Na Akkapatay i Juan a Gumabbawtismu
14
Sitan keppay a tiyempu, naammuwan i Herodes Antipas a gumattangngal na Galilea ino meafu so inangwa-angwa i Jesus. 2 Kunna so gumasserbinera, “Baggina i Juan a Gumabbawtismu a nantotolay anna antuweyaw yo gafuna a ana pakapangwana a mangwa si milagruwera.”3 Nepagafutna i Herodes i Juan. Nepakawadna anna nepafukuknga baggina gumafu sike Herodias a inatawana sikwana kepay a atawa i wayina a i Felipe. 4 Maumid a tunduwanna i Juan i Herodes Antipas, “Ammena meyannut si katunungantam a maddawum kayuweno atawa i wayim!” 5 Kanggam nad i Herodes a ipapatena i Juan, udde nattalaw baggina so tolayera se ibilangga i Juan a profeta.
6 Udde sin dinumatang ino aw na passelebrar na akkeyanak i Herodes, nanalip ino bafay a anak i Herodias so allangan na bisitanera e naanggamman i Herodes. 7 Antu netambana a iyaddana so sultera maski sanna a kanggamma a arangngan. 8 So annussug na inana, kunneno sultera sike Herodes Antipas, “Kanggammangku a iyaddam sikwak ino ulu i Juan a Gumabbawtismu a nakaiwagga si angngoran!”
9 Narraddam ingke i patul Herodes, udde gumafu se antu yo netambana so sultera so allanganna na bisitanera, nedundunna a akwan ino arangngan na sultera. 10 Antu nepafugutneno ulu i Juan so paffukukan. 11 Na ulu i Juan e newaggat so angngoran anna nedawawa so sultera anna neyaddana pay so inana. 12 Inappeno disipuluwera i Juan ino baggina e netanamda. Nebagara iyaw sike Jesus.
Namakkan i Jesus si Maturuk Limarifu a Tolay
13 Sin naammuwanna i Jesus ino nedemmu sike Juan, nattakay baggina si barangay e inang so lugar a baggina ingkepay a tattata. Udde sin naammuwan ino tolayera a naggabwat so naddadaruma a lubbu-lubbun a nakaanawin i Jesus, nallakad ira paumang so lugar a anganna. 14 Sin ginumaddang i Jesus so dappit, naitaneno odduwengke a tolayera e naallakkan baggina sikwara anna inuruneno matakit ira.
15 Sin gafiyenin, inang ino disipulunera sikwana e kunda, “Awan a bafalay sitaw e mallammukin. Paanawannuweno tolayera takesi umang ira maggatang si akkananda so kaaranniyan a lubbu-lubbun anna tarabbunan.”
16 Kunna i Jesus sikwara, “Ammeran maawag a manaw. Pakkanan diyawera.”
17 Kunda sike Jesus, “Ana lamang lima a tinapay anna adwa a napindang a busilad sitaw.”
18 Kunna i Jesus sikwara, “Iyang diyawera sikwak.” 19 Antu tinunanna i Jesus ino disipulunera a ammungan ino tolayera a mattuttud so kakaddattan. Inappana i Jesus ino lima a tinapay anna adwa a busilad e nattangaw si langit anna nappabalat sike Dios. Anna ginadwa-gadwaneno tinapay e neyaddana so disipulunera tapenu ibunnera so tolayera. 20 E nangngan amminan anna nabattug ira. Inammung ino disipuluwera yo nabuna e napannuweno tafulu adwa a kaba. 21 Ana limarifu a lallakiyereno nangngan, fuwera kepay yo bafabbayera anna abbing ira.
Nallakad i Jesus so Uttun na Danum
22 Siddarat a tinunduwanna i Jesus ino disipulunera a mattakayera so barangay. Inarangnga sikwara a mapalunguweran so tafik na balanaw sikwana a pinaanawneno tolayera. 23 Anna kapiyena pinaanaweno tolayera, inang i Jesus so dangutul a baggina ingkepay a maddasal. Sin massillapin, baggina lamang a tattata sinay. 24 Sitan keppay a orat, aroyuwen ino barangay so dappit a nattakayan ino disipulunera. Nesayyu-sayyuk ino palung ino barangera gumafu so tuyag na leled a dumafung sikwara.
25 Maggibbat baggina a nallaka-lakad paumang sikwara so balanaw. 26 Udde sin naiteno disipuluwera baggina a mallaka-lakad so uttun na danum, natalawan irengke e kunda, “Banig!” Nakkallit ira gumafu so talora.
27 Udde siddarat a kunna i Jesus sikwara, “Patuyaggan diyaweno nakam diyaw! Ikkanak iyaw! Amme kayu mattalaw!”
28 Kunna i Pedro sike Jesus, “Afu, nu gakkurug a ikka iyan, tunannak a umang sikwam so danum.”
29 Kunna i Jesus, “Kataw.”
Dinumassag i Pedro so barangay e nallakad so danum paumang sike Jesus. 30 Udde sin maginnana a matuyag ino leled, natalawan baggina e lumammaddin. Antu naggirawa baggina, “Afu, isalakngak!”
31 Siddarat a nedawawa i Jesus ino kamatna e ginawatna i Pedro e kunna, “Bisang ingkeno angngurugngu sikwak. Saay se mabbabangka?”
32 Sin nakatakayeran adwa so barangay, nimemmak ino leled. 33 Dinayaweno nakatakayera so barangay i Jesus e kunda, “Gakkurug a ikkeno Anak i Dios.”
Pinammapiyana i Jesus ino Matakit a Tolayera so Genesaret
34 Sin nakadammang i Jesus anneno disipulunera, dinumatang ira so lugar na Genesaret. 35 Naimunuwan ino tolayera i Jesus antu pinaayaggeno matakit ira so amminan a katarabbunandera e neyangga sikwana. 36 Anna nakigumallak ira sikwana a senggiranda nad lamang yo lelay na tafálna anna amminan a nanenggid e nammapiya.