Na Tunturuwera i Jesus meafu si Akkatway
19
Sin nabalinna a nanunturu i Jesus, nanaw baggina anneno disipulunera so Galilea e inang ira so lubbu-lubbun na Judea so lampas na māt na Jordan. 2 Oddu yo tolayera a dinumandan sikwana e pinammapiyaneno matakit a tolayera sinay.3 Inumaranni sikwaneno korwan a Fariseowera a mamureba sikwana e naffuut ira, “Meyannut kad si katunungantam a yo lalaki e damana a ikatwayeno atawana maski sanna a gafu?”
4 Tinumabbag i Jesus, “Ammeyu kad nabibbid a sin pefuna pinaratuna i Dios yo tolay a lalaki anna bafay. 5 E kunna pay i Dios, ‘Antuweyaw yo gafuna a anawannaneno lalaki yo gagginafannera e makidagga so atawana anneno adwa e mattatenna.’ 6 Antu ammeran adwa udde tata baggi. Kunnantu, nu nenay yo pinattata i Dios awan damana a mappakatway sikwara.”
7 Finuut ino Fariseowera sikwana, “Saay se nedundunna i Moises sikwatam a indan ino lalaki yo atawana si katurakkan a pakaitan a nakkatwayera liyena paanawan?”
8 Kunna i Jesus, “Gumafu se mataggat ingkeno ureyu, nangwa i Moises si katunungan na akkatway na matawa udde sin palunguna bakkan a kunna sinay. 9 Antu sapitangku iyaw sikwayu, seanya yo mangikatway so atawana a bafay anna mangatawa si korwan e makaliwat si pakikkarallaw, fuwera nu nillokuweno atawana.”
10 Netunduweno disipulunera sikwana, “Nu kunna sitan yo akwan ino lalaki si atawana, mas mapiya kepay a ammena mangatawa.”
11 Udde kunna i Jesus sikwara, “Bakkan amminan a tolayera e damana mangarasaw sitaw a panunturu udde sikwara pelamang a naindan i Dios si pannakadama a ammera matawa. 12 Naddadarumeno gafuna nu saay se ammena mangataweno lallakiyera. Ana korwan ira a neyanak a lupat anna ana pay korwan ira a kinafun ino kasittolera anneno korwan ira e ammera natawa gumafu se panggammanda a masserbi so pattangngalan i Dios. Maawag a arasawan ino tolay a makaintindi sitaw a annunturu.”
I Jesus anneno Abbing ira
13 Ana tolayera a nangiyang si abbinggera sike Jesus tapenu ipotunneno kamatna sikwara anna idasallannera. Pinallangngan ino disipuluwera yo tolayera. 14 Udde kunna i Jesus sikwara, “Purayan diyaweno abbing ira a umang sikwak. Ammeyuwera fuwaddan a umang sikwak se yo kakunnareno mebilang so pattangngalan i Dios.” 15 E nepotunneno kamatna sikwara liyena nanaw.
Na Dammak a Lalaki
16 Inumaranniyeno tata sulteru sike Jesus e naffuut sikwana, “Mestru, nenay mapiya a tadda a maawag a akwangku takesi matolayaknga a bulun i Dios amu-amu?”
17 “Saay se fuutannu sikwak nu nenayeno mapiya?” Kunna i Jesus sikwana, “Tata pelamang ino mapiya. Nu kanggammu a matolay a bulun i Dios amu-amu, makimoreka so dundun ira i Afu.”
18 Naffuut imman baggina.“Ansa-ansera sinay?”
Anna kunna i Jesus, “Ammeka mamapatay, ammeka makikkarallaw, ammeka makkokot, ammeka maddakkig. 19 Dayawannu i amam anni inam anna iddukannuweno kasittolem kakunna yo piddukngu si baggim ingkepay.”
20 Tinumabbag ino sulteru, “Naangwakun amminan a inarangga sikwak a makwa. Nenay kad kepay yo makurang sikwak?”
21 Kunna i Jesus sikwana, “Nu kanggammu a awan pakkurangannu, umangka e ilakum amminan a pakkukwam ira. Iyaddam amminan so madidiyat ino nallakkuwannuwera e maindangkana si wara-wara si langit. Nu maangwam iyan, mulika e dandanannak.”
22 Sin nadingngag iyaweno sulteru, nanaw baggina a maraddam ingke gumafu se oddu yo pakkukwanera sito lubag.
23 Kunna imman i Jesus so disipulunera, “Gakkurug yo itunduk sikwayu, madiyat ingke si tata dammak a mebilang so pattangngalan i Dios.” 24 Kakunna keppay, Itunduk sikwayu, mas malonggon a tumallung ino kamelyu so abbut na bilat ammat si tata dammak a mappatangngal sike Dios.”
Na Matabbut Ira
25 Nalaggat ino disipuluwera sin nadingngagga iyaw. Finuutda, “Danya yo matabbut antu ay?”
26 Initanera i Jesus e kunna sikwara, “Na ammena dama makweno tolayera e dama makwa amminan i Dios.”
27 Nassapit i Pedro, “Dengke sikwami, inanawammi amminan e dinandanammika. Nenay pena para sikwami?”
28 Kunna imman i Jesus sikwara, “Gakkurug yo itunduk sikwayu, so paddatang na bawu a talubaggan, maitaneno kadayawangku nu ikkanak a yo Anak na Tolay e mattuttudna so tronok a mattangngal. Anna ikkayu a dinumandan sikwak e mattuttud pena so tafulu adwa a tronowera a mannunut so tafulu adwa a tribuwera na Israel. 29 Anna amminan a inanawandeno balera, wawwayirera, gagginafandera, anna anakdera onnu lubaggera maipegafu sikwak e makaarasawna si mamintatut kepay sitawera anna matolayera pena a bulun i Dios amu-amu. 30 Udde odduna yo palunguwera a mauddina, anna odduna yo mauddi pay a mapalunguna.”