Pinammapiyana i Jesus ino Tata a Bulag
9
Sin mallaka-lakad i Jesus, naitaneno tata lalaki a bulag makiyad sin neyanak baggina. 2 Finuut na disipulunera sikwana, “Mestru, yanya yo nakaliwat a neyanak baggina a bulag, baggina kad onnu yo gagginafanna?”3 Tinumabbag i Jesus, “Ammena neyanak a bulag iyan a tolay gumafu se nakaliwat baggina onnu yo gagginafanna. Nakwa iyaw tapenu mepaiteno pakapangwa i Dios megafu sikwana. 4 Maawag a akwantamun ino ipaangwa na nanundun sikwak daggun a aw kepay, aranniyen a maggafi e awanin a makaangwa sitaw. 5 Sikwak a anaak kepay sito talubaggan, ikkanak ino sirwat na talubaggan.”
6 Sin sinapit iyaw i Jesus, nalluppa baggina so lubag. Nangwa si buyun e neyaffuryatna so mata na bulag. 7 Kunna i Jesus so bulag, “Umangka mimomat so pammungan na danum so Siloam (ino kanggamma sapitan iyaw e Nedundun.)” Antu inang nimomat ino bulag e sin nuli baggina, nakaiten.
8 Nappipinnakifut ino kakkarebbingngera anneno tolayera a nakaita sikwana siin mammalimut kepay baggina e kunda, “Bakkang kad baggineno maumid a nakatuttud a mammalimut?”
9 Kundeno korwan, “On baggina!” Kunda pay yo korwan ira, “Bakkan, kamutungnga lamang.”
Antu kunnenoy a tolay, “Ikkanak lud inay.”
10 Naffuut ira sikwana, “Kasannaka a nakaita?”
11 Tinumabbag ino tolay, “Na lalaki a maayan si Jesus e nangwa si buyun anna neyaffuryatna so matak. E kunna sikwak, ‘Umangka mimomat so pammungan si danum so Siloam.’ Antu inangngak a nimomat sinay e nakaitaakun.”
12 Kunda sikwana, “Ope baggina?”
Kunneno lalaki, “Ammek ammu.”
Na Fuut ino Fariseowera meafu so Lalaki a Bulag
13 Akkabalinna, neyangga so Fariseowereno lalaki a dati a bulag. 14 Aw na Aggimemmang sin nangwa i Jesus si buyun e pinammapiyaneno bulag. 15 Antu finuut pay yo Fariseowera nu kasanna baggina a nakaita. E kunna sikwara, “Inaffuryatanneno matak si buyun, nimomatak e sitoye makaitaakun.”
16 Kundeno korwan a Fariseowera, “Na tolay a nangwa sitaw e ammena naggabwat sike Dios, se ammena makimoray si katunungan meafu so Aw na Aggimemmang.”
Udde kunda pay yo korwan ira, “Makaangwa kad yo tata sinaliwat si kunna sitaw a milagruwera? Ammera nassittata.”
17 Antu finuutda imman ino lalaki a dati a bulag, “Nenay yo masapitnu meafu sikwana? Matam keno pinammapiyana.”
Kunneno lalaki, “Tata baggina a profeta!”
18 Udde ammena nangurug ino afu-afuwera na Hudyuwera a bulag iyaw a tolay e sitoye makaiten. Antu nepaayaggeno gagginafannera. 19 Finuutdeno gagginafannera, “Anak diyaw kad iyaw? Gakkurug kad a bulag iyaw sin neyanak baggina? Saay se makaiten baggina sitoye?”
20 Tinumabbag ino gagginafannera, “On, anakmi e neyanak baggina a bulag. 21 Udde ammemi ammu nu kasanna a nakaiten baggina anna nu yanya yo nakapammapiya sikwana. Fuutan diyaw sikwana se manakammin baggina e ammunan a tumabbag para si baggina.” 22 Sinapit iyaw na gagginafannera gumafu se mattalawera so afu-afuwera na Hudyuwera. Nattataretabbanda a seanya yo massapit a i Jesus ino Mesiya a netamba i Dios, ammerana mepabulun a tumallung so sinagoga. 23 Antuweyaw yo gafuna nu saay a sinapit ino gagginafannera, “Anen fustu a dawunnan. Fuutan diyaw baggina.”
24 Antu nepaayagga imman ino lalaki a dati a bulag e kunda sikwana, “Dayawannu i Dios e sapitannuweno kagakkuruwanna. Ammumi a inay a tolay a nappammapiya sikwam e sinaliwat.”
25 Kunneno lalaki, “Ammek ammu nu sinaliwat baggina onnu ammena. Na ammuk lamang e datiak a bulag udde sitoye makaitaakun.”
26 Kunda sikwana, “Nenay yo inangwana sikwam? Kasannana a pinammapiyeno matam?”
27 Tinabbagngera, “Sinapitkun sikwayu e ammerak ke kuruwan. Saay se kanggam diyaw imman a madingngag? Ammeyu ke nakuy kanggam a mattabali si disipuluna.”
28 Pinassalasapitanda baggina e kunda, “Disipulu naka udde disipulu kami i Moises. 29 Ammumi a nabid i Dios sike Moises, udde inay a tolay, ammemi ammu nu sintaw naggabwatanna.”
30 Kunneno lalaki, “Iyan ino kallalaggat! Ammeyu ammu nu sintaw naggabwatanna udde pinammapiyaneno matak. 31 Ammutam a ammena dingngaggan i Dios ino sinaliwat ira udde dingngagganneno maddayaw sikwana anna makimoray si nakamma. 32 Makiyad sin naparatu yo talubaggan, awan kepay a nadingngagtam a tolay a nakapammapiya si mateno tolay a neyanak a bulag. 33 Nu ammena naggabwat inay a tolay sike Dios, ammena makaangwa si milagru.”
34 Kunneno afu-afuwera na Hudyuwera sikwana, “Neyanakka a sinaliwat e sitoye kanggammu a tunturuwan dakami!” Akkabalinna, ammeran dama baggina a patallungan so sinagoga.
Na Ammena Mangurug Meyarig so Bulag
35 Naammuwanna i Jesus a pinaanaweno afu-afuwera na Hudyuwera ino lalaki a pinammapiyana e inintufuknga. Sin natumpalanna, kunna sikwana, “Mangurugka kad si Anak na Tolay?”
36 Kunneno lalaki, “Afu, yanya baggina? Itundum sikwak takesi mangurugak sikwana.”
37 Kunna i Jesus, “Naitamun baggina e kaabidnu sitoye.”
38 Kunneno lalaki, “Afu, mangurugak sikwam.” E naddayaw baggina sike Jesus.
39 Kunna i Jesus, “Inangngak sito lubag takesi nunutangkuweno tolayera, takesi makaiteno bulag ira anna mabulag ino makaitera.”
40 Nadingngag ino korwan a Fariseowera a ana sinay e kunda sikwana, “Bulag kami kad pay?”
41 Kunna i Jesus, “Nu gakkurug a bulag kayu, awan nad liwat diyaw. Udde gumafu se kun diyaw a makaita kayu, ammena kepay napakoman i Dios ino liwa-liwat diyaw.”