Inarariyanna i Jesus ino Fariseowera anneno Mapoporay si Katunungan
23
Sinapitna i Jesus so tolayera anna so disipulunera, 2 “Na mapoporay si katunungan anneno Fariseowera e ana damaramara a ipaintindi so tolayera nu nenay kanggamma sapitan ino katunungan i Moises. 3 Kunnantu, akwan diyaw nu nenay itunturura sikwayu anna tuntulan diyaw, udde ammeyu tuntulan ino akakwanda se ammera akwan ino itunturura. 4 Ipakimorera so tolayera ino oddu a katunungan ira a madiyat a matuntul a manilla ipabuttungga sikwareno madammat a akkitdera anna ammerera kepay a maduffunan maski bisang.5 “Passi passalasasan amminan a akakwanda gumafu se padokallandeno pangiyekwanan ira si neturak a sapit i Dios a iyekwa-ekwara so kirera anna afara anna paasoddandeno barebay na barasira! 6 Nu makifunsyon ira pilindeno pattutturan na kaawan a tolayera anna kunna keppay yo akwanda so sinagogera. 7 Kalakanggammandengke a melawa so merkadowera anna maayan ira na tolayera si ‘Mestru.’
8 “Udde amme kayu mappaayag si ‘Mestru’ se ikkanak lamang yo Mestru anna manilla kayu amminan a mawwawayi. 9 Anna ammeyu dayawan maski yanya sito lubag megafu si payag sikwana si ama, se tata lamang yo Amayu a ana si langit. 10 Onnu amme kayu mappaayag si afu se ikkanak i Mesiya, yo tata lamang a Mestru. 11 Na kaatannangan sikwayu amminan antu yo masserbina sikwayu. 12 Seanya yo mappeyatannang e maawananna si dayaw, anna seanya yo mappataibbafa e mapadayawanna.
Pinalanánna i Jesus ino Fariseowera anneno Mapoporay si Katunungan
13 “Madammat ingkeno akkastigu a medemmuna sikwayu a mapoporay si katunungan anna Fariseowera! Mappesimpat kayu! Se finuwaddan diyaweno tolayera a tangngallan i Dios. Ammeyu kepay kanggam a mappatangngal sike Dios, finuwaddan diyaw kepay yo tolayera a manggam a mappatangngal sike Dios. 14 (Madammat ingkeno akkastigu a medemmuna sikwayu a mapoporay si katunungan anna Fariseowera! Mappesimpat kayu! Tinamfut diyaw amminan ino pakkukwera na balu a bafabbayera anna maddasal kayu si aroddag kunnantu makastiguwang kayunengke si madammat.)
15 “Madammat ingkeno akkastigu a medemmuna sikwayu a mapoporay si katunungan anna Fariseowera! Mappesimpat kayu! Se ginumaddang kayu so bebay anna manondoyug kayu si interu a talubaggan takesi angga-anggamman diyaweno bakkan a Hudyuwera a mattabali si Hudyu. Nu wara tata a naangga-anggamman diyaw, tuntulannana kayu makiyad si makaangwana si oddu a maral ammat sikwayu anna mas madammatneno akkastiguna so infiyernu.
16 “Madammat ingkeno akkastigu a medemmuna sikwayu a kakunna yo bulag a afu-afuwera gumafu se itunturuyu a nu ana mattamba sike Dios a usanneno Templu a testiguna, kun diyaw a damana lamang iyan nu ammena akwan ino tambana. Udde seanya yo màingan a usanneno bulawan na Templu a testiguna, kun diyaw a malliwatna baggina nu ammena akwan iyaw. 17 Illaw kayu a bulag ira! Nenay yo mas kaawan? Na bulawan onnu yo Templu a meyaparte yo bulawan para sike Dios? 18 Kun diyaw kepay a seanya yo màingan sike Dios a usanneno altar a tesiguna, damana lamang iyan nu ammena makwa. Udde nu màingan baggina e usanneno walli so altar, kun diyaw a malliwatna baggina nu ammena akwan iyaw. 19 Gakkurug a bulag kayu! Ansa kad yo mas kaawan? Na walli onnu yo altar a nattabali si meyaparte a walli para sike Dios. 20 Antu, nu màingan yo tolay a usanneno altar a testiguna, màingan pay baggina a usanna amminan so altar. 21 Udde seanya yo màingan a usanneno Templu a testiguna, akakwanna iyaw sike Dios a makan-akwa so Templu. 22 Anna seanya pay a màingan a usanneno langit a testiguna, màingan pay baggina a usanneno trono i Dios a testiguna anni Dios a nakatuttud sinay.
23 “Madammat ingkeno akkastigu a medemmuna sikwayu a mapoporay si katunungan anna Fariseowera! Mappesimpat kayu! Se iyaddayuweno katafulu a nagani so mulayuwera maski yo mulera a neyusa a rekaduwera udde ammeyu pakimorayan ino kaawan ingke a katunungan: Ammena fustuweno pattaratuyu so korwan a tolayera, amme kayu a minaggikallak anna amme kayu a matalakkan. Antuweyawera yo katunungan ira a maawag a akwan diyaw a ammena mapurayan ino korwan a katunungan ira. 24 Ikkayu a bulag ira a taga-kewid! Imuran diyaw a maparulot ino katunungan ira a ammena kurwa kaawan anna ammeyu inindan si kaawan ino dundun ira. Manilla kayuweno tolay a masserni si ilak so pinumanna, udde sillunanneno kamelyu.
25 “Madammat ingkeno akkastigu a medemmuna sikwayu a mapoporay si katunungan anna Fariseowera! Mappesimpat kayu! Unafan diyaweno lawan na tasera anna duyug ira udde si unagnga, napannuwera si naappayu si paddarogat si korwan ira anna paanggam si baggiyu ingkepay. 26 Ikkayu, bulag a Fariseowera! Palungun diyaw a talekkuran ino maral a ginanakam a kakunna yo pallinis so unag na tasa takesi yo lawan na tasa e mattabali pena a malinis.
27 “Madammat ingkeno akkastigu a medemmuna sikwayu a mapoporay si katunungan anna Fariseowera! Mappesimpat kayu! Se manilla kayu a pattanamman ira a napintoran si furaw a makasta itan so lawan udde so unagnga e napannu si tula-tulang anna amminan a korwan a garannud na dakkut. 28 Si aggiteno tolayera e matunung kayu, udde yo kagakkuruwanna mappesimpat kayu anna maral.
29 “Madammat ingkeno akkastigu a medemmuna sikwayu a mapoporay si katunungan anna Fariseowera! Mappesimpat kayu! Se inangwayuweno pattanamman ira na profetera anna pinakastayuweno pattanamman ira na matunung a tolayera, 30 anna kun diyaw, ‘Nu ana kamin nad sinoy so tiyempu na aggidiyafuwammiyera, ammemiyera nad a dinuffunan a patayan ino profetera.’ 31 Nu kunna sitan, taddan diyaw a naggabwat kayu so gakera a namapatay so profetera! 32 Ara! Balinan diyaweno nepefunan ino aggidiyafuwan diyawera. 33 Maral kayu! Manilla kayu a familya na irawera! Kasannayu a malillikan ino akkakastiguyu so infiyernu. 34 Kunnantu, itunduk sikwayu a mangidundunaknga sikwayu si profetera, mestruwera anna mapoporay si katunungan, udde papatayan diyawneno korwan ira anna ipatak diyawerana si kurut, anneno korwan e lassi-lassitan diyawerana so sinagogera anna ilupe-lupet diyawera so lubbu-lubbun. 35 Nabu, makastiguwang kayuna so akkapatayeno amminan a tolayera sito lubag a awan liwatda mamefu so akkapatay i Abel a matunung makiyad sike Zacarias a anak i Barakias. Pinateyu i Zacarias so nallatanan na Templu anna altar a paggangabban na walliyera. 36 Gakkurug yo itunduk sikwayu a amminan iyawera a akkastigu e medemmuna sitoye a diyafuwan!”
Na Idduknga i Jesus para so Tolayera na Jerusalem
37 Nebalinna i Jesus a nakkun, “Ikkayu a taga-Jerusalem a namapatay so profetera anna nilappag diyaw inoyera a dinundun i Dios sikwayu. Namimpigyen a kinanggammangku a ammungan amminan a anak diyawera a manilla tata upa a ammunganneno piyakngera udde ammeyu ke kinanggamman. 38 Maningngag kayu, maanawanneno Templuyu e awanna mabattang sitaw. 39 Itunduk sikwayu, ammerakunna a maita makiyad si dumatangngeno tiyempu a kun diyawna meafu sikwak, ‘Mapiya i Dios sikwana a dumatang si pakapangwa i Afu!’ ”