Na Pangangkakwa na Baggi i Jesus
17
Akkabalinna annam a aw, nebulunna i Jesus da Pedro anneno mawwayi a Santiago anni Juan e inang ira so atannang a bakulud a ira-ira pelamang. 2 Sinay, nangangkakweno baggi i Jesus. Nabbaggaweno mutungnga a manilla sinag anna mangngilikilit a naffuraweno barasina. 3 Lannat a nappaddera i Moises anni Elias sike Jesus e kinatetabbagga baggina. 4 Kunna i Pedro sike Jesus, “Afu, mapiya se ana etam sitaw! Nu kanggammu, mangwaak si tallu a pimemmangan, tata para sikwam, tata para sike Moises anna tata para sike Elias.”5 Massapi-sapit kepay i Pedro sin nasiyongan ira si mabaggaw a dulam anna nadingngaggeno tata ngaral a naggabwat so dulam a nakkun, “Antuweyaw yo Anakku a iddu-iddukangku. Pakaanggammangkuwengke baggina. Maningngag kayu sikwana!” 6 Sin nadingngag iyaweno disipuluwera, nallabbera so lubag e natalawan irengke.
7 Udde inaranniyandera i Jesus anna sinenggidnera e kunna, “Gumumbwat kayu! Amme kayu mattalaw!” 8 Sin nattangawera, awan korwan a naitara nu bakkan i Jesus lamang.
9 Dengkera a dumolam so bakulud, tinunandera i Jesus, “Awan korwan a pangitunduwan diyaw so naitayu makiyad si ikkanak a yo Anak na Tolay e mantotolena.”
10 Naffuut ino disipuluwera sikwana, “Saay se sinapit ino mapoporay si katunungan a maawag a mapalungu i Elias liyena dumatang i Mesiya?”
11 Tinabbagngera, “Gakkurug a mapalungu abbu a dumatang i Elias takesi pinangayanna amminan a nangidundunangku sikwana a akwanna. 12 Udde itunduk sikwayu a dinumatangngin i Elias e ammera naimunuwan baggina udde inangwara sikwaneno kanggammanda a akwan. Kakunna keppay padiyatandaknga a yo Anak na Tolay.”
13 Antu naintindiyan ino disipuluwera a sin nassapit i Jesus meafu sike Elias, i Juan a Gumabbawtismu yo sapi-sapitanna.
Pinammapiyana i Jesus ino Abbing a Lalaki a Naaffunan si Demonyu
14 Sin nuli da Jesus anneno disipuluwera so tolayera, ana tata lalaki a inumaranni sike Jesus e nammalitud so allanganna 15 e kunna, “Afu, ikallakngu kad yo anakku a lalaki se makkarawwat baggina e nadiyatan ingkein. Maumid baggina a madannag so afuy anna so danum. 16 Antu neyangku baggina so disipulum ira udde ammera a napammapiya baggina.”
17 Kunna i Jesus sikwara, “Ikkayu a diyafuwan sitoye, awan angngurug diyaw anna ammeyu ammuweno fustu onnu bakkan a fustu. Kasanna kad ingke kabayag yo pagyangku onnu pàattamku sikwayu? Iyang diyaw baggina sikwak.” 18 Pinassapitanna i Jesus ino demonyu antu nallawan so inaffunanna a anak e siddarat a nammapiya baggina.
19 Akkabalinna, inang ino disipuluwera sike Jesus a awan ingke nakaammu e kunda, “Saay se ammemi a mapaanaw yo demonyu?”
20 Tinabbagngera, “Gumafu se makurang kayu si angngurug. Gakkurug yo itunduk sikwayu, nu ana angngurug diyaw a manilla yo bisang ingke a bukal, itunduyuna sitaw a bakulud, ‘Makkatka sinay’ e makkatna anna awan a ammeyu dama a akwan. 21 Ammeyu mapaanaw iyan a garannud na demonyu udde megafu lamang si dasal anna angngilin.”
Nepakaammuna Imman i Jesus ino Akkapatena anna Panantotolena
22 Dengke a nammu-ammung ino disipuluwera so Galilea, kunna i Jesus sikwara, “Ikkanak a yo Anak na Tolay e medawawana so tolayera, 23 anna papatayandaknga udde so meka-tallu aw mantotolayaknga.” Antu narraddam irengke.
Na Pappaga i Jesus si Biyenes para so Templu
24 Sin nakadutung ira so Capernaum, inumaranniyeno gumattukiyera si biyenes sike Pedro e kunda sikwana, “Mappaga-paga kad yo mestruyu si biyenes para so Templu?”
25 Kunna, “On, mappaga-paga baggina.”
Antu sin ginumumwang baggina so balera, finuut baggina i Jesus, “Simon, nenay masapitnu? Yanya yo maawag a mappaga si biyenes so patul na tata talubbunan, yo tolayera kad a migigyan sinay a lugar onnu yo ipping ira?”
26 Kunna i Pedro, “Naggabwat so ipping ira.”
Kunna i Jesus sikwana, “Antu yo tolayera a migigyan sinay a lugar e ammera maawag a mappaga. 27 Udde takesi ammerana makaallang sikwata, umangka so balanaw e mabbanwetka. Appannuweno palungu a busilad a magafutnu, bukkatannuweno bifignga anna maitam ino tata pirak a maffustu a pappaga si biyenesta adwa.”