Tunturuwera Patamu si Annuffun so Madidiyat Ira
6
Nebalinna i Jesus a nanundu e kunna, “Itan diyaw a amme kayu mangwa si mapiya so allangan na tolayera tapenu mapadayawang kayu. Se nu iyan yo akwan diyaw, awan a maarasoyuna a pammakapiyan a naggabwat so Amayu si langit.2 “Antu nu manuffungka so madidiyat ira, ammem ipakaammu si korwan ira kakunna yo akwan ino mappesimpat ira so sinagogera anna so dalan ira takesi mapadayawan ira yo tolayera. Gakkurug yo itunduk sikwayu, inarasoran ino pammakapiyanda. 3 Udde nu manuffungka so madidiyat ira, ammemun ipakaammu so kadikkat a kolakngu 4 takesi awan a makaammu so neyaddam, anni Amam si langit a makaita so akakwannu a ammena maammuwan ino korwan ira, iyaddanana sikwam yo pammakapiyannu.
Tunturuwera Patamu si Addasal
5 “Anna nu maddasal kayu, ammeyu tuntulan ino akakwan ino mappesimpat ira, se kanggamda a mattaddag anna maddasal so sinagogera anna idagnga kalsadera takesi maiteno tolayera baggira. Gakkurug yo itunduk sikwayu, inarasoran ino pammakapiyanda. 6 Udde nu maddasalka, tumallungka so kwartum, iserram ino lenab anna maddasalka sike Amam a ammena maita. Se i Amam si langit a makaita so akakwannu a ammena maammuwan ino korwan ira, iyaddanana sikwam yo pammakapiyannu.
7 “Anna nu maddasal kayu, amme kayu mangiyusa si sapit ira a awan serbina a kakunna yo akwan ino bakkan a Hudyuwera a amme mattalak sike Dios, se arigga a dingngaggan i Dios ino aroddag a dasaldera. 8 Ammeyuwera a tuntulan, se ammu i Amayuweno maawag diyaw liyeyu a arangngan sikwana. 9 Kunna sitaw kayu maddasal,
Amami a ana si langit,
madayaweno ngannu.
10 Tangngallan dakami,
makweno urem sito lubag maningke si langit.
11 Indan dakami si akkanammi si kinaaw.
12 Anna pakoman dakami so liwa-liwatmi
kunna pay yo pammakomami so nakaliwat ira sikwami.
13 Anna ammem ipabulun a makakkap kami
e tabbutan dakami so maral a akakwan i Satanas.a
14 Se nu pakoman diyaweno nakaliwat ira sikwayu, pakoman dakayuna i Amayu si langit. 15 Udde nu ammeyuwera pakoman, ammena pena pakoman i Amayu si langit yo liwa-liwat diyaw.
Patamu si Angngilin
16 “Anna nu mangngiling kayu, ammeyu ipaita a maraddam kayu a kakunna yo mappesimpat ira. Ammera ingguran ino baggira ingkepay takesi memunuwanneno tolayera a mangngili-ngilin ira. Gakkurug yo itunduk sikwayu, inarasoran ino pammakapiyanda. 17 Udde nu mangngiling kayu, lanan diyaweno uluyu anna mimomat kayu 18 takesi awan a makaita si mangngiling kayu nu bakkan i Amayu lamang a awan ingke makaita e bagginaneno mangadda si pammakapiyan diyaw.
Na Wara-wara si Langit
19 “Amme kayu mimfun si pakkukwayuwera sito lubag gumafu se yo anayera anna lati e darallandana anna ana tolayera a tumallungnga a makkokot. 20 Imbes, mangwa kayu si mapiya a taddera a makapaanggamma sike Dios a meyarig si pimfun si wara-wara si langit se awan anayera anna lati a manaral e awan makatallung a makkokot. 21 Dandamman diyaw, nu sintaw yo pakkukwayuwera, iyan ino sigganonot diyaw.
Na Tunturu i Jesus meafu si Pinaggiyadda
22 “Na mata e manilla yo sirwat na baggi. Antu, nu yo matam e mapiya kanggamma sapitan e minaggiyaddaka, mabaggawanneno nonotnu a maammuwannuna amminan a kanggam i Dios. 23 Udde nu maral ino matam kanggamma sapitan e maitukka, ammemma ammuweno fustu manilla ana so kalammukan ino nonotnu. Kunnantu, nu yo sirwat a ana nad sikwam e awan, gakkurug anaka si kalammukan.
Dios Onnu Pirak
24 “Awan a imbut a paggindananna a passerbiyan ino adwa a amu se iddukanneno tata anna ikalussawneno meka-adwa, makurug a passerbiyanneno tata anna arariyanneno meka-adwa. Kakunna keppay, ammeyu dama a paggindanan a serbiyan i Dios anneno wara-wara sito lubag.
Tabarang Patamu so Ammena Pabburu-burung
25 “Kunnantu, itunduk sikwayu, amme kayu a mabburu-burung patamu so maawag diyawera tapenu matolay, nu nenayna yo akkanan onnu inuman diyaw, onnu yo patamu si baggiyu, onnu nenayna yo iyallung diyaw. Se mas kaawan yo angat ammat si maakkan anna mas kaawan yo baggi ammat si sinnun. 26 Itan diyaweno pappitut ira, ammera a mammula onnu maggani onnu mimfun so alangga udde i Amayu si langit yo mamakkan sikwara. Bakkang kad a mas kaawang kayu ammat sikwara? 27 Awan sikwayu a makadaggana si angatna maski tata orat lamang nu mabburu-burung kayu.
28 “Anna saay se pakaburungan diyaweno meafu si sinnun? Nonotan diyaw nu kasanna yo attalofu na simaron a lappawera, ammera a mattarabafu onnu màabil si sinnunda. 29 Itunduk sikwayu, maski i patul Solomon siin nabayagin a tiyempu a dammak e ammenengke nabbarasi si makasta a kakunna iyawera a lappaw. 30 Udde nu pakastan i Dios iyawera a kadda-kaddat anna lappaw a natolay sitoye anna metappol nanu daddaramat so paggangabban, annanotinna a iyaddana i Dios sikwayuweno maawag diyawera, ikkayu a bisang angngurugnga!
31 “Kunnantu, amme kayu maburung a makkun, ‘Nenay akkanammina anna inumammina? onnu iyallungmina?’ 32 Antuweyawera yo pakaburungan na tolayera a amme mattalak sike Dios, udde ammu i Amayu si langit amminan a kaawan diyaw. 33 Kunnantu, kumanan diyaw abbu a tangngallan dakayuna i Dios anna akwan diyaweno kanggamma a ipaangwa sikwayu e iyaddanana sikwayuweno amminan a kaawan diyaw. 34 Antu ammeyu pakaburungan nu nenayna yo medemmu daramat. Se yo daramat ana ingkepay a pakaburunganna. Se fustuwen ino pakaburungan diyaw kada aw.”