Na Turak i
Santiago
1
Ikkanak i Santiago, tata a gumasserbi i Dios anni Afu Jesu Kristo. Antuweyaw yo turakku so tafulu adwa a tribuwera na Hudyuwera a nattalak sike Kristo a nassiwarak so interu a talubaggan.Manantaw kayu amminan?
Angngurug anna Angngammu
2 Wawwayik ira si angngurug, ibilang diyaw a kaangga-anggam ingke, maski nu mapureban diyaweno naddadaruma a garannud na paddiriyat, 3 gumafu se ammuyu a nu mapureban yo angngurug diyaw, mapasensiyan diyawna a attamman yo paddiriyat. 4 Udde kalakammun diyaw nad a maattamman amminan takesi mannakam kayuna si amminan a akwan diyaw anna ammeyuna makkurang si maski sanna a kanggam i Dios a pattabaliyan diyaw. 5 Nu ana sikwayu a makurang si angngammu, marang kayu sike Dios e iyaddana sikwayu. Se i Dios e minaggiyadda so amminan a tolayera a marang sikwana anna ammena ituki-tuki. 6 Udde nu marang kayu, ana nad angngurug diyaw a iyaddanana i Dios ino arangngan diyaw anna ammeyu nad mabbabang. Se yo tolay a mabbabang, kakunnana yo palung na bebay a mesibba-sibbat si leled. 7 Se iyan a tolay a mabbabang e ammena nad innanaman a makaarasaw si maski sanna sike Dios. 8 Na tolayera a kunna sitan e mannono-nonot si adwa a naddadaruma a kiya-kiyan si makkaparefu a tiyempu. Ammerengke makadesisyon nu nenay a makwa.
Na Addidiyat anna Wara-wara
9 Na madidiyat a minangikkurug ira e maanggam nad a ibilangngera i Dios a kaawan. 10 Anna minangikkurug ira a dammak e maanggam nad nanu pataibbaffandera i Dios gumafu se yo wara-warara e maawanna kakunna yo lappaw so uma a malan a malelay. 11 Se nu mapatuwengke yo sinag, malelayeno mulera, madarannag ino lapponera anna makkupat ino kastana. Kakunna keppayeno makwa so dammak ira a matayerana sikwara a makatara-tarabafu.
Pamureba anna Pakkakkap
12 Mapiya i Dios so tolayera a makaattam si pakkakkap. Kapiyera a napruweban ino angngurugga, indannerana i Dios si pammakapiyana a angat a awan pakiyaranna. Netamba i Dios iyaw so amminan a tolayera a midduk sikwana. 13 Nu nakakkap ino tata tolay, ammena nad sapitan a i Dios yo mangakka-kakkap sikwana, se i Dios ammena dama makakkap si maral anna baggina ingkepay e awan kakkappanna. 14 Udde makakkap ino tata tolay nu maganggari anna magonggon baggina si maral ira a panggamman na baggi. 15 Nu akwanneno panggamman ino baggina, antu malliwat baggina, anna nu ibali-balinna a malliwat mesinana baggina sike Dios amu-amu. 16 Iddu-iddukangku a wawwayik, amme kayu nad a mappailloku. 17 Amminan a neyadda sikwatam a mapiya anna awan a pakkuranganna e naggabwat sike Dios. Baggina kepay yo namaratu si amminan a sirwat ira si langit, udde maski mangangka-angkakwera, ammenengke mangangkakwa i Dios. 18 Antu yo urena a mangadda sikwatam si bawu a akkatolay si gakkurug a tunturunera takesi mattabali etamma a kaawan ingke si amminan a pinaratuna.
Na Anningngag anna Iyakkatolay yo Sapit i Dios
19 Iddu-iddukangku a wawwayik, intindin diyaw nad iyaw: Sittata nad sikwayu a sibubukkat ingke a maningngag ammat a massapit, udde amme kayu nad a mappalan a massapit anna malan a mallang. 20 Se nu makaallang ino tata sikwayu, ammeyuna makweno matunung a kanggamma i Dios a akwan diyaw. 21 Kunnantu, ibbattan diyaw a mangwa si amminan a garannud a maral anna mattaibbafa kayu a makimoray si sapit i Dios a nepakaammuna sikwayu gumafu se iyaw a tunturuwera e dama nakayu a matabbut.
22 Udde amme kayu nad lamang maningngag si sapit i Dios. Akwan diyaw penad nu nenay a sapitanna. Nu kunna sitan, illo-illokun diyaw lamang yo baggiyu. 23 Se nu yo tata tolay e maningngag so sapit i Dios e ammena makimoray, mekunna baggina si tata tolay a mangita-ita so mutungnga so ispefu. 24 Se nu itanneno mutungnga so ispefu anna manaw baggina, siddarat a nakalyawanneno gimutunganna. 25 Udde inoyera a mangibali-balin a kalakammun ino awan pakkuranganna a katunungan i Dios a mallibre so tolayera antu indannerana i Dios si mapiya akkatolay gumafu so inangwara. Baggireno mangwa anna ammera lamang a maningngag anna akkabalinna e makalyawanda.
26 Nu yanya a mannonot a relihiyoso baggina, udde ammena magaggaddan ino sangina, illo-illokunna ingkepay yo baggina. Awan serbina yo pakkarelihiyosona. 27 Na gakkurug a relihiyon a awan pakaliwatanna anna awan pakadakkutanna si aggita i Dios Ama e antuweyaw: manabbud so ulila ira anna balu a bafabbayera a massufri si paddiriyatda anna mimud si baggira takesi ammera makalasiyan so kamarallan na talubaggan.