggimemmang, nalaggat kayu amminan. b 22 Neyaddana i Moises sikwayuweno katunungan meafu si appabanggit maski ammena naggabwat sikwana udde so aggidiyafuwan diyawera. Akwan diyaw iyaw maski so Aw na Aggimemmang. 23 Nu meyannut a mabanggit ino abbing so Aw na Aggimemmang tapenu matuntul ino katunungan i Moises, makaallang kayu kad sikwak gumafu se pinammapiyak ino tata tolay so Aw na Aggimemmang? 24 Amme kayu nad mannunut meantu so nenay a maitayu udde mannunut kayu meantu so nenay a gakkurug.”
I Jesus kad yo Mesiya?
25 Kundeno korwan ira a taga-Jerusalem, “Bakkang kad iyaweno tolay a kanggamda a patayan? 26 Itan diyaw! Anen sitaw a manunturu so allangan na tolayera, udde awan a masapitda mekontra sikwana! Gakkurug nakuy a ammuweno afu-afuwera na Hudyuwera a baggineno Mesiya a netamba i Dios a gumumwang. 27 Udde bakkan baggineno Mesiya gumafu se ammutam nu taga-sintaw iyaw a tolay. Nanu gumumwang i Mesiya, awan makaammu nu taga-sintaw baggina.”
28 Antu nabid si madappa i Jesus sin nanunturu so lawan na Templu. Kunna, “Kun diyaw a ammurak anna ammuyu nu taga-sintawak udde bakkan a urek ino inangangku sitaw. Na gakkurug a Dios ino nanundun sikwak udde ammeyu ammu baggina. 29 Udde ammuk baggina gumafu se naggabwatak sikwana e baggineno nanundun sikwak.”
30 Sin sinapitna i Jesus iyaw, kanggamda a gafutan baggina udde ammera keppay a ginafut se bakkanna kepay a tiyempu. 31 Udde maski nu kunna sitan, odduwengke a tolayera a nangurug sikwana. Kunda, “Bagginnengkeno Mesiya, awan damana makaangwa si milagruwera a akakwanna.”
Nedundun ino Sundaluwera a Maggafut sike Jesus
32 Nadingngag ino Fariseowereno sapi-sapitan ino tolayera meafu sike Jesus. Antu nanundun ino afu-afu a pariyera anneno Fariseowera si guwardiyera na Templu takesi gafutanda baggina. 33 Kunna i Jesus, “Ammekun mabbayag a migyan sikwayu e muliyakun so nanundun sikwak. 34 Intufukandaknga udde ammeraknga matumpalan anna amme kayuna makaumang so lugar a angangku.”
35 Iniyoyungan ino afu-afuwera na Hudyuwera i Jesus dengkera a sittata a nakkun, “Sintaw nakuy yo kanggamma a angan iyaw a tolay a ammetam matumpalan baggina? Kanggamma kad nakuy a umang so wawwayitam a Hudyuwera a migigyan so lubbu-lubbun ino bakkan a Hudyuwera anna tunturuwan ino bakkan a Hudyuwera a ana sinay? 36 Nenay nakuyeno kanggamma sapitan ino sinapitna, ‘Intufukandaknga udde ammerak a matumpalan anna amme kayuna makaumang so lugar a angangku?’ ”
Na Espiritu i Dios e Neyarig si Danum
37 Na kauddiyan a aw na fiyesta, antu yo kaawan ingke a aw, dengke a nakataddag i Jesus, naggirawa baggina si madappa a nakkun, “Seanya yo mawaw, umang sikwak, 38 anneno mangurug sikwak e minum. Se nakkun so neturak a sapit i Dios, ‘Seanya yo mangurug sikwak, anana sikwana a mangiyadda si angat a kakunna yo danum a mallifi-lifi so bitufut.’ ” 39 Sin sinapit iyaw i Jesus, ipatamuna sike Espiritu i Dios a meyaddana so inoyera a mangurug sikwana. Sinoyera a tiyempu, ammena kepay nedundun ino Espiritu i Dios gumafu se ammena kepay nepakaammuna i Dios ino kadayawan i Jesus.
Na Passasarineno Tolayera
40 Sin nadingngag ino tolayera ino sinapit i Jesus, kundeno korwan sikwara, “Iyaw a tolay e gakkurug a profeta i Dios.”
41 Kunda pay yo korwan ira, “Baggineno Mesiya!”
Udde ana pay a korwan ira a nakkun, “Ammena dama a taga-Galilea ino Mesiya. 42 Bakkang kad a kunna so neturak a sapit i Dios a i Mesiya e gaka i patul David anna meyanaknga so tarabbunan na Betlehem a nagyanan i David?” 43 Naddadarumeno ginanakam ino tolayera meafu sike Jesus. 44 Kanggamdeno korwan a tolayera a gafutan baggina udde awan namureba a akwan iyaw.
Ammera Kinurug ino Afu-afuwera na Hudyuwera i Jesus
45 Antu nuliyeno guwardiyera na Templu so afu-afu a pariyera anneno Fariseowera. Kunda so guwardiyera na Templu, “Saay se ammeyu ginafut baggina?”
46 Kunneno guwardiyera na Templu, “Awan ingke kakunna yo aggabiranna!”
47 E kunda pay yo Fariseowera, “Maski ikkayu, nailloku nakayu pay kad? 48 Ana kad so afu-afuwera na Hudyuwera onnu Fariseowera a nangurug sikwana? 49 Udde iyaw a tolayera a ammera makaammu si katunungan i Moises e nunutanna i Dios.”
50 Bulunda sinay i Nicodemus a inang nakitetabbag sike Jesus si tata gafi. Kunna sikwara, 51 “Ammena meyannut si katunungantam a mannunut si tolay nu ammetam abbu dingngaggan anna ammun ino inangwana.”
52 Kunda sikwana, “Saay, taga-Galileaka kad pay? Bibbirannu si mapiya yo neturak a sapit i Dios e maitamma a awan a profeta a maggabwat si Galilea.”
53 Akkabalinna, nuliyera amminan so balera.