Naarangngan si Pemunuwan i Jesus
16
Inang ino Fariseowera anna Saduseowera sike Jesus se kanggamda a pureban baggina. Nabu, inarangga a mappaita baggina sikwara si milagru a maggabwat sike Dios.2 Kunna i Jesus sikwara, “Nu gafiyenin, kun diyaw, ‘Mapiya yo tiyempu nu massillapin e mallibageno kalawatan.’ 3 Anna nu daramat pay e kun diyaw, ‘Muran sitoye gumafu se malammuk ino langit.’ Nu memunuwan diyaweno pemunuwan ira na kalawatan anna lubag, saay se ammeyu maintindiyan ino kanggamma sapitan ino pemunuwan ira a ipaita i Dios sitoye? 4 Maral kayu a diyafuwan anna amme kayu makurug sike Dios. Mara-arang kayu si milagru udde awan mepaitak sikwayu fuwera so milagru a kakunna yo nedemmu sike profeta Jonas siin nabayagin a tiyempu.” Antu nebattangngera i Jesus e nanaw.
Na Labadura na Fariseowera anna Saduseowera
5 Sin naddammang ino disipuluwera i Jesus so balanaw, nakalyawanda a nangikangkalin si maski sanna a tinapay. 6 Kunna i Jesus sikwara, “Malertu anna mimud kayu so labadura na Fariseowera anna Saduseowera.”
7 Nattataretabbag ira, “Sinapitna inay se ammetam nangikangkalin si maski sanna a tinapay.”
8 Ammunan i Jesus ino pattataretabbanda e kunna, “Ikkayu a bisang a angngurugnga. Saay se pattataretabban diyaweno ammeyu pangikangkalin si tinapay? 9 Ammeyu kad kepay maintindiyan makiyad sitoye? Ammeyu kad a madandam ino lima a tinapay para so limarifu a tolayera anna pigya a kaba yo pinannuyu si nabuna a tinapay? 10 Onnu yo pitu a tinapay para so appat a rifu a tolayera? Anna pigya a kaba yo pinannuyu si nabuna a tinapay? 11 Saay ammeyu kepay maintindiyan a bakkan ino tinapay yo sinapi-sapitku sikwayu? Mimud kayu so tunturuwera na Fariseowera anna Saduseowera a manillera labadura a malan maakkatan!”
12 Antu naintindiyanda a ammena netundu sikwara a mimud ira so labadura na tinapay, udde na sasan-tunturu na Fariseowera anna Saduseowera a malan a mewarak manilla labadura.
Na Pappakaammu i Pedro meafu so Akkatolay i Jesus
13 Sin dinumatang i Jesus so lubbun na Cesarea Filipos, finuutneno disipulunera, “Yanyaak so tolayera, ikkanak a yo Anak na Tolay?”
14 Tinumabbag ira, “Kundeno korwan se ikka i Juan a Gumabbawtismu. Kundeno korwan a tolayera a ikka i Elias anna kunda pay yo korwan ira a ikka i Jeremias onnu tata so korwan a profeta.”
15 Kunna sikwara, “Ikkayu pay ay, yanyaak sikwayu?”
16 Tinumabbag i Simon Pedro, “Ikka i Mesiya, yo Anak i Dios a aggatolay.”
17 Kunna i Jesus sikwana, “Mapiya sikwam, Simon a anak i Jonas se bakkan a tolayeno nangitundu sikwam sito kagakkuruwan udde naggabwat sike Amak si langit. 18 E antu itunduk sikwam, ikka i Pedro e sitaw a batu, pataddaggangkuneno assimbangku a binukal inoyera a mangurug sikwak anna maski yo pakapangwa na patay e ammenana maaffut. 19 Iyaddaknga sikwam ino alladduwera na pattangngalan na langit, anna maski nenay yo iyallangngu a akwan ino tolayera sito lubag e neyallangin i Dios a ana si langit anna maski nenay yo iyannutnu sito lubag e neyannutin i Dios a ana si langit.”
20 Antu nengangngad a tinunanna i Jesus ino disipulunera a ammera itundu si maski yanya a tolay a baggina i Mesiya.
Nepakaammuna i Jesus ino Akkapatena anna Panantotolena
21 Mamefu sinoy a tiyempu, nepakaammuna i Jesus so disipulunera a maawag a umang baggina so Jerusalem anna massufriyengke anna pammayan ino manannakam na Hudyuwera, afu-afu a pariyera anneno mapoporay si katunungan anna ipapateraknga udde akkabalinna tallu aw mantotolayaknga. 22 E neyaroyuna i Pedro i Jesus anna pinassapitanna baggina a nakkun, “Afu, ammena nad a iyannut i Dios! Ammenengkena makwa iyan sikwam.”
23 Udde tinallangnga i Jesus i Pedro e kunna, “Aroyuwannak, Satanas! Fuwaddannak a akwan ino uray i Dios. Bakkan a uray i Dios ino nono-nonotannu udde urayeno tolayera.”
Na Paddandan sike Jesus
24 Antu netunduna i Jesus so disipulunera, “Nu ana manggam a mattabali si gumaladandangku, anawanneno panggammanna a akwan anna kinaaw a ibali-balinna a mangurug sikwak maski nu antuweyan yo pakegafuwan a passufrina anna akkapatena. 25 Seanya yo mangikenga pelamang si angatna e ammena matolay a bulun i Dios amu-amu anna seanya yo manggam a matay maipegafu sikwak e matolena a bulun i Dios amu-amu. 26 Nenay kad mapiya a maappeno tata tolay maski nu akwana amminan a wara-wara sito talubaggan udde ammena matolay a bulun i Dios amu-amu? Onnu nenay kad a meyaddana a panali si angatna a bulun i Dios amu-amu? 27 Se ikkanak a yo Anak na Tolay e aranniyen a muli sito talubaggan si kadayawan i Amak. Bulungkuweno anghelnera anna siggatatan sikwayu e indannana i Amak si pammakapiyan meantu so inangwayu. 28 Gakkurug yo itunduk sikwayu, ana korwan a mattadda-taddag sitaw a ammerana matay makiyad si ammeraknga maita a yo Anak na Tolay a manangngal.”