Na Akkepalanán Metulyat si Panggamman na Talubaggan
4
Nenay kad yo pappaparakwan anna pattitinnulyatan diyaw? Kalakanggamman diyaw a mangwa si kiya-kiyan a mekontra so kanggam i Dios a akwan diyaw. 2 Ana a kiya-kiyan ira a kanggamman diyaw a maappa udde ammeyu maappa, antu mamapatay kayu. Anna kanggamman diyaweno wara so korwan a tolay udde ammeyu dama a maappa, nabu mappaparakwa anna mattitinnulyat kayu. Ammeyu maappeno kanggamman diyaw gumafu se ammeyu narang sike Dios. 3 Anna maski marang kayu sikwana, awan maarasoyu gumafu se ammena fustuweno gakkad diyaw. Mara-arang kayu si kiya-kiyan tapenu meyusayuwera para si panggamman diyaw ingkepay.4 Kakunnayu yo gumakkarallawera se amme kayu makurug sike Dios. Kunnantu, seanya yo manggam a mattabali si kolak na talubaggan e kapakwera i Dios. 5 Ammeyu nonotan a awan serbineno neturak a sapit i Dios a makkun, “Ammena kanggam ino espiritu a neyaddana i Dios sikwatam a ana kafulatna so idduktam.” 6 Udde tattullot a ipaitana amminan a simpatna, nabu kunna so sapitna, “Kontranna i Dios ino balagasayera, udde mangipaita baggina si simpat so inoyera a mattaibbafa.”a
7 Mappasakup kayu sike Dios. Ammayan diyaw i diyablu e umaroyuna baggina sikwayu. 8 Umaranni kayu sike Dios e anana baggina sitan sikwayu. Ikkayu a sinaliwat ira, ibbattan diyaw a mangwa si maral anna ibbattan diyaw a mannonot si maral, ikkayu a mabbabang. 9 Marraddam, mattangit anna maddaying kayu so nalliwatan diyaw. Imbes a makkata-katawa kayu, mattangit kayu, imbes a mammalamuwang kayu, marraddam kayu. 10 Mappataibbafa kayu so allangan i Dios e dayawannana kayu.
Mimud Metulyat si Annunut so Korwan Ira
11 Wawwayik, amme kayu massapit si maral metulyat si sittata sikwayu. Seanya yo massapit si maral metulyat si korwan onnu mannunut si korwan, massapit si maral metulyat si katunungan i Dios anna nunutanna, udde nu nunutannuweno katunungan, bakkangkan a tata a makimoray si katunungan udde tatakan a gumannunut 12 I Dios lamang yo nangadda si katunungan anna baggineno gumannunut. Baggina lamang yo makatabbut anna makadaral si tolayera. E yanyaka kad antu a mannunut si kasittolem?
Pappakkaw meafu si Daddaramat
13 Sitoye, maningngag kayu sikwak, ikkayu a makkun, “Sitoye onnu daddaramat, umang kamina so tata a lubbun. Magyang kamina sinay si tarawun a mannegosyu anna mappaoddu si pirak.” 14 Kasannayu ammuweno mededemmu kadaddaramatanna? Ammeyu ammu nu kasanna karoddag yo angat diyaw! Ibbafa yo angat diyaw manilla yo lappat a ammena mabbayag e maawan keppay. 15 Imbes, sapitan diyaw nad iyaw, “Nu uray i Afu, matolay kamina anna makwamina iyaw onnu makwamina iyan.” 16 Udde sitoye, mappakkaw kayu so pabbalagaseyu. Amminan a kunna sitaw a pappakkaw e maral.
17 Nabu seanya yo makaammu so matunung a makwa anna ammena akwan e malliwat.