Na Angngurug ino Kapitan na Romano a Sundaluwera
7
Kapiyena nakiabid i Jesus so tolayera, inang imman baggina so Capernaum. 2 Ana kapitan na Romano a sundaluwera a ana imbutna a ikengannengke e matakit anna gammamatayin. 3 Sin naammuwanneno meafu sike Jesus, dinundunneno korwan a manannakam na Hudyuwera se arangnganna sike Jesus a umangnga pammapiyan ino imbutna. 4 Sin inang ira sike Jesus, nakigumallak ira sikwana e kunda, “Mepangngat a maduffunannu baggina 5 gumafu se iddu-iddukanna etam a Hudyuwera anna baggineno namataddag so sinagogatam.”6 Nebulun i Jesus sikwara anna sin aranniyen baggina so balera, dinundun ino kapitan ino kolakngera se itundura sikwana, “Afu, ammeka maburung a umang sitaw, se ammek mepangngat a mimbita sikwam sito balek, 7 se ammek mepangngat a umang sikwam udde massapitka lamang e mammapiyaneno imbutku. 8 Se maski ikkanak, ana mammandu sikwak e ana sundaluk ira a iggamku pay a makimoray sikwak anna itunduk so tata, ‘Ingkan,’ e manaw baggina, anna so tata pay, ‘Kataw,’ e umaranni pay, e nu kungku so imbutku, ‘Akwannu iyaw,’ anna akwan pay yo imbut.”
9 Nalaggat i Jesus sin nadingngagnga iyaw, anna nilangngineno tolayera a dumaladandan sikwana e kunna, “Itunduk sikwayu, awan kepay naitak so Israel a kunna sitaw a angngurugnga.”
10 Sin nuli so balay inoyera a nedundun, nadatangngandeno imbut a nammapiyen.
Pinantotolena i Jesus ino Anak na Balu a Bafay so Nain
11 Ammena nabbayag, inang i Jesus so tata lubbun a mingan si Nain. Bulunneno disipulunera anna odduwengke a tolay. 12 Sin aranniyen baggina so pattallungan na lubbun, ana tata natay a lalaki a binuttung ino tolayera a nelawan so lubbun. Mittatanak baggina a anak a lalaki na balu a bafay. Odduwengke a taga-lubbun a nakitanam sikwana. 13 Sin naitana i Jesus ino balu a bafay, naallakan baggina sikwana e kunna, “Ammekan mattangit.” 14 Inumaranni i Jesus anna sinenggidneno nangekwanan ino natay. Nimemmak ino namuttung ira so nangekwanan ino natay e kunna i Jesus, “Anakku, gumumbwatka!”
15 Nattuttud ino sulteru e namefu a nabid. Neyangnga i Jesus baggina so inana.
16 Natalawan ino tolayera so naitara anna dinayora i Dios so mapiya a inangwana e kunda, “Ana sikwatam ino tata madayaw a profeta!” anna “Dumatang i Dios a manuffun so tolenera!”
17 Naammuwan amminan so Hudea anna so amminan a lebut na luga-lugar meafu so inangwa i Jesus.
Inoyera a Dinundun i Juan a Gumabbawtismu
18 Nebageno disipuluwera i Juan sikwana meafu so amminan a inangwa i Jesus. Antu inayanna i Juan ino adwa so disipulunera 19 anna dinundunnera sike Afu Jesus a maffuut, “Ikka kad yo netamba i Dios a dumatang onnu mindag kami si korwan?”
20 Sin dinumatang ira so nagyanan i Jesus, kunda sikwana, “Dinundun dakami i Juan a Gumabbawtismu a maffuut sikwam nu ikkeno netamba a Mesiya onnu mindag kami kepay si korwan?”
21 Sitan a tiyempu, pinammapiyana i Jesus ino oddu a matakit a tolayera, inoyera a ana madammat a taki-takitdera, inoyera a naaffunan si demonyuwera anna pinammapiyana pay yo oddu a bulag ira. 22 Tinabbagngera, “Muli kayu sike Juan e itunduyu sikwaneno nadingngag anna naitayu. Makaiteno bulag ira, makalakad ino pilayera, nammapiyeno ana madammat a takitdera si gaddang, makadingngag ino bangngag ira, nantotolayeno natayera anneno Mapiya a Baga meafu sike Jesu Kristo e nebalaggaw so madidiyat ira. 23 Mapiya i Dios so tolay a ammena mabbabang sikwak!”
24 Sin nakaanawin ino gumabbanduwera i Juan, nabid i Jesus so tolayera megafu sike Juan, “Sin inang kayu sike Juan so kulolawat, nenay innanaman diyaw a maita? Tata tolay a makafuy kakunna yo sikal a mepalle-palled na leled? Ammena ay! 25 Nenay antu a inang diyaw inita? Tata tolay a nabbarasi si mangina a tafál ira? Maningngag kayu, inoyera a mabbarasi si mangina a sinnun e dammak ingke anna ira yo migigyan so dokal a balayera. 26 Nenay antu inang diyaw inita? Tata a profeta? On, gakkurug yo itunduk sikwayu, yo naitayu e mas ingke so tata profeta. 27 Gumafu se iyaweno neturak a sapit i Dios meafu sike Juan:
‘Dingngaggannu, palunguk a idundun ino gumabbanduk,
a mangiparanna so paddatangngu.’a
28 Gakkurug yo itunduk sikwayu, awan kepay neyanak a mas kaawan ammat sike Juan, udde yo mebilang a ammena kurwa kaawan a tolayera a mesapat so pattangngalan i Dios e mas atannang ammat sike Juan.”
29 Sin nadingngag amminan iyaweno tolayera, maski yo gumattukiyera si biyenes, kunda se matunung ino pannunut i Dios gumafu se nappabawtismuwera sike Juan. 30 Udde yo Fariseowera anna mapoporay si katunungan inammayandeno gakkad i Dios para sikwara ingkepay gumafu se ammera a nappabawtismu sike Juan.
31 Kunna i Jesus sikwara, “Pangiyarigangkuna antu yo tolayera sitoye a diyafuwan? Nenay a kakunnara? 32 Kakunnara yo abbing a mattuttu-tuttud so merkado anna màiinnayag a nakkun
‘Nattoka kami si fluta para sikwayu
udde amme kayu nanalip!
Nassambalu kami e amme kayu nattangit.’
33 Sapitangku iyaw sikwayu se sin dinumatang i Juan a Gumabbawtismu, mangngili-ngilin anna ammena minu-inum si binarayan e kun diyaw, ‘Naaffunan baggina si demonyu.’ 34 Ikkanak a yo Anak na Tolay e mangnga-angngan anna minu-inum si binarayan e kun diyaw: ‘Itan diyaw iyaw a tolay! Malamot, gumàinum anna kolak na gumattukiyera si biyenes anneno sinaliwat ira!’ 35 Maski nu kunna sitan a sapitan diyaw, maitaneno tolayera a yo angngammu i Dios e fustu so akakwangku anni Juan.”b
Napakoman ino Bafay a Sinaliwat
36 Tata aw, tata so Fariseowera e naimbita sike Jesus a makiakkan sikwana so balena. Antu inang baggina a nakiakkan sinay. 37 Sitan a lugar ana tata sinaliwat a bafay. Naammuwanna a mangnga-angngan i Jesus so balayeno Fariseo. Nangikangkalin baggina si pabangug a lana a nakaiyekwa si bisang a pangiyekwanan a naangwa si batu a alabastro. 38 Inumaranniyeno bafay sike Jesus anna nattaddag so dunan na takkina a mattangi-tangit makiyad si nabateno takkina gumafu si luwana. Finunatanneno takkina si būknga makiyad si namma. Inumma-ummananneno takkina anna inaffuryatanna si lana a nekangkalinna.
39 Sin naiteno Fariseo a naimbita sikwana, kunna si nakamma, “Nu profeta iyaw a tolay, ammuna nad nu nenay garannud a bafay baggina a massenggi-senggid sikwana. Sinaliwat baggina!”
40 Kunna i Jesus sikwana a nakkun, “Simon, ana itunduk sikwam.”
Tinumabbag i Simon, “Itundum sikwak, Mestru.”
41 Nebalinna i Jesus a nassapit, “Ana adwa a tolay a nattakkaw so gumappagatut si pirak, ino tata naggatut si limatut a dinaryuc anneno tata limafulu. 42 Sin ammera makapaga so gatutdera, pinakomannera adwa. Yanya sikwara adwa a mas midduknga so nappagatut?”
43 Tinumabbag i Simon, “Si nakamku, ino mas dokal a gatutneno midduknga so nappagatut.”
Anna kunna i Jesus sikwana, “On, gakkurug iyan!”.
44 Nilangngineno bafay e kunna sike Simon, “Itannu baggina. Tinumallungak so balem udde ammenak inindan si danum a pamagguk sito takkik udde baggina, diniyutneno takkik si luwana anna pinammana si būknga. 45 Ammenak inummanan a pakaitan si panangarasom sikwak, udde mamefu sin dinumatangak sito balem, ammena nimemmak a umma-ummanan yo takkik. 46 Ammem nilanan si olibu yo uluk udde binubbuwanna si pabangug a lana yo takkik. 47 Itunduk sikwam, maski nu oddu a liwatna e napakoman baggina, nabu nangipaita baggina si dokal a pidduk. Udde yo tata napakoman si bisang a liwatna, bisang pay yo pidduknga.”
48 Antu kunna i Jesus so bafay, “Napakomangkan so liwa-liwatnu.”
49 Udde inoyera a nakiakkan sike Jesus so pangnganan e kunda so nakamda, “Yanya iyaw a tolay a pakomanna maski yo sinaliwat ira?”
50 Kunna i Jesus so bafay, “Gumafu si angngurugngu sikwak, natabbutkan. Ingkan si piya.”