Pinammapiyana i Jesus ino Lalaki a Matakit
14
Namitta aw na Aggimemmang, naimbitan i Jesus a mangngan so balayeno tata afu-afu na Fariseowera. Langnga-langngaddandengkeno Fariseowera anneno mapoporay si katunungan yo agguyu-guyuwanna.2 Ana tata lalaki sinay a mallattat ino baggina. 3 Antu finuutna i Jesus ino mapoporay si katunungan na Hudyuwera anneno Fariseowera, “Meantu kad si katunungantam a mappammapiya si matakit so Aw na Aggimemmang onnu ammena?”
4 Udde ammera a tinumabbag sike Jesus.
Antu iniggammanna i Jesus ino matakit, pinammapiyana anna pinaulina. 5 Anna kunna sikwara, “Nu ana tata sikwayu a ana anaknga onnu bakana a nadannag so bufun so Aw na Aggimemmang, ammena kad iyaw siddarat a igaddang maski nu Aw na Aggimemmang?”
6 Ammera nakatabbag so fuutna.
Na Annunturu Patamu si Pappataibbafa
7 Sin naitana i Jesus ino bisitera a nappili-pili si pattutturan ira a nakaparan para so kaawan a tolayera, sinapitna sikwara iyaw a pannabarang, 8 “Nu naimbitang kayu so tata paboda, amme kayu mattuttud so pattutturan a nakaparan para so kaawan a tolayera tantaro ana naimbitan a mas kaawan a tolay ammat sikwayu. 9 Tantaro aranniyan dakayuweno naimbita anna sapitanna sikwayu, ‘Iyaddayu sikwana iyan a pattutturan.’ Mapaatallang kayu anna sinay kayu mattuttud so pattutturan a nakaparan para so tolayera a ibbafeno akkatolera.
10 “Nu bakkan lud, se nu naimbitang kayu, sinay kayu mattuttud so pattutturan a nakaparan para so tolayera a ibbafeno akkatolera se nu umaranni sikwayuweno naimbita e sapitanna, ‘Wayi, sitawka mattuttud so pattutturan a nakaparan para so kaawan a tolayera.’ Anna mapadayawang kayu so allangan na amminan a naimbitan so paboda. 11 Seanya yo mappeyatannang e maawananna si dayaw, anneno mappataibbafa e mapadayawanna.”
12 Kunna pay i Jesus so naimbita sikwana, “Se nu mangiparangka si panangnganaw onnu pananggafi, ammem a imbitan ino kolaknguwera, wawwayim, kawayyannuwera, onnu yo dammak a kakkarebbingnguwera. Tantaro nu imbitan daka e metolira keppay yo inangwam sikwara. 13 Antu nu mappafunsyongka, imbitannuweno madidiyat ira, ino ammera makalakad, ino pilayera, anneno bulag ira. 14 Se nu kunna sitan ino inangwam, indan naka i Dios si pammakapiyannu, gumafu se nu ammera metoliyeno inangwam, i Dios ino mangitoli sikwam so panantotolay a nebilang i Dios a matunung a tolayera.”
Na Pangarig meafu so Dokal a Paboda
15 Sin nadingngag iyaweno tata so katallangnga sinay, kunna sike Jesus, “Mapiya i Dios so tolay a makatallang so maangwa a funsyon so pappatulanna!” 16 Antu nangarig i Jesus sikwana, “Ana tata lalaki a nangiparan si dokal a funsyon e oddu tolay a naimbitanna. 17 Sin dinumatang ino orat na funsyon, dinundunneno imbutna a itundu so naimbitan ira, ‘Kataw kayun, se nakaparan amminanin.’
18 “Udde sittatera a nangakiran. Kunneno palungu, ‘Nakagatangak si uma anna maawagku iyaw a itan. Pammakomam se ammek a makaumang.’ 19 Kunnapay yo tata, ‘Nakagatangak si lima parit a baka anna maawagkuwera a pureban. Pammakomam se ammek a makaumang.’ 20 Kunnapay yo tata, ‘Bawuak lamang a nakiatawa, antu ammek makaumang.’
21 “Antu nuliyeno imbut anna netunduna amminan iyaw so amuna. Nakaallang ino amu antu kunna so imbut, ‘Palanannu a umang so dalan ira anna so tallin a pallakaran ira na lubbun, anna ibulunnu sitaweno madidiyat ira, ino ammera a makalakad, ino bulag ira anneno pilayera.’ 22 Kapiyena iyaw a inangwa na imbut, kunna so amuna, ‘Amu, naangwakun ino netundum udde oddu kepay a pattutturan.’ 23 ‘Nu kunna sitan’, kunneno amu so imbut, ‘Umangka so pallakaran ira anna so dalan ira so lawan na lubbun, anna ilillinnu a paumangan sitaweno tolayera takesi mapannuweno balek. 24 Itunduk sikwayu, awan maski tata so palungu a naimbitangkuwera a makatantam so neparangku!’ ”
Na Maanggam a Mattabali si Disipulu i Kristo
25 Dinumandan sike Jesus ino odduwengke a tolayera so paddoyugnga paumang so Jerusalem. Tinallangngera e kunna sikwara, 26 “Ammena dama a mattabali si disipuluk ino midduk sike amana anna inana, sike atawana anna anakngera, sike wawwayinera, anna maski si angatna mas ingke sikwak. 27 Seanya yo ammena makaattam si diyata anna dumandan sikwak e ammena dama a mattabali si disipuluk.
28 “Gangngaryan, nu wara sikwayu e manggam a mangipataddag si torre, ammena kad abbu a mattuttud takesi nonotanna si mapiya nu pigyeno magastuna, anna itanna nu maffustuweno piraknga a mangibalin sitaw? 29 Se nu ammena iyan a akwan anna nu mepataddagngeno fundasyon udde ammena ke mabalin ino torre, kata-katawandana lamang baggina amminan a makaita sitaw. 30 Sapitanda, ‘Pinefunan iyaw a tolay a mangipataddag si torre udde ammena a nabalin.’
31 “Kunnapay sitan se nu ana tata patul a umang a makigiyera so korwan a patul, ammena kad abbu nonotan si mapiya nu si tafulurifu a sundalunera e damana a kapakwan ino korwan a patul a ana adwafulurifu a sundalunera? 32 Nu innanamanna a maaffut ira, aroyu kepay yo kapakwara e umangin a mangidundun si tolenera a manafung so kapakwana takesi arangnganna a makipiya sikwara.”
33 Antu kunna i Jesus, “Awan sikwayu a mattabali si disipuluk nu ammeyu talekkuran ino amminan a ana sikwayu.”
Na Asin a Awan Tantamma
34 Nebalinna i Jesus a nakkun, “Mapiya yo asin, udde nu maawanin ino kinaasinna, kasanna kad kepay a metoliyeno kinaasinna? 35 Awan mapiya a meyaddana iyaw sito lubag onnu maski so pammungan si dakkut na aggayam takesi mattabali si abono, antu metappol na keppay. Seanya sikwayu a maningngag sikwak, nonotanna si mapiya yo sinapitku!”