Na Bafay a Nagafutan a Nakikkarallaw
8
Sin nakauliyen ino tolayera, inang i Jesus so Dangutul na kakayuwan a Olibu. 2 Maggibbat si kadaddaramatanna, inang imman i Jesus so lawan na Templu. Inarimummungan ino oddu a tolayera baggina e nattuttud anna pinefunanna a manunturu sikwara. 3 Dinumatang ino mapoporay si katunungan anneno Fariseowera e nekangkalindeno bafay a nagafutan a nakikkarallaw, pinataddagga so allangan na tolayera. 4 Kunda sike Jesus, “Mestru, nagafutan iyaw a bafay a nakikkarallaw. 5 Meantu so katunungan i Moises, maawag a lappaggan ino bafabbayera a kakunnana makiyad si matay. Nenay mekunnu sitaw?”6 Sinapitda iyaw a pamureba sikwana takesi makaintufuk ira si pakaliwatanna. Naddomug i Jesus e natturak so lubag anna neyusana yo tamuruna. 7 Sin makafuu-fuut ira sikwana, nattaddag i Jesus e kunna sikwara, “Nu yanya sikwayuweno awan liwatna, antu yo mapalungu a mallappag sikwana.” 8 Naddomug imman i Jesus e natturak so lubag.
9 Sin nadingngagga iyaw, sittatera a nanaw. Napalunguweno manannakam makiyad i Jesus lamang yo nabattang anneno bafay a nakataddag so allanganna. 10 Nattaddag i Jesus e kunna sikwana, “Wayi, ope iran? Awan kad maski tata makkastigu sikwam?”
11 Kunneno bafay, “Afu, awan maski tata.”
E kunna i Jesus, “Amme taka pay kastiguwan. Ingkan udde ammekan malliwat.”
I Jesus ino Sirwat na Talubaggan
12 Nangarig imman i Jesus so tolayera a nakkun, “Ikkanak ino sirwat na talubaggan. Seanya yo dumandan sikwak, ammenana mallakad si lammuk udde mabaggawan sitaw a sirwat e matolena a bulun i Dios amu-amu.”
13 Antu kunneno Fariseowera sikwana, “Ammena gakkurug iyan a sapi-sapitannu se ikka pelamang yo manaddag si baggim ingkepay.”
14 Tinumabbag i Jesus, “Maski ikkanak pelamang yo manaddag si baggik, gakkurug yo sapi-sapitangku, se ammuk ino naggabwatangku anna angangku. Udde ikkayu, ammeyu ammu nu sintaw yo naggabwatangku anna sintaw yo angangku. 15 Mannunut kayu meantu so pannunut ino tolayera, udde ikkanak, ammek mannunut maski yanya. 16 Udde maski nu mannunutak, fustuweno pannunutku gumafu se bakkanak lamang yo mannunut, kunsi bulungku i Ama a nanundun sikwak. 17 Neturak so katunungan diyaw a nu mapparefuweno sapitan ino adwa a tolay, kanggamma sapitan a gakkurug yo sapi-sapitanda. 18 Taddangkuweno baggik ingkepay anna taddannak pay i Amak a nanundun sikwak.”
19 Finuutda baggina, “Ope i Amam?”
Tinumabbag i Jesus, “Ammerak gakkurug a ammu onnu ammeyu pay gakkurug a ammu i Amak. Nu ammurak, ammuyu pay i Amak.”
20 Sinapit iyawera i Jesus sikwana a nanunturu so lawan na Templu aranni so pangiyekwanan si wallira a pirak para so Templu. Udde awan naggafut sikwana se bakkan kepay iyaweno tiyempuna.
Nepakaammuna i Jesus ino Akkapatena
21 Sinapit imman i Jesus sikwara, “Manawak e intufukandaknga, udde matay kayu a ammena kepay napakoman ino liwa-liwat diyaw. Nu sintaw yo angangku, amme kayu makaumang.”
22 Antu kunneno afu-afuwera na Hudyuwera, “Mappakamatay nakuy baggina? Nenay kanggamma sapitan a, ‘Ammetam makaumang so anganna?’ ”
23 Sinapit i Jesus sikwara, “Naggabwat kayu sito talubaggan e naggabwatak si langit. Taga-talubaggang kayu e bakkanak a taga-talubaggan. 24 Antu kungku sikwayu a matay kayuna a ammena napakoman ino liwa-liwat diyaw. Se nu amme kayu mangurug a Ikkanak i Mesiya, matay kayuna a ammena kepay napakoman ino liwa-liwat diyaw.”
25 Kunda sikwana, “Yanyaka kad?”
Tinumabbag i Jesus, “Sinoyku kepay sinapit sikwayu nu yanyaak. 26 Oddu nad kepay yo sapitangku a mepaliwat sikwayu udde yo nanundun sikwak e gakkurug amminan ino sapitnera anna ipakaammuk so tolayera sito lubag ino nadingngagku sikwana.”
27 Ammera naintindiyan a yo sapi-sapitanna e meafu sike Amana si langit. 28 Antu kunna i Jesus, “Nanu itullu-tullurakunna a yo Anak na Tolay, maammuwan diyaw a Ikkanak i Mesiya. Kunnapay a awan akakwangku a maggabwat si nakamku nu bakkan sapitangku iyawera meantu so netun sikwak i Amak. 29 Bulungkuweno nanundun sikwak. Ammenak a inanawan a tattata se maumid a akakwangkuweno kaangga-anggam sikwana.”
30 Dengke a sapi-sapitan iyaw i Jesus, oddu yo nangurug sikwana.
Gakkurug a Disipuluwera
31 Kunna i Jesus so Hudyuwera a nangurug sikwana, “Nu ibali-balin diyaw a makimoray so tunturuk ira, gakkurug a disipulu takayu. 32 Anna maammuwan diyaweno kagakkuruwanna e yo kagakkuruwanna antu yo mangilubbaknga sikwayu.”
33 Tinumabbag ira, “Gaka kami i Abraham anna amme kami kepay a naimbut si maski yanya a tolay. Saay se sapitannu a melubbak kamina?”
34 Tinumabbag i Jesus sikwara, “Gakkurug a sapitangku sikwayu, seanya yo nakaliwat, e imbut na liwat. 35 Na imbut e ammena mebilang a parte na familya udde yo anak e manayun a mebilang. 36 Antu nu ikkanak a yo Anak i Dios ino mappalubbak sikwayu, gakkurug ingke a melubbak kayu. 37 Ammuk a gaka kayu i Abraham udde kanggamdak a patayan, gumafu se ammeyu kanggam a arasawan ino sapitkuwera. 38 Sapitangku sikwayuweno nepaita i Amak sikwak. Kunnapay sikwayu, akwan diyaweno nadingngag diyaw sike amayu.”
39 Kundeno Hudyuwera, “I Abraham ino amami.”
Kunna i Jesus sikwara, “Nu gakkurug a gaka kayu i Abraham, tuntulan diyaw nad yo inangwana. 40 Udde sitoye kanggamdak a patayan, ikkanak a nangitundu sikwayu si kagakkuruwanna a nadingngagku sike Dios. Bakkan a kunna sitaweno inangwa i Abraham. 41 Na inangwayu e kakunna yo inangwa i amayu.”
Tinumabbag ira, “Bakkang kami a anak si liwan, tata yo amami, i Dios lamang.”
42 Kunna i Jesus sikwara, “Nu gakkurug a i Dios ino Amayu, iddukandak pay se naggabwatak sike Dios e sitoye anaak sitawin. Ammek inang sitaw a urek ingkepay, udde i Dios ino nanundun sikwak. 43 Saay se ammeyu maintindiyan ino sapi-sapitangku? On, se ammeyu kanggam a arasawan ino tunturuk ira. 44 I Diyablu ino amayu. Akakwan diyaweno kanggamman i amayu. Gumappatay baggina mamefu kepay siin. Ammena kanggam ino kagakkuruwan gumafu se awan a kagakkuruwan sikwana. Negagangena a massisiri e baggineno ama na amminan a siri. 45 Udde ikkanak, passi kagakkuruwan ino sapitangku sikwayu e antu yo gafuna a ammerak kuruwan. 46 Yanya kad sikwayuweno massapit a nakaliwatak? Awan. Nu kagakkuruwan amminan a sapitangku saay se ammerak kuruwan? 47 Na anak ira i Dios, dingngaggandeno sapitnera sikwara. Na gafuna a ammeyu dingngaggan ino sapitnera sikwayu, bakkang kayu a anak i Dios.”
I Jesus anni Abraham
48 Kundeno Hudyuwera sike Jesus, “Ammena kad gakkurug yo sinapitmi a ikka e Samaritano anna maaffu-affunangka si demonyu?”
49 Tinumabbag i Jesus, “Ammek a maaffu-affunan si demonyu. Daya-dayawangku i Amak udde ammerak a daya-dayawan. 50 Ammek gakkad a mapadayawan. I Amak ino manggam a mapadayawanak ino tolayera e baggineno mannunut. 51 Gakkurug yo itunduk sikwayu, nu yanya yo makimoray si sapitku e ammena matay.”
52 Kundeno Hudyuwera, “Awanin a pabbabangmi a gakkurug a naaffunangka si demonyu. Maski i Abraham anneno profetera siin nabayagin a tiyempu e natayera amminan, udde sapi-sapitannu a seanya yo makimoray si sapitku e ammena matay. 53 Mas atannangkangke kad ammat sike Abraham a aggidiyafuwammi? Natay baggina kunnapay yo profetera. Yanyakangke kad?”
54 Kunna i Jesus, “Nu dayawangkuweno baggik, awan keppay a serbina. I Amak ino mappedayaw sikwak a kun diyaw a Dios diyaw. 55 Ammeyu ammu-ammu baggina, udde ammu-ammuk baggina. Nu kungku a ammek ammu-ammu baggina, masiriyak a kakunnayu. Udde gakkurug a ammuk baggina e makimorayak so sapitna. 56 Naanggamman ingke i Abraham a aggidiyafuwan diyaw se innanamanna a maiteno paddatangku sito lubag. Gakkurug a naitanan e naanggamman baggina.”
57 Gumafu sitaw, kundeno Hudyuwera sikwana, “Awan kepay lud limafulu rawunnu, kasannam a sapitan a naitamun i Abraham?”
58 Tinumabbag i Jesus, “Gakkurug yo itunduk sikwayu, liyena kepay a neyanak i Abraham, anaakun.”
59 Antu, nannam ino tolayera si batu takesi lappagganda baggina udde nattawu i Jesus e nanaw so Templu.