Na Panunturu i Jesus so Dangutul
5
Sin naitana i Jesus ino oddu a tolayera, inang baggina so dangutul e kapiyena nattuttud, inumaranniyeno disipulunera sikwana. 2 Tinunturuwannera a nakkun:3 “Mapiya i Dios so inoyera a maddepende pelamang sikwana,
se tangngallannera.
4 “Mapiya i Dios so inoyera a marraddam
se bannayannera.a
5 “Mapiya i Dios so inoyera a matuluk
se erensiyandaneno lubag.
6 “Mapiya i Dios so inoyera a manggam ingke a mangwa si urena,
se iyaddanana i Dios sikwareno panggammanda.
7 Mapiya i Dios so inoyera a minaggikallak,
se allakkannana payera.
8 “Mapiya i Dios so inoyera a panggammanda lamang e masserbi sike Dios,
se maitarana baggina.
9 “Mapiya i Dios so inoyera a makapapiya so abbafurulun ino kasittolera,
se mebilang irana a anak i Dios.
10 “Mapiya i Dios so inoyera a nelupe-lupet gumafu se akakwandeno uray i Dios,
se tangngallan irana i Dios.
11 “Mapiya i Dios sikwayu nu paata-atallan anna ilupe-lupet dakayuweno tolayera anna akusan dakayu si amminan a garannud a maral a sapit ira a passi amminan a siri gumafu se mangurug kayu sikwak. 12 Se kunna sitan yo pangilupetda so profetera siin nabayagin a tiyempu. Nabu, mammalamuwang kayuwengke se makaarasaw kayuna si dokal a pammakapiyan si langit.”
Asin anna Sirwat
13 Nebalinna i Jesus a nanunturu e kunna, “Kakunnayu yo asin a kaawan na tolayera sito talubaggan, udde nu maawanin ino kinaasinna, kasanna kad kepay a metoliyeno kinaasinna? Awanin a serbina antu metappolna e mapimpi-pimpinan na tolayera.
14 “Kakunnayu yo sirwat a mabbaggaw si tolayera na talubaggan. Ammena metawuweno tata lubbun so tuttuk na dangutul. 15 Awan pay a massigi si allamparan e kallabbanna si timba udde itappatna so pappotunan e masirwatan amminan ino ana so balay. 16 Si kakunna keppay, ikkayu nad yo sirwat so korwan a tolayera takesi maitareno mapiya a inangwayuwera anna maddayaw kayu sike Dios a Amayu si langit.
Na Katunungan anneno Profetera
17 “Ammeyu nonotan a umangku arin ino katunungan a neyaddana i Dios sike Moises onnu yo tunturuwera na profetera udde umangku a parulotan ira. 18 Se gakkurug yo itunduk sikwayu, makiyad se ana kepay yo langit anna lubag, awan maski tata so katunungan ira i Dios e maawanna, maski yo kaibbafan a sapit onnu tata tunnak na letra, makiyad si maparulotin amminan ino planu i Dios.
19 “Kunnantu, seanya yo ammena makimoray maski tata sitawera a dundun a arignga a ammena kurwa kaawan anna tunturuwanneno korwan ira a akwanda keppena e ibilangnga i Dios iyan a tolay a ammena kurwa kaawan so pattangngalanna. Udde yo tata a makimoray so dundun ira i Dios anna itunturuna so korwan ira a akwanda keppena e mebilangnga a kaawan so pattangngalan i Dios. 20 Sapitangku sikwayu, nu ammeyu akwan si mas mapiyeno uray i Dios ammat so Fariseowera anna mapoporay si katunungan, ammeyuna mesapat so pattangngalan i Dios.”
Patamu si Pabbungut
21 Nebalinna i Jesus a nakkun, “Nadingngag diyaweno dundun ira i Dios so aggidiyafuwantam ira a kunna, ‘Ammeka mamapatay, seanya yo mappatay e manunutna.’ 22 Udde sapitangku sikwayu a nu mabbungut kayu so kasittoleyu, manunut kayuna. Nu insultun diyaweno kasittoleyu, manabbag kayuna si pannunut na Sanhedrin e nu kun diyaw, ‘Illawka!’ Makastigu kayuna so infiyernu.
23 “Antu nu wara iwallim so altar para sike Dios e madandammu a yo kasittolem e ana low na nakamma sikwam, 24 ibattangnguweno iwallim so altar se ingka abbu makipakoli sikwara anna mulika e mawwallika sike Dios.
25 “Sikwayu a umang so usgadu, palanannu a makipakoli sikwana liyena dumutung ino kasu so usgadu. Se nu ammem akwan inay, idawawanakana so huwes, e idawawanakana pay yo huwes so guwardiya na paffukukan e mefukukkana. 26 Gakkurug yo itunduk sikwam, ammekana makalawan so paffukukan makiyad si mapagannu amminan a maawag ira a pagannu.”
Patamu si Pakikkarallaw
27 Nebalinna i Jesus a nakkun, “Nadingngag diyaw a sinapit siin nabayagin a tiyempu, ‘Ammeka makikkarallaw.’ 28 Udde sapitangku sikwayu, yo lalaki a umifag si bafay e nakaliwatin si pakikkarallaw si nakamma. 29 Nu yo diwanan a matam e antu yo pakaliwatannu, kulotannu e itappolnu, se mas mapiya yo baggi a makurang si tata parte ammat so interu a baggi a metappolna so infiyernu a ana afuy a ammena maadda-addap. 30 E nu yo diwanan a kamatnu e antu yo pakaliwatannu, gabbungannu anna itappolnu. Se mas mapiya yo baggi a makurang si tata parte ammat so interu a baggi a metappolna so infiyernu.”
Patamu si Akkatway
31 Kunna pay i Jesus, “ ‘Seanya yo makkatway so atawana a bafay, indanna nad si katurakkan a pakaitan a nakkatwayera.’b 32 Udde sapitangku sikwayu a yo lalaki damana a ikatwayeno atawana lamang nu nakikkarallaw si korwan a lalaki. Nu ikatwena baggina si sanna a gafu, mapaliwatna baggina si pakikkarallaw nu matawa imman baggina si korwan a lalaki. Anna nu mangataweno lalaki si nekatway a bafay, ibilangnga i Dios iyan a lalaki a malliwat pay si pakikkarallaw.”
Patamu so Pappingan
33 Kunna pay i Jesus, “Nadingngag diyaw pay a sinapit ino aggidiyafuwantam ira, ‘Amme kayu mattamba nu ammena gakkurug udde akwan diyaweno netambayu sike Afu.’ 34 Udde sapitangku sikwayu se ammeyuwengke sapitan, ‘Langit yo manestigu sikwak’ se antu yo pattangngalan i Dios, 35 onnu ‘Lubag yo manestigu sikwak,’ se antu yo pattappatan na takkina onnu ammem pay a sapitan, ‘Jerusalem yo manestigu sikwak,’ se antuwenay yo pattangngalan i Dios a kaatannangan a patul. 36 Ammem a itamba a makkun, ‘Maski mafugut ino uluk’ se ammem ingkena mapafuraw onnu mapangisit ino tata būk. 37 Udde sapitannu, ‘On’ nu on onnu ‘Ammena’ nu ammena. Ammemun daggan yo sapitannu nu kunna sitan maggabwat iyan sike Satanas a maral.”
Patamu si Pabbalat
38 Nebalinna i Jesus a nakkun, “Nadingngag diyaw iyaw siin nabayagin a tiyempu a makkun, ‘Mata si mata, ngipan si ngipan.’c 39 Udde itunduk sikwayu, ammeyu balattan ino tolay a mangwa si maral sikwayu. Nu wara manampal so diwanan a paringil diyaw, ipatampal diyaw pay yo tafik a paringil diyaw. 40 Nu ana mangiyangnga sikwayu so usgadu e appanneno barasiyuwera, iyaddayu kepay yo tafál diyaw. 41 Nu ana mamuwersa sikwayu a manassin so akkitna si tata kilometro, ibali-balin diyaw makiyad si adwa a kilometro. 42 Nu ana marang sikwayu, indan diyaw anna nu ana manakkaw sikwayu, patakkawan diyaw.”
Aggidduk si Kapakwera
43 “Nadingngag diyaw siin nabayagin a tiyempu e kunda, ‘Iddukannuweno kasittolem udde ikalussom ino kapakwam.’d 44 Udde sapitangku sikwayu, iddukan diyaw inoyera a mangwa si maral sikwayu anna idasallan diyaw inoyera a mangilupet sikwayu. 45 Nu akwan diyaw iyan, ikkayu yo gakkurug a anak ira i Dios a Amayu si langit. Se pabaggawanna a mapparefuweno sinagnga so mangwera si maral anna so mangwera si mapiya, anna mappauran baggina so matunung anna so ammena matunung ira. 46 Se nu iddukan diyaw lamang yo midduk sikwayu, nenay kad a maappayu a pammakapiyan diyaw sike Dios? Bakkang kad se maski yo gumattukiyera si biyenes e akakwanda pay iyaw? 47 Nu kidyotan diyaw lamang yo wawwayiyu, nenay yo keduman diyaw so korwan ira? Se iyan pay yo taddera na bakkan a Hudyuwera! 48 Kunnantu, awan ingke nad a pakkurangan diyaw a kakunnana i Dios a Amayu si langit a awan ingke pakkuranganna.”