Na Pangarig na Gumattarabafuwera so Kaubasan
20
Nebalinna i Jesus a nakkun, “Na pattangngalan i Dios e mekunna si tata tolay a ana kaubasanna a naggibbat a nintufuk si gumattarabafuwera a matandanan so kaubasanna. 2 Sin inumannung ira so nakagagangayan a paga si tata aw, pinaumangngeno gumattarabafuwera so kaubasanna.3 “Sin alas nuwebe si daddaramat, inang baggina so merkado e naitaneno korwan a lallakiyera a nakataddag a awan akakwanda. 4 Kunna sikwara, ‘Umang kayu pay a mattarabafu so kaubasan e pagan takayuna si fustu.’ Antu inang ira. 5 Sin nallawan imman baggina si mattangnganaw anna màalastres, kakunna keppay yo inangwana a nayag si korwan a gumattarabafuwera. 6 Sin màalassingkuwen si fuwab, nallawan baggina e naitana imman ino korwan a lallakiyera a nakataddag a awan akakwanda. Kunna sikwara, ‘Saay se makkataw kayu a nakataddag sitaw a awan akakwan diyaw?’ 7 Tinumabbag ira, ‘Awan nanandan sikwami.’ Kunna sikwara, ‘Umang kayu pay mattarabafu so kaubasan.’
8 “Sin massillapin, sinapit ino makan-akwa so kaubasan so gumappasingkalna, ‘Ayannuweno gumattarabafuwera e iyaddam ino tandanda. Palungunnuweno nauddiyera a natandanan anna pauddinnuweno napalunguwera a natandanan.’ 9 Sin ginumumwang ino gumattarabafuwera a namefu a mattarabafu si màalasingku si fuwab, sittatera a napagan si nakagagangayan a paga si tata aw. 10 Sin dinumatang ino napalunguwera a nattarabafu, arigga a makaarasawera si oddu udde sittata sikwara e napagan pay si nakagagangayan a paga si tata aw. 11 Inarasoreno tandanda udde nangngunu-ngunuwera metulyat so makan-akwa so kaubasan. 12 Kunda, ‘Nattarabafu lamang si tata orat ino nauddiyera udde pinapparefum ino tandammi a nadiyatan a nattarabafu si makkataw anna nasina-sinaggang kami.’
13 Kunneno makan-akwa so kaubasan, ‘Wayi, amme takayu dinarogat. Inumannung kayu a mangarasaw si nakagagangayan a paga si tata aw. 14 Appan diyaweno tandan diyaw e manaw kayun. Pinapparefuk ino tandan ino nauddi a gumattarabafuwera so tandan diyaw se antu yo kanggammangku a akwan. 15 Awan kad damaramak nu nenay yo akwangku so pirakku? Onnu mapassil kayu gumafu se minaggiyaddaak?’
16 “Nabu, inoyera a mauddi e mapalunguna, anna inoyera a mapalungu e mauddina.”
Na Meka-tallu a Pappakaammu i Jesus meafu so Akkapatena anneno Panantotolena
17 Sin paumang i Jesus so Jerusalem, kinaabidneno tafulu adwa a disipuluwera a ira-ira pelamang so dalan e kunna sikwara, 18 “Maningngag kayu! Umang etam so Jerusalem anna ikkanak a yo Anak na Tolay e medawawana so afu-afu a pariyera anna so mapoporay si katunungan e sentensiyandaknga a matay, 19 anna idawawaraknga so bakkan a Hudyuwera. Yoyungandaknga, lassi-lassitandaknga anna ipapatakdaknga so kurut udde mantotolayaknga so meka-tallu a aw.”
Na Arangngan ino Inara i Santiago anni Juan
20 Inang sike Jesus ino atawa i Zebedeo bulunneno adwa a anakngera e nammalitud baggina so allangnga anna narang si fabor.
21 Finuutna i Jesus, “Nenay kanggammu?”
Tinumabbag ino ina, “Iyannutnuweno adwa anakku a lallakiyera a makituttud sikwam, tata so diwanannu anna tata so dawirim so pattangngalannu.”
22 Udde kunna i Jesus sikwara, “Ammeyu ammuweno ara-arangngan diyaw. Damayu kad a attamman ino passufriyera a medemmuna sikwak?”
Netabbagga, “On, damami,”
23 Antu kunna i Jesus sikwara, “Gakkurug a yo passufri a medemmuna sikwak e mapureban diyaw pena anna maattamman udde yo mattuttudna so diwanangku anna so dawirik, awan pakandamak a mappili se piniliyen i Amak inoyera a mattuttud sinay.”
24 Sin nadingngag iyaweno tafulu a disipuluwera, nakaallang ira so mawwayi. 25 Udde inayannera amminan i Jesus e kunna sikwara, “Ammuyu a inoyera a afu-afu na bakkan a Hudyuwera e nappadiyat so inoyera a tangngallanda anna inoyera a dammak e ifuwersara a ilillin a ira yo matuntul. 26 Udde ammena nad a kunna sitan ino akwan diyaw. Seanya sikwayuweno manggam a kaawan ingke, maawag a masserbi baggina sikwayu. 27 Anna seanya sikwayu manggam a mattabali si afu-afu, maawag a masserbi baggina sikwayu. 28 Se ikkanak a yo Anak na Tolay e ammek inang sito talubaggan a mappaserbi udde masserbi anna matay takesi oddu a tolayera a matubbutna so akkakastigura so liwa-liwatda.”
Pinammapiyana i Jesus ino Adwa a Bulag a Mammalimut
29 Dengke a mana-anaw i Jesus anneno disipulunera so Jerico, odduwengke a tolayera a dinumandan sikwara. 30 Ana adwa a lallakiyera a bulag a nakatuttud so idag na dalan. E sin nadingngagga a nattalebad i Jesus, naggirawera a nakkun, “Afu, gaka i Davida, ikallak dakami!” 31 Nengangngad a tinunan ino tolayera a mimammak ira. Udde annanot a negirawara a nakkun, “Afu, gaka i David, ikallak dakami!”
32 E nimemmak i Jesus anna inayannera a nakkun, “Nenay kanggam diyaw a akwangku sikwayu?”
33 Kunda, “Afu, kanggammi a makaita!”
34 Naallakkan i Jesus sikwara e sinenggidneno matara. Siddarat a nakaiteran e dinumandan ira sikwana.