Na Pattallung i Jesus so Jerusalem
21
Sin aranniyen da Jesus anneno disipulunera so Jerusalem anna nakadutung ira so Betfage so idagngeno Dangutul na kakayuwan a Olibu, nepapalunguna i Jesus ino adwa a disipulunera.2 Kunna sikwara, “Umang kayu so tarabbunan a metufad sikwayu e siddarat a matumpalan diyawneno nakasiggut a asno anneno ubbunna. Uttaran diyawera e iyang diyawera sikwak. 3 Se nu ana maffuut sikwayu, kunna sitaweno itunduyuna sikwana, ‘Maawag inayera i Afu e siddarat a itolinanera.”
4 Nedemmu iyaw tapenu maparulot ino sinapitna i Dios so profeta a nakkun,
5 “Itunduyu so tolayera na Jerusalema.
Maningngag kayu, umangngin sikwayuweno patul diyaw.
mattaibbafa baggina anna nakatakay so ubbun a asno.”
6 Antu inang ino disipulunera anna inangwara yo netunduna i Jesus sikwara. 7 Neyangga sike Jesus ino asno anneno ubbunna. Inappinanda si tafáldeno asnowera e nattakay i Jesus sitaw. 8 Odduwengke a tolayera a nangiyappin si tafáldera so dalan. Nakkattuweno korwan a tolayera si panga-panga na kayuwera e newarannakda pay so dalan. 9 Na tolayera a napalungu sikwana anneno dinumandan sikwana e naggira-girawa,
“Hosannab so gaka i David!
Mapiya i Dios sikwana a dumatang si pakapangwa i Afu!
Hosanna a ana si kaatannangan si langit!”
10 Sin tinumallung i Jesus so lubbun na Jerusalem, nakkagulu amminan ino tolayera so lubbun. Finuutda, “Yanya iyaw?”
11 Tinumabbag ino tolayera, “Iyaw i Jesus a profeta a taga-Nazaret so lubbun na Galilea.”
Pinatamangnga i Jesus ino Gumallakuwera a Ana so Templu
12 Inang i Jesus so lawan na Templu e pinatamangngeno gumallakuwera anneno gumaggatang ira sinay. Binakolluneno lamesera na gumattaliyera si pirak anneno pattutturan na gumallakuwera si guruk ira. 13 Kunna sikwara, “Neturak so sapit i Dios a kunna,
‘Na balek e maayanna si balay a paddasallan na tolayera.’c
Udde inangwayu si pattawan na gumakkokot ira.”d
14 Inang ino pilayera anneno bulag ira sike Jesus so Templu e pinammapiyanera. 15 Nakaallang ino afu-afu a pariyera anneno mapoporay si katunungan sin naitareno kakkapallat a milagruwera a inangwa i Jesus anna nadingngaggeno abbing ira a maggira-girawa so Templu a nakkun, “Madayaw i Dios so gaka i David!”
16 Finuutda i Jesus, “Madingngagnguweno sapi-sapitanda?”
Kunna i Jesus sikwara, “On, ammeyu kad a nabibbid ino neturak a sapit i Dios? ‘Tinunturuwanna i Dios ino abbing ira anneno kalubit ira a maddayaw si fustu sikwam.’e ”
17 Inanawannera i Jesus sinay a lubbun e nuli baggina so Betania takesi midda sinay.
Na Nakalakammu so Kayu a Igos
18 Si kadaddaramatanna, sin nuli i Jesus so Jerusalem, nabisinan baggina. 19 Sin naitaneno tata kayu a igos so idag na dalan, inaranniyanna udde awan ingke naitana a bungana udde passi dōn. E kunna so kayu, “Ammekanna mamunga!” Siddarat a nanguweno kayu a igos.
20 Sin naiteno disipulunera iyaw, nalaggat ira e kunda, “Kasanna a siddarat a nanguweno kayu a igos?”
21 Tinumabbag i Jesus, “Gakkurug yo itunduk sikwayu, nu ana angngurug diyaw sike Dios anna amme kayu mabbabang, maangwayu pay kakunna yo inangwak sitaw a kayu. Bakkan lamang iyan, udde damayu a sapitan sitaw a bakulud, ‘Metulluka anna metappolka so bebay,’ e gakkurugnga a medemmu. 22 Nu maddasal kayu a ana angngurug, maarasoyuna amminan a arangngan diyaw.”
Na Fuut meafu so Pakandama i Jesus
23 Sin nuli i Jesus so Templu, inumaranni sikwaneno afu-afu a pariyera anneno manannakam na Hudyuwera sikwana a manuntu-tunturu e kunda, “Sintaw naggabwatanna yo pakandamam a akwan iyawera a kiya-kiyan? Yanya yo nangadda sikwam sitaw a pakandama?”
24 Kunna i Jesus sikwara, “Fuutangku pay sikwayu. Nu tabban diyaweno fuutku, itunduk pay sikwayu nu sintaw a naggabwatan ino pakandamak. 25 Itunduyu sikwak nu sintaw nangappan i Juan si pakandamana a mabbawtismu? Sike Dios kad onnu si tolayera?”
Anna nattataretabbag ira e kunda, “Nu kuntam a naggabwat sike Dios, kunnana sikwatam, ‘Saay se amme kayu nangurug sikwana?’ 26 Udde nu kuntam, ‘Naggabwat so tolayera,’ mattalaw etam so tolayera gumafu se mangurug ira amminan a i Juan e gakkurug a profeta.”
27 Antu tinabbagga i Jesus, “Ammemi ammu nu sintaw a naggabwatanna.”
Kunna pay i Jesus sikwara, “Ammek pay antu itundu sikwayu nu yanya yo nangadda si pakandamak a mangwa sitawera a kiya-kiyan.”
Na Pangarig meafu so Adwa Anak a Lalaki
28 “Nenay a mekun diyaw sitaw a pangarig? Ana ama a ana adwa a anaknga a lallakiyera. Inang baggina so palungu e kunna, ‘Anakku, umangka e mattarabafuka so kaubasan sitoye.’ 29 ‘Ammek!’, kunneno anak, udde ammena nabbayag nangangkakweno nonotna e inang keppay a nattarabafu so kaubasan. 30 Inang ino ama so meka-adwa a anaknga e parefu keppay yo sinapitna so palungu a anaknga. Tinumabbag baggina, ‘On, ama, umangak,’ udde ammena inang.
31 “Ansa so adwa a nangwa so panggamman na amara?”
Kunda, “Na palungu.”
Kunna i Jesus sikwara, “Gakkurug yo itunduk sikwayu, ino gumattukiyera si biyenes anneno mapagan a bafabbayera e ira yo mapalungu sikwayu a tangngallan i Dios. 32 Se inang sikwayu i Juan a Gumabbawtismu anna netunturuna sikwayuweno mapiya a akkatolay udde amme kayu nangurug sikwana udde yo gumattukiyera si biyenes anneno mapagan a bafabbayera e nangurug sikwana. Anna maski naitayuweno inangwara, amme kayu nabboboli anna nangurug sikwana.”
Na Pangarig na Maral a Katalak ira na Kaubasan
33 Nangarig imman i Jesus so tolayera a nakkun, “Ana tata tolay a nammula si oddu a ubas so umana. Nilasanganna si batuweno pallebutanna anna nabbut baggina si pangipappattanda si ubas tapenu maappeno danumma anna namataddag baggina si atannang a passiyongan a batu para so gumabbantay so uma. Akkabalinna, pinaabangnga iyaw so katalak ira na kaubasan anna inang baggina so korwan a talubbunan. 34 Sin dinumatang ino tiyempu na pabbuwat, dinundun ino makan-lubag ino imbutnera so katalak ira tapenu appan ino ballena. 35 Udde yo katalak ira e finuwersara a inappeno imbutnera, pinalukdeno tata sikwara anna pinapatereno meka-adwa anna nilappaggeno meka-tallu. 36 Nangidundun imman ino makan-akwa so kaubasan si mas oddu a imbut ira ammat so palungu udde kakunna keppay yo inangwara sikwara. 37 Udde ammena nabbayag, dinundunneno anaknga sikwara a nakkun, ‘Ilawareno anakku.’ 38 Udde sin naiteno katalak ira yo anak ino makan-akwa so kaubasan, kunda si siggatatan, ‘Antuweyaw yo marensiya so kaubasan! Kayutaw, patayantam baggina e appantam ino erensiyanna.’ 39 Antu finuwersara a inappa anna netappolda baggina so lawan na kaubasan e pinatera.
40 “Antu sin ginumumwang ino makan-akwa so kaubasan, nenay yo akwanna so katalak ira?”
41 Kunda sikwana, “Ipapurebana so maral a katalak ira yo madammat ingke a patay. Antu ipaabangnganeno kaubasan so korwan a katalak ira a mangaddana sikwana si ballena nu tiyempu na aggani.”
42 Kunna i Jesus sikwara, “Ammeyu kad nabibbid ino kunna so neturak a sapit i Dios?
‘Na batu a inammayan ino gumappataddag ira si balay,
antu yo nattabali si gakkurug a fundasyon na balay.
Inangwa iyaw i Afu,
e kallalaggat so aggitatam.’f
43 “Kunnantu a itunduk sikwayu, ammenana kayu a ilawum i Dios so tolayera a tangngallanna udde inoyera lamang a mangwa si panggammanna. 44 Seanya yo madannag sitaw a batu e magure-guremaknga anneno madannaganna e maburi-burifugnga a manilla girafuk.”