Inoyera a Dinundun i Juan a Gumabbawtismu
11
Sin nabalin a manduwanna i Jesus ino tafulu adwa a disipulunera, nanaw baggina sinay a lugar e inang nanunturu anna nangibalaggaw si mensahe i Dios so kaaranniyan a lubbu-lubbun.2 Sikwana a nakafukuk i Juan a Gumabbawtismu, nadingngagngeno inangwa-angwa i Kristo, antu dinundunneno adwa so disipulunera 3 tapenu fuutanda sikwana, “Ikka kad yo netamba i Dios a dumatang onnu mindag kami si korwan?”
4 Tinabbagngera i Jesus, “Muli kayu sike Juan e itunduyu sikwaneno madingnga-dingngag anna maita-itayu. 5 Makaiteno bulag ira, makalakad ino pilayera, nammapiyeno ana madammat a takitdera si gaddang, makadingngag ino bangngag ira, nantotolayeno natayera anneno Mapiya a Baga meafu sike Jesu Kristo e nebalaggaw so madidiyat ira. 6 Mapiya i Dios si tolay a ammena mabbabang sikwak!”
7 Sin nakaanawin inoyera a dinundun i Juan, nassapit i Jesus so tolayera meafu sike Juan, “Sin inang kayu sike Juan so kulolawat, nenay innanaman diyaw a maita? Tata tolay a makafuy kakunna yo sikal a mepalle-palled na leled? Ammena ay! 8 Nenay yo inang diyaw inita? Tata tolay a nabbarasi si mangina a tafál ira? Maningngag kayu, inoyera a mabbarasi si mangina a sinnun e ira yo migigyan so dorokkal a balayera. 9 Nenay antu yo inang diyaw inita? Tata a profeta? On, gakkurug yo itunduk sikwayu, yo naitayu e mas kepay so tata profeta. 10 Gumafu se iyaweno neturak a sapit i Dios meafu sike Juan,
‘Dingngaggannu, palunguk a idundun ino gumabbanduk,
a mangiparanna so paddatangngu.’a
11 “Gakkurug yo itunduk sikwayu, awan kepay neyanak a mas atannang ammat sike Juan. Udde yo mebilang ira a ammena kurwa kaawan a tolayera a mesapat so pattangngalan i Dios e mas atannang ammat sike Juan. 12 Mamefu sin nanundu i Juan a Gumabbawtismu makiyad sitoye, ana inoyera mangikakwa a mangipakaammu si pattangngalan i Dios so tolenera anna ana pay inoyera a mangilillin a mebulun so pattangngalanna. 13 Liyena dumatang ino tiyempu i Juan, nepakaammuwen ino profetera anneno katunungan i Moises meafu so pattangngalan i Dios. 14 Anna nu mangurug kayu so nepakaammuweno tata so profeterab a muli i Elias, i Juan ludin yo netamba a dumatang a kakunna i Elias. 15 Seanya sikwayu a maningngag sikwak, nonotanna si mapiya yo sinapitku!
16 “Udde pangiyarigangkuna antu yo tolayera sitoye a diyafuwan? Manillera abbing a mattuttu-tuttud so merkado anna siggatatan a màiinnayag a nakkun,
17 ‘Nattoka kami si fluta para sikwayu udde amme kayu nanalip!
Nassambalu kami e amme kayu nattangit.’
18 Na tolayera sitoye e kakunna yo abbing ira a amme makuntentu gumafu se sin dinumatang i Juan a Gumabbawtismu, mangngili-ngilin baggina anna ammena minu-inum si binarayan e kun diyaw, ‘Naaffunan baggina si demonyu.’ 19 Ikkanak a yo Anak na Tolay e mangnga-angngan anna minu-inum si binarayan e kun diyaw, ‘Itan diyaw iyaw a tolay! Malamot, gumàinum anna kolak na gumattukiyera si biyenes anneno sinaliwat ira!’ Maski nu kunna sitan a sapitan diyaw, maitaneno tolayera a yo angngammu i Dios e fustu so akakwangku anni Juan.”c
Na Tolayera a Mammay a Mabboboli
20 Antu pinassapitanna i Jesus ino tolayera a nakaimammat so oddu a milagru a inangwana sinay se ammera nabboboli so liwa-liwatda. 21 Kunna i Jesus, “Madammat ingkeno akkastigu a medemmuna sikwayu a taga-Corazin anna taga-Betsaida gumafu se amme kayu nabboboli! Nu yo oddu a milagru a naangwa sikwayu e naangwa sinoy so maral a tolayera na Tiro anna Sidon, nabayagin nad a nabbarasiyera si langgotse anna nakatuttud so lallang a pakaitan na pabbobolira. 22 Itunduk sikwayu, so Aw na Pannunut, mas madammatneno pangastigu i Dios sikwayu ammat so taga-Tiro anna taga-Sidon.
23 “Anna ikkayu a taga-Capernaum,
arig diyaw kad a mapadayawang kayuwengkena si langit?
Ammena! Metappol kayuna so infiyernu.
Se nu so Sodoma nedemmuweno milagruwera a nakwa sikwayu, ana kepay nad inay a lubbun makiyad sitoye. 24 Itunduk sikwayu, so Aw na Pannunut, mas madammatneno pangastigu i Dios sikwayu ammat so tolayera so Sodoma.”
Nappabala-balat i Jesus sike Amana
25 Sitan keppay a orat, kunna i Jesus, “Mabbalatak sikwam, Ama, manangngalka si amminan a ana si langit anna lubag gumafu se ammem nepakaammu iyawera a kiya-kiyan so mangngammuwera anna so nakakalakammuwera udde imbes nepakaammum so tolayera a malan a mangurug kakunna yo bawissang a abbing ira. 26 On, Ama, inangwam iyan se iyaweno nakammu a kaangga-anggam sikwam.”
27 Kapiyena naddasal i Jesus, kunna so tolayera, “Neyaddana i Amak sikwak ino pakandama si amminan a kiya-kiyan. I Ama lamang a makaammu sikwak a anaknga anna awan makaammu sike Ama nu bakkan ikkanak a Anaknga anna inoyera a mapilik a mangipaammu sike Ama.
28 “Umaranni kayu sikwak, ikkayu amminan a mapadiya-padiyatan anna madamma-dammatan si buttungd diyaw, e pimemmangan takayu. 29 Dumandane kayu anna makkalakammu kayu sikwak se matulukak anna daludugak tapenu massinak ino nakam diyaw. 30 Se yo itunturukf sikwayu e malonggon anneno ipaangwak sikwayu e malampaw.”