Mabboboli Onnu Mawawan
13
Sitan a tiyempu, ana korwan a tolayera a nassapit sike Jesus meafu so tolayera a taga-Galilea a pinapapatay i Pilato sin nangiwalli-walliyera so Templu.2 Anna finuutdera i Jesus, “Kun diyaw kad a iyawera a tolayera a taga-Galilea e mas madammat ino liwa-liwatda ammat so korwan a tolayera gumafu se kunna sinayeno akkapatera? 3 Bakkan! Udde itunduk sikwayu se nu amme kayu mabboboli so liwa-liwat diyawera, matay kayu pena kakunna yo inangwara. 4 Kunnapay so tafulu walu a tolayera a natay sin netabbun sikwareno nadabbuk a torre na Siloe. Arig diyaw kad se mas madammat ino liwa-liwatda mas so korwan a tolayera a taga-Jerusalem? 5 Ammena ay! Udde itunduk sikwayu a nu amme kayu mabboboli so liwa-liwat diyaw, matay kayu pena kakunna yo inangwara.”
Na Pangarig na Kayu a Igos a Ammena Mamunga
6 Antu nangarig i Jesus a nakkun, “Ana tata tolay a nammula si kayu a igos so kaubasanna. Tata aw inangnga inita nu namungen udde awan ke naitana. 7 Antu kunna so gumattabbudna si mulera, ‘Itannu! Tallu rawunin a uma-umangngak sitaw a mangita nu ana bunganeno igos e awan ke naitak. Gabbungannu! Saay nad se ammetam kengan yo lubag?’
8 “Tinumabbag ino gumattabbud si mulera, ‘Afu, sitanna abbu si tarawun. Korubbangkuweno lebutna anna iyekwanangkuna si abono. 9 Mapiya nu mamunga udde nu ammena, gabbunganunna.’ ”
Pinammapiyana i Jesus ino Dungkug a Bafay
10 So Aw na Aggimemmang, nanunturu i Jesus so sinagoga. 11 Ana tata bafay sinay a tafulu walu rawunin a pinakafuyeno demonyu. Naddungkug baggina e ammena kurwa makataddag si matunung.
12 Sin naitana i Jesus ino bafay, inayanna baggina e kunna, “Mammapiyakan!” 13 Sin nepotunna i Jesus ino kamatna so bafay, siddarat a nattaddag si matunung anna dinayawna i Dios.
14 Udde nakaallang ino afu-afu na sinagoga gumafu se nappammapiya i Jesus so Aw na Aggimemmang e kunna so tolayera, “Ana annam a aw a damayu a mattarabafu. Antuweyaw yo awera a damayu umang a mappammapiya bakkan so Aw na Aggimemmang.”
15 Udde kunna i Jesus sikwara, “Mappesimpat kayu! Ammeyu kad uttaran ino siggut na baka onnu asno so lutung anna iyang diyaw so pinumanna si danum? 16 Ammena kad meyannut a yo tata gaka i Abraham a pinadiyatan i Satanas si tafulu walu rawun e mapammapiya so takitna so Aw na Aggimemmang?”
17 Sin sinapit iyaw i Jesus, napaatallan amminan ino nammay sikwana e nangga-anggam ingkeno tolayera so kakkapallat a kiya-kiyan a inangwa-angwana.
Na Pangarig na Bisang Ingke a Bukal
18 Naffuut i Jesus, “Nenay a kakunna yo pattangngalan i Dios? Anna nenay yo pangiyarigangku sitan? 19 Kakunna yo bisang ingke a bukal a nemula na tata tolay so pammulanna. Dinumokal iyaw e nattabali si kayu anna pumukan na pappitut ira yo panga-pangana.”
Na Pangarig na Labadura
20 Finuutna i Jesus sikwara, “Nenay nad yo pangiyariggangku so pattangngalan i Dios? 21 Kakunna iyaw si labadura a nelamud ino bafay so tata dokal a palanggana na arina makiyad si inumalsa amminan.”
Na Tallin a Pattallungan
22 Inang i Jesus a nanunturu so lubbu-lubbun anna so tarabbunan ira dengke paumang baggina so Jerusalem.
23 Tata tolay a nakkun sikwana, “Afu, bisang kad lamang yo matabbut i Dios?” Kunna i Jesus sikwara,
24 “Na paumang si langit e manilla tumallung so tallin a lenab. Kunnantu, akwan diyaw nu nenay a damayu a akwan a tumallung sitaw a tallin a lenab. Itunduk sikwayu, odduna yo mamureba a tumallung e ammerana makatallung. 25 Se nanu iserra na makambalayeno lenab, mattadda-taddag kayuna so lawan anna mattottok kayuna so lenab anna kun diyawna sikwana, ‘Afu, ibukkatan dakami!’ E kunnana sikwayu, ‘Ammek ammu nu sintaw yo naggabwatan diyaw.’ 26 Kun diyawna sikwana, ‘Nakiinum anna nakiakkang kami sikwam. Nanunturuka so tarabbunammiyera.’ 27 Udde netabbagnga, ‘Ammek ammu nu sintaw yo naggabwatan diyaw. Umaroyu kayu sikwak, ikkayu amminan a mangwa-angwa si maral!’
28 “Maitayuna i Abraham, i Isaac anni Jacob anneno amminan a profetera so pattangngalan i Dios. Mattangi-tangit anna mangngari-ngaritam kayuna sinay anna mabattang kayuna so liwan! 29 Odduneno tolayera a dumatang a maggabwat so naddadaruma a lugar a makiakka-akkan a bulun i Dios so pappatulanna. 30 Gakkurug a inoyera a mauddi e mapalunguna anna inoyera a mapalungu e mauddina.”
Na Idduknga i Jesus so Tolayera na Jerusalem
31 Sitan a tiyempu, inumaranniyeno korwan a Fariseowera sike Jesus e kunda sikwana, “Maawag se manawka sitaw se kanggammaka a patayan i Herodes Antipas.”
32 Udde kunna i Jesus sikwara, “Itunduyu sitan a tolay a awan serbina a ibali-balingkuna sitoye makiyad so tumuntufad ira a aw a mappalawan so demonyuwera anna mappammapiyeno matakit ira makiyad si mabalingkuweno tarabafuk.a 33 Udde maawag a maddoyugak sitoye makiyad nanu daramat anna so tumuntufad a aw so Jerusalem, se ammena dama a mapapatayeno tata profeta nu bakkan sinay.”
34 Nebalinna i Jesus a nakkun, “Ikkayu a taga-Jerusalem a namapatay so profetera anna nilappag diyaw inoyera a nedundun i Dios sikwayu. Namimpigyen a kinanggammangku a ammungan amminan a anak diyawera a manilla tata upa a ammunganneno piyakngera udde ammeyu ke kinanggamman. 35 Antu sitoye, purayan nakayu i Dios, yo Templuyu anna lubbun diyaw. Itunduk sikwayu, ammerakunna a maita makiyad si dumatangngeno tiyempu a kun diyawna meafu sikwak, ‘Mapiya i Dios sikwana a dumatang si pakapangwa i Afu!’ ”