Na Katunungan i Dios anneno Gagangay na Tolay
15
Sitan a tiyempu, inang sike Jesus ino Fariseowera anna mapoporay si katunungan a naggabwat so Jerusalem e kunda sikwana, 2 “Saay se yo disipulum ira e ammera tuntulan ino gagangay a netunturu na aggidiyafuwantam ira? Ammera bagguwan ino kamatda liyera mangngan meantu so gagangetam.”3 Tinabbagngera, “Saay se tulyatan diyaweno dundun i Dios gumafu so gagangeyuwera? 4 Se kunna i Dios, ‘Ilawam i amam anni inam,’ anna ‘Seanya yo massapit si maral sike amana onnu inana e maawag a matay.’ 5 Udde ituntu-tunturuyu pay a nu sapitan ino anak so gagginafannera a yo duffun a iyaddana nad sikwara e para sike Dios, 6 ammenan maawag a manuffun sikwara. Ammeyu kinengan ino dundun i Dios gumafu so gagangeyuwera. 7 Mappesimpat kayu! Gakkurug ingkeno nelabbun i Isaias meafu sikwayu sin neturakngeno sinapit i Dios,
8 ‘Daya-dayawandak iyawera a tolayera si sapitda,
udde aroyuweno nakamda sikwak.
9 Awan serbina yo paddayora sikwak
gumafu se sapi-sapitanda a naggabwat sikwak ino ituntu-tunturura udde inoyera e angwa lamang ino tolay.’a”
Na Mappadakkut si Tolay so Allangan i Dios
10 Inayanna imman i Jesus ino tolayera e kunna sikwara, “Maningngag kayu anna intindin diyaweno sapitangku. 11 Bakkan yo tumallung so bifig na tata tolay a mappadakkut sikwana, nu bakkan yo maral a maggabwat so nonotna.”
12 Antu inumaranniyeno disipulunera e kunda sikwana, “Ammem kad ammu a nalowan ino Fariseowera sin nadingngaggeno sinapitnu?”
13 Tinumabbag baggina, “Inoyera a Fariseowera e manilla mulera a ammena nemula i Amak a ana si langit anna masiddutna. 14 Purayan diyawera. Manillera bulag a maggiya si korwan a bulag. Anna nu bulag yo maggiya si kakunnana a bulag, parefu ira a madannag so abbut.”
15 Udde kunna i Pedro sikwana, “Itundum sikwamiyeno kanggamma sapitan ino pangarig.”
16 Antu kunna, “Ammeyu kad kepay a maintindiyan? 17 Ammeyu kad ammu a maski sanna a tumallung so sangiyeno tolay e tumallung so kuyungnga e ilawanna keppay? 18 Udde yo mallawan so sangina e maggabwat si nakamma, antu yo mappadakkut sikwana. 19 Se yo nakam na tolay yo paggabwatan ino maral a ginanakam kakunna yo pamapatay, pakikkarallaw, makidurug si bakkanna atawa, pakkokot, paddakkig anna panandaral si kasittolay. 20 Antuweyawera yo kiya-kiyan a mappadakkut si tolay udde yo mangngan a ammena mamaggu si kamatna a meantu so gagangena e ammena mappadakkut sikwana.”
Na Angngurug na Bafay a Bakkan a Hudyu
21 Nanaw i Jesus so Galilea e inang so aranni a lubbun na Tiro anna Sidon. 22 Ana tata bafay a migigyan sinay a bakkan a Hudyu a taga-Canaan a inang sikwana e pinefunanna a naggira-girawa, “Afu, ikallakngak, ikka i Kristo a gaka i David, inaffunan na demonyuweno anakku a bafay e mapadiyatan ingke.”
23 Udde ammena tinabbag i Jesus ino bafay. Antu inumaranniyeno disipulunera a nakigumallak sikwana e kunda, “Paanawannun takesi ammena a makalli-kallit a dumandan sikwatam.”
24 Tinumabbag baggina, “Nedundunak pelamang a manuffun so Israelitera a manilla nawawan a karneruwera.”
25 Udde inang a nallabba so allanganna e kunna, “Afu, duffunnannak kad ay!”
26 Tinumabbag baggina, “Ammena mepangngat a appan ino akkanan na abbing ira anna itappol so atuwera.”
27 Kunneno bafay, “On, Afu, fustuweno sinapitnu, udde maski yo atuwera akkanandeno butta a madarannag so dulang na afura.”
28 Antu kunna i Jesus sikwana, “Dokal ingkeno angngurugngu! Meyadda sikwam ino ara-arangngannu.” E siddarat a nammapiyen ino anaknga a bafay.
Pinammapiyana i Jesus ino Oddu a Tolayera
29 Kapiyena nanaw i Jesus sitan a lugar, nattalebad baggina so idag na Balanaw na Galilea. Nunek baggina so dangutul e nattuttud sinay. 30 Odduwengke a tolayera a inang sikwana a nangiyang ira si pilay, ammena makalakad, bulag, gumal anna oddu kepay a matakit ira anna neyangga so allanganna e pinammapiyanera. 31 Nalaggat ino tolayera sin naitara a makasapitin ino gumal ira, ino ammena makalakad anneno pilayera e nakalakarin anna nakaiten ino bulag ira. E dinayoreno Dios na Israel.
Pinakkanna i Jesus ino Appat a Rifu a Tolayera
32 Inayanna i Jesus ino disipulunera e kunna, “Maallakkanak so tolayera gumafu se tallu awin a bulungkuwera e awan a maakkanda. Ammek ira kanggam a paanawan a mabisin tantaro mabbanilawera so dalan.”
33 Kunneno disipulunera sikwana, “Sintaw pangappantam si maffustu a maakkan ino odduwengke a tolayera sitaw a lugar a aroyu so lubbu-lubbun?”
34 Finuutna i Jesus sikwara, “Pigyeno tinapay a ana sikwayu?”
Kunda, “Pitu, anna ana kepay pigya a bawissang a busilad.”
35 Antu dinundunna i Jesus ino tolayera a mattuttud so lubag. 36 Inappaneno pitu a tinapay anneno busilad, nappabala-balat sike Dios, ginadwa-gadwaneno tinapay e neyaddana so disipulunera anna nebunnera so tolayera. 37 Nangngan ira amminan e nabattug ira, inammunggeno nabuna a maakkan, pitu a kaba ino napannu. 38 Appat a rifu a lallakiyereno nangngan fuwera yo abbing ira anna bafabbayera.
39 Kapiyena pinaanaw i Jesus ino tolayera, nattakay baggina anneno disipulunera so barangay e inang ira so lubbun na Magadan.b