Na Akkekakkap i Jesus
4
Antu negiyana i Espiritu i Dios i Jesus so kulolawat takesi kakkappan i diyablu a i Satanas. 2 Appat a fulu aw anna gafi a ana baggina sinay e ammena nangnga-angngan antu nabisinan ingke baggina. 3 Inang ino makkakkap a i Satanas sikwana e kunna, “Nu ikkeno anak i Dios, tunannuweno batuwera a mattabali si tinapayera.”4 Udde tinumabbag i Jesus, “Kunna so neturak a sapit i Dios, ‘Ammena matolay yo tolay si tinapay lamang, udde si kada sapit a maggabwat so sangi i Dios.’a ”
5 Neyang ino diyablu i Jesus so Jerusalem a tata lugar a meyaparte para sike Dios e pinataddagnga baggina so tuttuk na Templu 6 e kunna sikwana, “Nu ikkeno Anak i Dios, mallattuka, se kunna so neturak a sapit i Dios a,
‘Dundunanna i Dios ino anghelnera a manabbud sikwam e
ibballan dakana sikwam a dumolam
takesi ammena mapalowan ino takkim so batu.’ ”b
7 Kunna i Jesus sikwana, “Kunna pay so neturak a sapit i Dios, ‘Ammem kakkappan i Afu a Diosnu.’ ”
8 Neyangnga imman i diyablu i Jesus so atannang ingke a bakulud e nepaitana sikwana amminan a pattangngalan na kalubbunan so kakastanengke. 9 E kunneno diyablu sikwana, “Iyaddaknga amminan iyawera sikwam, nu mallabbaka anna maddayaw sikwak.”
10 Udde kunna i Jesus sikwana, “Manawka Satanas! Se kunna so neturak a sapit i Dios,
‘Dayawannu i Afu a Diosnu,
e passerbiyannu pelamang baggina.’c ”
11 Antu nanaw i diyablu e lannat a dinumatang ino anghel ira anna sinerbiyanda i Jesus.
Na Pamefu i Jesus a Manunturu so Galilea
12 Sin nadingngagnga i Jesus a nefukuk i Juan a Gumabbawtismu, nanaw baggina so Judea anna nuli so Galilea. 13 Ammenan a nagyan so Nazaret udde so lubbun na Capernaum so idag na Balanaw na Galilea so teritoryu na gakera da Zebulun anni Naftali, 14 nu kunna sitan a naparulot ino nepasapit i Dios megafu sike profeta Isaias a kunna,
15 “Na lubag na gakera da Zebulun anni Naftali so dammang na māt na Jordan e
antu yo dalan a paumang so Balanaw na Galilea. Antuweyawera yo lubbu-lubbun a nagyanan pay yo bakkan a Hudyuwera.
16 Na tolayera sinay a nagyan si kalammukan a awan ammura sike Dios
udde makaiterana si mabaggawengke a sirwat.
Iyaw a sirwat e manilla pallattak na sinag si daddaramat
e baggawannaneno nakam inoyera a ana si lammuk anneno mattalawera a matay.”d
17 Mamefu sinoy, nebali-balinna i Jesus a manunturu a nakkun, “Mabboboli kayu so liwat diyawera se aranniyen a dumatang ino pattangngalan i Dios sikwayu.”
Nappili i Jesus si Palungu a Disipulunera
18 Sikwana a mallaka-lakad i Jesus so idag na Balanaw na Galilea, naitaneno adwa lalaki a misesira, i Simon a minganan pay si Pedro anni Andres a wayina. Mangiyassa-assab ira si angngallutda so balanaw gumafu se misesirera. 19 Anna kunna i Jesus sikwara, “Dandanandak anna ammungan diyawneno tolayera a mangurugngera sikwak.” 20 Siddarat a inanawandeno angngallutdera e dinumandan ira sikwana.
21 Dengkera a nakaaroyu sinay, naitana i Jesus ino adwa kepay a mawwayi, da Santiago anni Juan a anak ira i Zebedeo a nakatakay so barangay a mappi-appit si angngallutdera. Inayannera. 22 Siddarat a inanawandeno barangay anneno amara e dinumandan ira sike Jesus.
Nanunturu i Jesus so Kaodduwan na Tolayera
23 Naddoyug i Jesus so amminan a luga-lugar na Galilea a manuntu-tunturu so sinagogarera. Nebalaggoneno Mapiya a Baga meafu so pattangngalan i Dios anna pinammapiyaneno amminan a matakit ira anna inoyera a ana ginna-ginnanda. 24 Na baga meafu so inangwera i Jesus e nepakaammu so amminan a lubbun na Siria. Neyangga sikwana amminan a matakit ira, inoyera a madidiyatan si naddadaruma a taki-takit anna lowera, inoyera a naaffunan si demonyuwera, ino makkarawwat ira, anneno paralitikuwera e pinammapiyanera amminan. 25 Odduwengke a tolayera a dinumandan sikwana a naggabwat so Galilea, Decapolis, Jerusalem, Judea anna so dammang na māt na Jordan.