Na Pangarig meafu so Mangilloku a Katalak
16
Kunna i Jesus so disipulunera, “Ana tata dammak a ana katalaknga. Ana nangitundu so dammak se ufu-ufutan na katalakngeno pakkukwanera. 2 Antu pinaayanneno katalaknga e finuutna sikwana, ‘Nenay iyaw a madingnga-dingngagku meafu sikwam? Iyaddam amminan sikwak ino allistan a netalakku sikwam se arin takan so tarabafum.’3 “Kunneno katalak so baggina, ‘Nenay yo akwangku? Arinnakun ino amuk so tarabafuk. Makafuyak ingke a mattarabafu so uma anna maatallak a mallimut. 4 Ammukun yo akwangku! Nu gangngaryan a maariyakun so tarabafuk, arasawandak keppay yo tolayera so bafalera.’
5 “Sin inayanna a sittateno nakagatut ira so amuna, finuutna so palungu, ‘Pigyeno gatutnu so amuk?’ 6 Tinumabbag baggina, ‘Tatut a buwoda a lana a olibu.’ Kunneno katalak, ‘Palanannu! Appannuweno nakaiturakkanneno gatutnu. Taliyannu anna angwannu si limafulu.’
7 “Kunnapay so meka-adwa, ‘Pigya pay yo gatutnu?’ ‘Tatut a kaban na trigu’ netabbag ino tolay sikwana. Kunneno katalak, ‘Appannuweno katurakkan na gatutnu e iturakngu si waluwatut.’
8 “Sin naammuwan ino amu yo inangweno madarogat a katalaknga, dinayawneno katalaknga gumafu so kinaporena. Gumafu se yo tolayera a awan angngurugga sitoye a tiyempu e mas maporay a mangiyusa si kiya-kiyan sito lubag ammat so tolayera a mangurug si Dios.”
9 Kunna i Jesus, “Itunduk sikwayu, usan diyaweno wara-warayuwera sito lubag a manuffun si kasittoleyuwera takesi nu matamfutinna amminan inay e makadutung kayuna so pagyanan a awan pakiyaranna e siggaanggam a arasawan nakayu i Dios. 10 Na tolay a matalakkan si bisang a kiyan e matalakkan keppay si dokal a kiyan, anneno madarogat si bisang a kiyan e madarogat keppay si dokal a kiyan. 11 Antu nu amme kayu matalakkan si wara-wara sito lubag, yanya yo mattalak sikwayu si gakkurug a wara-wara si langit? Awan. 12 Antu nu amme kayu dama a matalakkan si wara-wara na korwan ira, awan a mangiyadda sikwayu si wara-wara a para sikwayu ingkepay.
13 “Awan a imbut a paggindananna a passerbiyan ino adwa a amu gumafu se ikalussawneno tata anna iddukanneno meka-adwa, makurug a passerbiyanneno tata anna arariyanneno meka-adwa. Kunnapay a ammeyu dama a paggindanan a serbiyan i Dios anneno wara-wara sito lubag.”
Na Katunungan anneno Pattangngal i Dios
14 Sin nadingngag iyaweno Fariseowera a maanggam si pirak, kinatawanda i Jesus. 15 Antu kunna i Jesus sikwara, “Massalasasang kayu a manilla gakkurug a matunung so allangan na tolayera, udde ammuna i Dios ino ana so nakam diyaw. Gumafu se yo nebilang a kaawan ino tolayera e maral si aggita i Dios.
16 “Liyena dumatang i Juan, tinuntul ino tolayera yo katunungan i Moises a neyaddana i Dios sikwana anneno neturak na profetera. Sin tiyempu i Juan, nebalaggoneno Mapiya a Baga meafu so pattangngal i Dios, anna oddu a nangurug sitaw e inangwara amminan takesi mesapat so pattangngalan i Dios. 17 Mas malan kepay a tumallap ino langit anneno lubag ammat a maawanan si serbiyeno kabisangngan a letra na katunungan i Dios.
18 “Gangngaryan, nu nekatwayeno lalaki yo atawana anna mangatawa si korwan a bafay e makaliwat baggina si pakikkarallaw, anneno mangatawa so bafay a nekatway e makaliwat pay si pakikkarallaw.”
Na Dammak anni Lazaro
19 Nebalinna i Jesus a nakkun, “Ana tata dammak a maumid a mabbarasi si makarasta anna mangingina a sinnun anna odduwengke a maakkan a ipara-paranna si kada aw. 20 Ana pay tata madidiyat a mingan si Lazaro a napannu si gurid yo baggina. Kada aw a nakaidda so tarangka na dammak. 21 Mabisi-bisinan ingke baggina antu kanggamma nad a akkanan ino butta ira a madarannag so gukab na dulang na dammak. Ara-aranniyan pay na atuwera baggina anna dindi-dindilandeno guridnera.
22 “Natayeno madidiyat a tolay anna neyang baggineno anghel ira so pagyanan i Abraham si langit. Natay pay yo dammak e netanam. 23 So passufrinengke so infiyernu, nattangaw baggina e naitana so aroyu i Lazaro a karebbingnga i Abraham. 24 Antu naggirawa baggina a nakkun, ‘Ama Abraham, ikallakngak. Dundunannu i Lazaro a isosawna so danum ino tamuruna anna batanneno dilak takesi mallabbat, gumafu se nelalot ingkeno passufrik so afuy sitaw.’
25 “Udde kunna i Abraham, ‘Anakku, dandammannu se sin natoleka kepay so lubag, naarasomun amminan ino kinanggammannuwera, udde i Lazaro naarasawneno maral a kiya-kiyan e sitoye mabannayan baggina sitaw anna ikka pay e madidiyatan sitan. 26 Bakkan lamang iyan, ana a mawayang anna arollam a dabbak sito nallatanantam takesi yo anera sitaw e ammera makaumang sitan anneno anera sitan e ammera makaumang sitaw.’
27 “Udde kunneno dammak, ‘Nu kunna sitan, arangngangku sikwam, Ama Abraham, paumangannu i Lazaro so balay i amak 28 takesi tunduwanneno lima a wawwayik a lallakiyera a ana sinay takesi ammera umang sitaw a lugar na passufriyan.’
29 “Udde kunna i Abraham sikwana, ‘Pinalanánna i Moises baggira anneno profetera. Damana a bibbiran na wawwayim a lalaki yo neturakda.’
30 “Kunneno dammak, ‘Ammera kuruwan iyan Ama Abraham! Udde nu mappadda sikwareno tata natay a nantotolay, mabboboliyera anna talekkurandeno liwa-liwatda.’
31 “Udde kunna i Abraham sikwana, ‘Nu ammera makimoray so neturak ira i Moises anneno profetera, ammerana keppay kuruwan maski yo tata natay a nantotolay.’ ”