Na Fuut meafu so Aw na Aggimemmang
6
Namitta so Aw na Aggimemmang, sikwana a mattale-talebad i Jesus anneno disipulunera so uma a namulan si trigu, narruddut ino disipulunera si ungkay na trigu. Nililliddeno dawa na trigu so kamatda tapenu maariyeno lussatnera e inakkanda. 2 Udde kundeno korwan a Fariseowera a nakaita sikwara, “Itannu, saay kad se akakwan diyaweno ammena meyannut so Aw na Aggimemmang?”3 Kunna i Jesus sikwara, “Ammeyu kad nabibbid ino inangwana i David anneno bulunnera sin nabisinan ira? 4 Tinumallung i David so balay i Dios,a nangappa anna nangngan si tinapay a newalli sike Dios. Inindanna pay yo bulunnera. Meantu so katunungan, pariyera lamang yo meyannut a mangngan sitan a tinapay.” 5 Antu kunna i Jesus sikwara, “Ikkanak a yo Anak na Tolay e ana pakandamak a manundun nu nenay maawag a akwan so Aw na Aggimemmang.”
Na Paralitiku
6 So korwan a Aw na Aggimemmang, tinumallung i Jesus so sinagoga e nanunturu. Ana tata tolay a ammena makaguyuweno diwanan a kamatna. 7 Nilangngaddandeno mapoporay si katunungan anneno korwan a Fariseowera i Jesus nu makapammapiya baggina so Aw na Aggimemmang takesi makaintufuk ira si pakàakusan sikwana. 8 Maski ammuna i Jesus ino ginanakamda, kunna so lalaki a kinumappat ino kamatna, “Kataw anna mattaddagka so allangammi.” Ginumumbwat baggina e nattaddag so allanganda. 9 Finuutna i Jesus so Fariseowera anna so mapoporay si katunungan, “Meyannut kad si katunungantam a mangwa si mapiya onnu mangwa si maral so Aw na Aggimemmang, mangisalak si angat onnu mappatay?”
10 Sin nilangnginera amminan, kunna so lalaki a kinumappat ino kamatna, “Isoyyadnuweno kamatnu.” Nesoyyadneno kamatna e nammapiya. 11 Makaallang ingkeno Fariseowera anneno mapoporay si katunungan e nattataretabbanda nu nenay yo akwandana sike Jesus.
Nappili i Jesus si Tafulu Adwa a Apostolnera
12 Sinoyera a aw, inang i Jesus so dangutul a naddasal. Makkatafi baggina a naddasal sike Dios. 13 Kadaddaramatanna, inayanneno disipulunera anna nappili si tafulu adwa sikwara e pinangananna si apostolnera. Baggira
14 i Simon a minganan pay si Pedro,
anni Andres a wayina,
da Santiago anneno tan-abbing a wayina a i Juan,
da Felipe anni Bartolome,
15 da Mateo anni Tomas,
anni Santiago a anak i Alfeo,
anni Simon a pinangananda si Makalubbun a mangikalow so lubbunna,
16 anni Judas a anak na tameta a Santiago,
anni Judas Iscariote a nattraydor sike Jesus.
Nanunturu anna Nappammapiya i Jesus
17 Dinumolam i Jesus so dangutul bulunneno disipulunera e nimemmak ira so penak a lugar. Nadatangngandeno oddu kepay a disipulunera anna odduwengke a tolayera a naggabwat so Judea, Jerusalem anna so aranni na bebay na Tiro anna Sidon. 18 Inang ira a naningngag si tunturunera anna mapammapiyeno takitdera. Inoyera a naaffunan si demonyuwera e nammapiyeran. 19 Kanggam amminan ino tolayera a senggiran i Jesus gumafu se ana pakapangwana a makapammapiya sikwara amminan.
Na Panunturu i Jesus so Dangutul
20 Initana i Jesus ino disipulunera e kunna,
“Mapiya i Dios sikwayu a madidiyat ira,
se mattangngal baggina sikwayu.
21 Mapiya i Dios sikwayu a mabbisin sitoye,
se mabattug kayuna.
Mapiya i Dios sikwayu a marraddam sitoye,
se makkatawa kayuna.
22 “Ikalussaw dakayuweno tolayera gumafu se mangurug kayu sikwak a yo Anak na Tolay. Ammera kayuna arasawan, insultun dakayuna anna sapitandana a maral kayu a tolay. Nanu medemmu iyawera a kiya-kiyan, ammuyu a mapiya i Dios sikwayu. 23 Mangga-anggam kayu sitan a aw anna mallattu kayu si anggam gumafu se makaarasaw kayuna si dokal a pammakapiyan si langit se yo akwandana sikwayu e kakunna yo inangwa yo aggidiyafuwandera so profetera i Dios siin nabayagin a tiyempu.
24 “Udde madammat ingkeno akkastigu a medemmuna sikwayu a dammak ira,
se anen sikwayuweno mapiya a akkatolay!
25 Madammat ingkeno akkastigu a medemmuna sikwayu a nabattug sitoye,
se mabisinang kayuna.
Madammat ingkeno akkastigu a medemmuna sikwayu a makkata-katawa sitoye,
se marraddam anna mattangit kayuna.
26 “Madammat ingkeno akkastigu a medemmuna sikwayu nu mapiya yo sapitan ino tolayera sikwayu, se antu keppay yo inangweno aggidiyafuwandera so sasan-profetera siin nabayagin a tiyempu.”
Na Pidduk si Kapakwera
27 Anna nebalinna i Jesus a nakkun, “Udde sapitangku sikwayu a maningnga-ningngag sikwak. Iddukan diyaweno kapakwayuwera, mangwa kayu si mapiya so makalussawera sikwayu. 28 Arangngan diyaw sike Dios a mapiyana so inoyera a mangimamod sikwayu, idasallan diyaw inoyera a mattalatangga sikwayu. 29 Nu ana manampal so paringil diyaw, ipatampal diyaw kepay yo tafik a paringil diyaw, nu ana mangappa so tafál diyaw, iyaddayu pay yo barasiyuwera. 30 Nu ana mangappa si sanna a akwayu, ammeyun golin. 31 Taratun diyaweno korwan a tolayera kakunna pay yo kanggam diyaw a pattaratura sikwayu.
32 “Nu iddukan diyaw lamang inoyera a midduk sikwayu, nenay kad a mapiya a maappayu? Maski yo sinaliwat ira e iddukandeno midduk sikwara. 33 Nu mangwa kayu si mapiya so inoyera a mangwa si mapiya sikwayu, nenay kad mapiya a maappayu? Maski yo sinaliwat ira e parefu keppay yo akwanda. 34 Nu mappatakkaw kayu si pirak so tolayera a ammuyu a mapagang kayuna, nenay kad mapiya a maappayu? Maski yo sinaliwat ira patakkawandeno kakunnara a sinaliwat tapenu maappareno parefu a kantidad na pirak a pinatakkora.
35 “Imbes, iddukan diyaweno kapakwayuwera, mangwa kayu si mapiya anna mappatakkaw kayu sikwara a awan innanaman a pagana. Mapadayawang kayuwengkena anna gakkurug ingke a anaknga kayu i Dios a Makapangwengke si amminan. Se masimpat baggina so ammena ammu a mappabalat anna so maral a tolayera. 36 Minaggikallak kayu a kakunna pay i Amayu a minaggikallak.”
Pannunut so Korwan ira
37 Nebalinna i Jesus a nakkun, “Ammeyu nunutan ino korwan ira takesi ammena kayu nunutan i Dios, ammeyu kastiguwan ino korwan ira takesi ammena kayu kastiguwan i Dios. Mamakoma kayu takesi pakoman dakayu pena i Dios. 38 Mangadda kayu takesi indan dakayu pena i Dios. Mas oddu, sissik anna mallifiyengke nu nenay yo neyaddayu e metolina sikwayu. Se nu kasanna yo pangiyaddayu so korwan ira antu pena yo pangiyaddana i Dios sikwayu.”
39 Nangarig pay baggina sikwara a nakkun, “Damana kad a igiyeno tata bulag ino kakunnana a bulag? Ammera kad madannag a adwa so abbut? 40 Anna pay, awan a disipulu a tammapiya ammat so mestruna, udde nu matunturuwan si fustu baggina, mekunnana pay baggina so mestruna. 41 Saay se maitam ino bisang a liwat na korwan ira udde ammem maiteno dokal a liwatnuwera kakunna yo aggitam so bisang a bulaw so mata na korwan ira udde ammem maiteno dokal a bulaw so matam ingkepay? 42 Onnu kasannam a sapitan so bulunnu a, ‘Aringkuweno bisang a dakkut so matam,’ e ammem maiteno dokal a dakkut so matam? Mappesimpatka! Arinnu abbuweno dokal a dakkut so matam takesi mabbaggaweno aggitam, liyem a arin ino bisang a dakkut so mateno bulunnu.”
Na Kayu anneno Bungana
43 Nebalinna i Jesus a nakkun, “Awan a mapiya a kayu a mamunga si maral a bunga onnu mamungeno maral a kayu si mapiya a bunga, 44 se memunuwan ino tata kayu so bungana ingkepay. Ammena dama mafusit ino igos anna ubas ira so kaasitan a mulera. 45 Kaparefu iyaw si tolay. Mangwa si mapiya a taddereno mapiya a tolayera gumafu se mapiya yo ginanakamda. Anneno maral a tolayera e mangwa si maral a taddera gumafu se maral ino ginanakamda. Se yo sapitan ino tolay e maggabwat si ginanakamma.”
Na Pangarig na Adwa a Lallaki a Namataddag si Balera
46 Anna nebalinna i Jesus a nakkun, “Saay se ayandak si ‘Afu, Afu,’ e ammeyu akwan ino sapitangku sikwayu. Ammeyu ke makimoray so sapitangku sikwayu. 47 Sapitangku sikwayu nu nenay a kakunnana yo tata tolay a umang sikwak, maningngag anna makimoray so sapitkuwera. 48 Kakunnana yo tolay a napalungu a nabbut si arollam sito lubag makiyad si nadutungngeno batu a nappataddaggan ino fundasyon na balay. Sin nallinang ino māt, nesibbat ino danum so balay udde ammena nayuyyuk gumafu se matuyag yo pakkataddagnga.
49 “Udde ana korwan a tolayera a maningngag nu nenay sapitangku sikwara udde ammera makimoray. Kakunnara yo tata tolay a namataddag si balay so lubag anna ammera nabbut si arollam a pamataddagganda si fundasyon na balay. Sin nallinang ino māt, siddarat a nadabbuk ino balay anna kurwengke a nadaral.”