Na Akkepalanán Metulyat si Pappeduma
2
Wawwayik, gumafu se mangurug kayu sike Afutam a Jesu Kristo a madayaw, amme kayu mappeduma si maski yanya a tolay.2 Gangngaryan, nu yo tata tolay a nakasakkalang si bulawan anna nakabarasi si makasta a sinnun e umang so passosoronnungan diyaw, anna nu yo tata a madiyat a tolay a nakabarasi si madakkut e umang pay, 3 anna taratunnu si mapiya yo nakabarasi si makasta e kunnu, “Mattuttudka sito makasta a pattutturan” e kunnu so madiyat, “Mattaddagka sitan” onnu “Mattuttudka so dunan na takkik.” 4 Nu kunna sinayeno akwan diyawna, mangwa-angwa kayu si pakeduman diyaw ingkepay anna mattabali kayu si gumannunut si maral a ginanakam.
5 Maningngag kayu, iddu-iddukangku a wawwayik, yo madidiyat ira sito lubag e pinilinera i Dios tapenu indannera si mapiya a akkatolay gumafu se mattalak ira sikwana, anna bulunnanera so pattangngalan a netambana so inoyera a midduk sikwana. 6 Udde pinaatallan diyaweno madiyat ira. Bakkang kad a yo dammak ira yo nangilupe-lupet sikwayu? Bakkang kad a ira yo màakusa sikwayu so usgadu? 7 Bakkang kad a ira yo massapit si maral metulyat sike Jesu Kristo, yo tata a mepangngat si dayaw, antu yo keyannungan diyaw?
8 Mapiya yo akakwan diyaw nu gakkurug a parulotan diyaweno katunungan na pattangngalan i Dios a kunna so neturak a sapit i Dios, “Iddukannuweno kasittolem kakunna yo piddukngu si baggim ingkepay.” 9 Udde nu taratun diyaweno tata tolay a mas kaawan ingke ammat si korwan, malliwat kayu anna meantu so katunungan i Dios, maawag a makastiguwang kayu.
10 Seanya yo ammena makimoray si maski tata so katunungan ira i Dios, ibilangnga i Dios baggina a nalliwat so ammena pakimoray si amminan a katunungan ira. 11 Se kunna i Dios, “Ammeka makikkarallaw”, kunna kepay, “Ammeka mamapatay.” Se maski nu ammeka makikkarallaw udde mamapateka, nattabalika a tolay a amme makimoray si katunungan ira i Dios.
12 Antu mimud kayu so agguyuwan anna aggabiran diyaw gumafu se manunut kayu meantu so katunungan a mallibre sikwayu. 13 Awan allak a nunutanna i Dios ino tolay a ammena ammu a mangikallak si kasittolenera. Udde yo allak i Dios e lumantaw ammat si annunutna.
Na Angngurug a Awan Mapiya a Taddera e Awan Serbina
14 Wawwayik, nu kun diyaw a ana angngurug diyaw udde awan inangwayu, iyan a angngurug e awan serbina. Na kunna sitan a angngurug e ammena dama makatabbut sikwayu. 15 Nu yo wayiyu si angngurug e awan barasina anna makkurang si kinaaw a akkanan, 16 anna tata sikwayuweno massapit sikwara, “Ingkayu si piya, mabbarasi kayu e mangngang kayu si oddu,” udde nu ammeyuwera indan nu nenay yo maawag na baggira, awan a serbina sikwara. 17 Kakunna keppay si angngurug, awan serbina nu ammena maipaita si mapiya a taddera.
18 Udde anana a makkun, “Ana angngurugngu anna ana mapiya a inangwak ira.” Ipaitam sikwak yo angngurugngu, nesina so mapiya a inangwam ira anna ikkanak, si mapiya a inangwak ira e maipaitaknga sikwam yo angngurugku. 19 Mangurugka a ana lamang tata Dios e fustuka. Maski yo demonyuwera e mangurug ira sike Dios e mayyayyak ira si talora. 20 Illawka a tolay! Kanggammu kad a pruweba a yo angngurug a awan mapiya a aggangwera e awan serbina? Taddangku sikwam.
21 Bakkang kad a i aggidiyafuwantam a i Abraham e matunung si aggita i Dios gumafu so inangwana a pangiwalli so anaknga a i Isaac so altar a pangidutungan si walliyera? 22 Maimammatan diyaw nad a ammena lamang a makurug a nattalak i Abraham sike Dios udde inangwana yo netunduna i Dios sikwana a akwanna. 23 Antu naparulot so neturak a sapit i Dios a kunna, “Nangurug i Abraham sike Dios e nebilang baggina sikwana a matunung,” e naayan baggina a kolak i Dios. 24 Maitayu a yo tolay a mangwa si mapiya a aggangwera e nebilang i Dios a matunung bakkan lamang se ana angngurugnga sikwana.
25 Kunnapay, bakkan kad a i Rahab, yo mapagan a bafay a nebilang pay a matunung gumafu so inangwana sin dinuffunanneno Israelitera a nedundun a mespiya para so tolayera i Dios. Pinadulotneno gumabbanduwera so balena anna dinuffunannera a makatamang si tameta a dalan.a
26 Kakunna yo baggi a awan espirituna e natay, antu kunnapay yo angngurug a awan mapiya a aggangwera e nebilang a natay.