Na Pangarig Meafu si Gumappastu si Karneruwera
10
Nangarig i Jesus a nakkun, “Gakkurug yo itunduk sikwayu, yo tolay a ammena tumallung so lenab na paffukukan na karneruwera nu bakkan a munek so korwan a paddalanan e gumakkokot anna tulisan. 2 Udde yo tolay a tumallung so lenab e antu yo gumappastuweno karneruwera. 3 Patallungan ino guwardiyeno lenab e dumandan ino karneruwera so ngaralna. Aya-ayannera si nganda ingkepay anna ilawa-lawannera so paffukukan. 4 Nu nelawannan amminan ino karnenuwera, mapalungu baggina sikwara e dumandan ira sikwana gumafu se ammureno ngaralna. 5 Ammera a dumandan si korwan a tolay, nu bakkan umaroyuwera sikwana gumafu se ammera ammuweno ngaralna.”6 Nangarig i Jesus so tolayera udde ammera naintindiyan ino kanggamma a sapitan.
I Jesus ino Mapiya a Gumappastu
7 Antu nangarig imman i Jesus sikwara, “Gakkurug yo itunduk sikwayu, ikkanak ino pattallungan a paddalanan ino karneruwera. 8 Na napalungu sikwak e gumakkokot anna tulisan ira udde ammera diningngag ino karneruwera. 9 Ikkanak ino pattallungan. Seanya yo tumallung megafu sikwak e matabbutna. Kakunnana yo karneru a makatallung anna makalawan so paffukukan e makaintufuk si pappastuwan. 10 Awan korwan a gakkad ino gumakkokot nu bakkan a makkokot, mamapatay anna manaral. Inangngak takesi matolayera si mapiya a akkatolay a ammena makkurang.
11 “Ikkanak ino mapiya a gumappastu. Na mapiya a gumappastu e iyaddaneno angatna takesi mesalakngeno karnerunera. 12 Na natandanan a manaron si karneruwera a bakkan a gakkurug a gumappastu anna bakkanna akwa iyaw a karneruwera e makkarantut lamang anna anawanna iyawera nu maitaneno simaron a atu a dumatang. Antu dambalan na simaron a atuweno karneruwera e mawwawarak ira. 13 Tamangngannera gumafu se natandanan lamang baggina a manaron si karneruwera e awan a pangikalowna sikwara.
14 “Ikkanak e kakunna yo tata mapiya a gumappastu e ammuk ino karneruk ira e ammurak, 15 kakunna yo pangngammu i Ama sikwak anna pangngammuk sikwana. E iyaddak ino angatku para so karneruk ira. 16 Ana kepay yo korwan a karneruk ira a ammena nelawum sitaw. Maawag pay ammungangkuwera e dingngaggandeno ngaralku. Tattatera amminan a mammu-ammung e ikkanak ino gumappastura.
17 “Iddu-iddukannak i Amak gumafu se iyaddak ino angatku takesi maappaknga iyaw imman. 18 Awan a makaappa si angatku nu bakkan urek ingkepay a iyadda. Ana pakapangwak a iyadda iyaw anna appan keppay. Antuweyaw yo tun a inarasok sike Amak.”
19 Ammena mattatarateno Hudyuwera gumafu so sinapit ira i Jesus. 20 Oddu sikwara a nakkun, “Affu-affunan na demonyu baggina anna mappallaw! Saay se dingngaggan diyaw baggina?”
21 Udde kunda pay yo korwan ira, “Ammena makaabid si kunna sinayeno naaffunan si demonyu! Makapammapiya kad si bulag ino demonyu?”
Ammera Nangurug ino Afu-afuwera na Hudyuwera sike Jesus
22 Sitan a tiyempu, antu yo Fiyesta na Pangidutunga so Jerusalem. Tiyempu na labbat sinoy. 23 Daggun a mallaka-lakad i Jesus so lawan na Templu so Porticob i Solomon. 24 Narimummungan na Hudyuwera baggina e kunda, “Nainsam a itundu sikwamiyeno kagakkuruwanna? Itundum nad sikwami nu ikka i Mesiya a netamba i Dios.”
25 Tinumabbag i Jesus, “Netundukun sikwayu udde ammeyu ke mangurug sikwak. Na inangwak a milagruwera megafu si pakapangwa i Amak, ira yo makaimammat patamu sikwak. 26 Udde ammeyu mangurug sikwak se bakkang kayu a nebilang so karneruk ira. 27 Maningngag sikwak ino karneruk ira. Ammuk ira e dumandan ira sikwak. 28 Indangkuwera si angat a matolay a bulun i Dios amu-amu. Ammera mesina sike Dios anna awan a makafulat sikwara sikwak. 29 Netalak ira sikwak i Amak a makapangwengke si amminan anna awan a makafulat sikwara sike Amak. 30 Ikkanak anni Ama e tattata.”
31 Nampat imman si batuweno afu-afuwera na Hudyuwera takesi lappagganda baggina. 32 Kunna i Jesus sikwara, “Oddu yo mapiya a inangwak sikwayu a nepaangwa i Ama sikwak. Ansa sitawereno gafuna a lappaggandak?”
33 Kunneno afu-afuwera na Hudyuwera, “Ammemika a lappaggan gumafu so mapiya a inangwam ira, nu bakkan so passipittam sike Dios! Toleka lamang udde ikunnam yo baggim sikwana.”
34 Tinumabbag i Jesus, “Nakaturak so katunungan diyaw, ‘Kungku, dios kayu.’c 35 So nakaturak a sapit i Dios, yo dios ira yo ayag so pinattalakkan si sapit i Dios, anna ammenan dama a angkakwan ino sapit i Dios. 36 Pinilinak anna dinundunnak i Ama. Kasannayu sitoye a masapit a passipittangku i Dios gumafu se sinapitku a ikkanak a yo Anak i Dios? 37 Nu ammek akakwan ino ipaangwa i Amak ammerak antu kuruwan. 38 Udde nu akwangkuweno ipaangwa i Amak, maski amme kayu mangurug sikwak, kuruwan diyaweno akakwangkuwera takesi maammuwan anna maintindiyan diyaw a i Ama anna ikkanak e tattata.”
39 Antu pinurebanda imman a gafutan i Jesus, udde nakatamang baggina.