Pannunut so Korwan Ira
7
Nebalinna i Jesus a nakkun, “Ammeyu nunutan ino korwan ira takesi ammenana kayu nunutan i Dios. 2 Nunutan dakayuna i Dios a kakunna yo annunut diyaw so korwan ira. Nunutan dakayuna i Dios meantu so panuntulan a usan diyaw si pannunut so korwan ira. 3 Saay se maitam ino bisang a liwat na korwan ira udde ammem maiteno dokal a liwatnuwera? Manilla yo aggitam so bisang a dakkut so mateno korwan ira udde ammem maiteno dokal a dakkut so matam ingkepay. 4 Onnu kasannam a sapitan so bulunnu a, ‘Aringkuweno bisang a dakkut so matam,’ e ammem maiteno dokal a dakkut so matam? 5 Mappesimpatka! Arinnu abbuweno dokal a dakkut so matam takesi mabbaggaweno aggitam, liyem a arin ino bisang a dakkut so mateno bulunnu.6 “Ammeyu ilillin a itunturuweno sapit i Dios si tolayera a ammera ibilang iyaw a kaawan sikwara. Meyarig iyaw so atuwera anna bafuyera, nu mangiyaddaka si maski sanna a kaawan so atuwera, kassiban dakana keppay. Anna nu mangiyattuka si perlas so bafuyera, pimpi-pimpinandana keppay.
Marang, Mintufuk anna Mattottok
7 “Antu itunduk sikwayu, marang kayu sike Dios e maindang kayuna. Mintufuk kayu sikwana nu nenay a intu-intufukan diyaw e maintarakan diyawna. Mattottok kayu sikwana e mabukkatanneno lenab para sikwayu. 8 Dandamman diyaw, amminan a marang e makaarasaw, anna amminan a mintufuk e makaintufuk, anna amminan a mattottok e mabukkatanneno lenab. 9 Awan sikwayu a mangiyaddana si batu nu marang yo anaknga si tinapay, 10 onnu nu marang yo anaknga si busilad, ammenana indan si iraw. 11 Nu ikkayu antu a maral ira e ammuyu a mangadda si pammakapiyan na anak diyawera, annanotinna sike Amayu si langit a mangadda si mapiya a kiya-kiyan so inoyera a marang sikwana!
12 “Kunnantu, taratun diyaweno korwan a tolayera kakunna pay yo kanggam diyaw a pattaratura sikwayu se antu yo kainteruwan ino katunungan ira i Dios a neyaddana sike Moises anneno tunturu na profetera.”
Na Tallin a Pattallungan
13 Antu nangarig i Jesus a nakkun, “Tumallung kayu so tallin a pattallungan a paumang so pappatulan i Dios se mawayang yo pattallungan anna malonggon yo dalan a pakesinan sike Dios amu-amu e oddu yo tumallung so mawayang a pattallungan. 14 Se yo pattallungan so pappatulan i Dios e kakunna yo tallin a pattallungan anna madiyat ino paddalanan e bisang lamang yo makatumpal.”
Na Kayu anneno Bungana
15 “Mimud kayu so sasan-profetera. Umang ira sikwayu a manilla masimpat a karneru udde yo kagakkuruwanna, kakunnara yo simaron a atuwera a mabisin anna makapalow. 16 Memunuwan diyawerana so akakwanda. Mamunga kad yo sinaasit a kayu si ubas onnu igos? 17 Si kakunna keppay, kada mapiya a kayu e mamunga si mapiya a bunga udde yo maral a kayu mamunga si maral a bunga. 18 Ammena mamungeno mapiya a kayu si maral a bunga anna ammena pay mamungeno maral a kayu si mapiya a bunga. 19 Amminan a kayu a ammena mamunga si mapiya e magabbung anna metunguwera. 20 Si kakunna keppay, memunuwan diyawna inoyera a sasan-profetera gumafu so akakwanda.”
Inoyera a Ammena Mangurug
21 Nebalinna i Jesus a nakkun, “Bakkan amminan a massapit sikwak, ‘Afu, Afu,’ e makatallungnga so pattangngalan i Dios si langit udde inoyera lamang a mangwa si uray i Amak si langit. 22 Nanu dumatangngeno aw a nunutannana i Dios ino tolayera, odduna yo massapit sikwak, ‘Afu, Afu! Megafu so pakandama a neyaddam sikwami nepakaammumiyeno mensahe a naggabwat sike Dios, nappaanaw kami si demonyuwera anna nangwa kami si milagruwera.’ 23 Udde sapitangkuna sikwara, ‘Amme takayuwengke ammu-ammu. Ikkayu a mangwa-angwa si maral, umaroyu kayu sikwak.’
Na Pangarig na Adwa a Lallaki a Namataddag si Balera
24 “Kunnantu, seanya yo maningngag anna makimoray sito sapitkuwera, kakunnana yo mangngammu a tolay a namataddag si balena so uttun na batu. 25 Sin nuran, nallinang e nattuyag ino leled a nanibbat so balay udde ammena nadabbuk gumafu se mapaddat ino akkepataddag ino balay so batu. 26 Udde yo maningngag so sapitkuwera anna ammena makimoray e kakunna yo illaw a tolay a namataddag si balena so dāt. 27 Sin nuran, nallinang e nattuyag ino leled a nanibbat so balay nabu nadabbuk anna kurwengke a nadaral!”