Na Paggaggad si Dila
3
Wawwayik, ammena maawag a oddu sikwayuweno mamurebana a mattabali si mestruwera. Se ammuyu, ikkanetam a mestruwera e mangangngad a nunutanna etamma i Dios ammat so korwan a tolayera.2 Se ikkanetam amminan e malliwat si oddu. Nu wara a ammena a malliwat so sapitanna awan pakkuranganna anna magaggaddanneno baggina. 3 Nu ekwanantam si bisang a baliyang so sangiyeno kabayuwera takesi kuruwanda etamma, megiyatam ira nu sintaw a kanggamtam a tanganda. 4 Parefu iyaw so dokal a mallayad a bapor. Maawagngeno matuyag a leled tapenu mapaguyuna. Udde yo tolay a mattimun so bapor e mangiyusa lamang si bisang a tagwan a nakaiyekwa so likud ino bapor a mangigiya nu sintaw a kanggamma a tangan. 5 Si kakunna keppay, yo dila na tolay se maski bisang iyaw a parte na baggi, damana a ipannakkaw meafu si maski sanna a dorokkal a kiya-kiyan.
Anna yo bisang a afuy a nu magangabban e makataggab si mawayang a kabakuluran. 6 Na dila e manilla afuy. Makaangwa si odduwengke a kamarallan so partera na baggi. Mangiwarak si kamarallan so interu a baggitam anna makadaral si interu akkatolay na tata tolay. Na pakapangwana a manaral e maggabwat so infiyernu.
7 Amminan a garannud na pappitut anna aggayam ira a mallaka-lakad onnu makkakarayap onnu migigyan so danum e damana a paamun anna mapaamuweno tolayera, 8 udde yo dila e ammena magaggaddan maski yanya a tolay e maffunaw anna maral. Kakunna yo kappatay a lason. 9 Iyusatam ino dilatam a maddayaw sike Afutam anna Amatam, udde imamodtam ino tolayera a pinaratu i Dios a kakunnana. 10 Iyusatam yo sangitam a maddayaw anna mangimamod. Ammena nad medemmu iyaw, wawwayik. 11 Ammena dama a maayus ino malinis anna mapēt a danum so antu keppay a bitufut. 12 Wawwayik, gakkurug ingke a ammena mamungeno kayu a igos si olibuwera anneno ubas e ammena mamunga si igos ira. Maggabwat kad yo mammit a danum so bitufut a napannu si maasin a danum?
Adwa Garannud a Angngammu
13 Yanya kad yo mangngammu anna makaintindi sikwayu? Ipaitana iyaw megafu si fustu a akkatolay a kebalinan na pattapaibbafa anna angngammu. 14 Udde nu yo korwan sikwayu e mapassil ingke anna makabaggi a panggamman si nakam diyaw, amme kayu nad mappakkaw anna sapitan diyaw a yo sapit i Dios e ammena gakkurug. 15 Bakkan iyaweno garannud a angngammu a maggabwat sike Dios. Maggabwat iyaw so tolayera sito lubag a awan sikwareno Espiritu i Dios. Maggabwat so diyablu ingkepay. 16 Nu sintaw a ana passil anna makabaggi a panggamman, anana gulu anna amminan a garannud a maral a taddera. 17 Udde yo tolay a maggabwat ino angngammuna sike Dios a ana si langit e palungu si amminan e awan nalliwatanna, makapammapiya si tolayera, makkira-kiran, sibubukkat yo agginonotanna, minaggikallak, minaggiduffun, ammena mappaita si pappeduma si tolayera anna ammena mappesimpat. 18 Nu maimammak a manolayeno tolayera anna manuffun si korwan ira a manolay si imammak antu yo kebalinanna e matunung a akkatolay.