Na Akkepalanán so Dammak Ira
5
Dingngaggan diyaw iyaw, ikkayu a dammak ira! Mattangit anna massambalu kayu gumafu se mapureban diyawna yo kurwengke a paddiriyat. 2 Na wara-warayu e awan serbina a manilla nabbayandag. Na barasiyuwera e awan serbina a manilla inakkan ino anayera. 3 Na bulawan anna diplatayuwera e nallati anneno latirera e antuna yo pruweba a amme kayu fustu anna nu madaral ino lati anna afuy, makastiguwang kayunengke i Dios. Nakaammung kayu si wara-wara sitoye so mauddi a awera. 4 Maningngag kayu! Ammeyu kepay pinagan ino gumattarabafuwera a naggani so umayuwera. Maningngag kayu so reklamurera. Na daying na gumagganiyera e nakadutung sike Afu Dios a makapangwa.
5 Nanolay kayu sito lubag a wara-wara anna napureban diyaweno panggamman na talubaggan. Mekunna kayu si napatafa a aggayam a maparti gumafu se ammeyu maimammatan a kastiguwan nakayuwengke i Dios. 6 Ninunut diyaw anna pinateyu inoyera a matunung, inoyera a amme makadefensa si baggira ingkepay.
Pasensiya anna Dasal
7 Kunnantu, mappasensiya kayu wawwayik, makiyad so paggumwang i Afu Jesu Kristo. Itan diyaweno gumappayawera a mapasensiya a mindag so kaawan a ganiyera a naggabwat si lubag anna mapasensiyera a mindag si uran a gumumwang so tiyempu na pammula anneno uran liyena tiyempu na aggani. 8 Mappasensiya kayu penad. Patuyaggan diyaweno inanamayu se aranniyen ino paggumwang i Afu.
9 Wawwayik, amme kayu marreklamu metulyat si siggatatan tapenu amme kayuna nunutan i Dios. Itan diyaw, aranniyen ino annunut i Dios si amminan a tolayera. 10 Wawwayik, tuntulan diyaweno pangngarigan na profetera a nassapit si pakapangwa i Afu. Nassufriyerengke si oddu udde mapasensiyera. 11 Anna ammutam a mapiya i Dios so inoyera a nassufri para sikwana. Nadingngag diyaw meafu so pàattam i Job a nassufri si diyat. Dinuffunanna i Dios baggina si uddi a awera gumafu se nebali-balinna a mattalak sike Dios. Se i Dios e masimpat ingke anna minaggikallak.
12 Anna pay wawwayik, ammeyuwengke nad a sapitan, “Langit anna lubag yo manestigu sikwak onnu si korwan a ingan.” Udde kun diyaw, “On”, nu on anna “Ammena” nu ammena, takesi ammenana kayu nunutan i Dios.
Na Dasal na Angngurug
13 Ana kad sikwayu a massufri si diyat? Maawag a maddasal ira. Ana kad sikwayu a Maanggam? Makkantera nad si kantera na paddayaw. 14 Ana kad sikwayu a matakit? Mayag ira nad si afu-afuwera na minangikkurug ira anna dasallandera anna affuryatandera si lana si pakapangwa i Afu. 15 Anna nu mangurug ira sike Afu nu maddasal ira, yo matakit a tolay e napammapiya anna gawa-gawayyannana i Afu Dios baggina anna amminan a inangwana a liwa-liwat e mapakomanna.
16 Nabu, marang kayu si pammakoma si siggatatan anna idasallan diyaweno siggatatan takesi pammapiyan nakayu i Dios. Dokal yo maangweno dasal na matunung a tolay. 17 I Elias e kakunnatam a tolay, nedasalnengke a ammena nad a muran e si tallu rawun anna annam a dakkag ammena nuran sito lubag. 18 Antu naddasal imman baggina e nuran a naggabwat si langit anneno lubag e nappatalofu imman si mulera e namungera.
19 Wawwayik, nu ana wayiyu a tameta yo nattamuwanna maggabwat si kagakkuruwanna anna ana tata pay a maggiya sikwana takesi mabboboli, 20 ammuyu nad a seanya yo makapanoli si tata a sinaliwat patamu so fustu a akkatolay e makatabbut si tata karalwa si akkapatay anna makapakoma si oddu a liwa-liwat.