Na Bafabbay a Nanuffun sike Jesus
8
Akkabalinna iyaw, inang i Jesus a naddoyu-doyug so lubbu-lubbun anna tara-tarabbunan a ibalaggaweno Mapiya a Baga meafu so pattangngalna i Dios so tolenera. Bulunneno tafulu adwa a disipulunera. 2 Bulunda pay yo korwan a bafabbayera a napammapiya si demonyuwera anna naddadaruma a takit ira. I Maria a taga-Magdala yo tata so bafabbayera a nallawanan ino pitu a demonyuwera. 3 Ana pay i Juana a atawa i Cusa a pattalakkan i Herodes si amminan a pakkukwanera, anni Susana pay anna oddu pay a korwan ira. Nangadda si duffun a pirak iyawera a bafabbayera sike Jesus anna so apostolnera a naggabwat so pakkukwara ingkepay.Na Pangarig na Gumappulla
4 Sin nassidaratang ino odduwengke a tolayera a naggabwat so naddadaruma a lubbun, narimummunganda i Jesus e nangarig baggina,
5 “Ana tata tolay a nappulla si trigu anna Sikwana a mappulla-pulla, nadarannag ino korwan a bukal so dalan e napimpinan ino tolayera anna inakkan na pappitut ira so kalawatan. 6 Nadarannag ino korwan a bukal so kabatuwan a kurwa bisang a lubagnga. Sin nattalofuweno mulera, nalelayera gumafu se makurang si danum ino lubag. 7 Nadarannag ino korwan a bukal so maasit a kadda-kaddat anna naggagarindan ira a nattalofu. Ammera nattalofu si mapiya gumafu se nafuwaddan ira so maasit a kadda-kaddat. 8 Nadarannag ino korwan so malabwak a lubag anna dinumokal ino mulera anna kada mula e namunga si tatut a bukal.”
Dengkena a netundu iyaw, kunna si madappa, “Seanya sikwayu a maningngag sikwak, nonotanna si mapiya yo sinapitku.”
Na Kanggamma Sapitan ino Pangarig na Gumappulla
9 Antu naffuut ino disipuluwera i Jesus sikwana nu nenay kanggamma sapitan iyaw a pangarig. 10 Kunna, “Neyaddanan i Dios sikwayuweno pintindi a maammuwan ino kagakkuruwanna meafu so pattangngalna so tolenera a ammena kepay nepakaammu sinoy, udde si korwan nangarigak takesi
‘maski maita-itara, ammera ke kurug a maimunuwan,
maski maddingnga-dingngag ira, ammera ke kurug a maintindiyan.’a”
Na Kanggamma Sapitan ino Pangarig na Gumappulla
11 Antuweyaw yo kanggamma sapitan ino pangarig. Kunna i Jesus, “Na bukal e yo sapit i Dios. 12 Na bukal a nadarannag so dalan e manilla nu maningngag ino tolayera si sapit i Dios e dinumatang i Diyablu a i Satanas anna arinna so nakamdereno sapit ira a nadingngagga takesi ammera mangurug anna matabbut. 13 Na bukal a nadarannag so kabatuwan a dalan e manilla nu maningngag ino tolayera si sapit i Dios anna mangga-anggam ira a nangarasaw sitaw. Manillera mula a ammena naggamut si fustu se yo pangngurugga e ammena nabbayag udde nu dumatang ino paddiriyat si akkatolera, talekkurandeno angngurugga. 14 Na bukal a nadarannag so kaasitan e manilla nu maningngag ino tolayera si sapit i Dios udde dengke appasa na tiyempu, awan mapiya a kebalinan ino sapit i Dios so akkatolera kakunna yo mulera a ammena namunga si nalutu a bunga se naaffut ino nonotda gumafu si pakaburungan na akkatolay, kaodduna wara-wara anna panggamman na talubaggan. 15 Anneno bukal a nadarannag so malabwak a lubag e kakunna nu maningngag yo tolayera si sapit i Dios anna si talakda anna mapiya a nakamda e nangurug ira anna pinasensiyanda a neyakkatolayeno sapitnera a kakunna yo mulera a mamunga si odduwengke.
Na Pangarig na Tata a Allamparan
16 Nebalinna i Jesus a nakkun, “Awan a tolay a massigi si allamparan anna itawuna so buwod onnu iyekwana so gukab na piddan, imbes, itappatna so pangipotunan si allamparan takesi inoyera a umang e anana sirwatda takesi makaitera. 17 Kakunna keppay, a awan a netawu a ammenana melawan, awan a meyimad a ammenana maammuwan.
18 “Antu maningngag kayu si mapiya so sapi-sapitangku, so tolayera a ana pintindira si sapit i Dios e maindannera si mas oddu a pintindi udde so inoyera a awan pintindira maski arigga a maintindiyanda e maawanna keppay sikwara.”
Na Nebilang a Ina anna Wawwayi i Jesus
19 Tata aw, inang i ina i Jesus anna wawwayinera a lallakiyera sikwana udde ammera nakaaranni gumafu so kaoddu yo tolayera. 20 Ana nangitundu sikwana, “Ana so lawan i inam anna wawwayim a lallakiyera anna kanggam daka a makaabid.”
21 Udde kunna sikwara, “I inak anna wawwayik, ira yo maningngag anna makimoray so sapit i Dios.”
Pinasinaknga i Jesus ino Matuyag a Leled
22 Tata aw, nattakay i Jesus si barangay bulunneno disipulunera e kunna sikwara: “Maddammang etam so balanaw.” Inayeno inangwara, 23 e nakaturuwan i Jesus dengkera a maddamma-dammang so balanaw. Nalleled si matuyag so balanaw e napannu si danum ino barangay. Anera si peligru. 24 Inangga ginamya baggina e naggira-girawera, “Afu, Afu, matay etamun!”
Ginumumbwat i Jesus e pinassapitanneno leled anna matuyag a palung ira. Nimemmak ino leled anneno palung e sinuminak ino balanaw. 25 Kunna i Jesus sikwara, “Awan angngurug diyaw!”
Natalawan anna nalaggat ira e kunda si siggatatan, “Yanya kad iyaw a tolay se maski yo leled anneno palung ira e makimoray so sapitanna?”
Pinammapiyana i Jesus ino Lalaki a Naaffunan si Demonyuwera
26 Dinumatang ira so lubbun na Gerasene, so tafik na Galilea. 27 Dengke a ginumaddang i Jesus so barangay, dinumafung sikwaneno tata lalaki so lubbun a naaffunan si demonyuwera. Nabayagin a ammena nabbarasi anna ammena nagyan si balay udde so lungab ira a pattanamman. 28 Sin naitana i Jesus, nallabba baggina so allanganna anna naggirawa si madappa a nakkun, “Jesus, Anak i Dios a Makapangwengke si amminan, nenay yo pakimetem sikwak? Makigumallakak sikwam, ammenaknengke a padiyatan.” 29 Sinapitna iyaw gumafu se tinunanna i Jesus ino demonyu a mallawan so baggiyeno tolay. (Maumid a gaggaddan ino demonyu baggina anna maski nakawaran ino kamat anna takkina, makattangnga keppay yo kawad ira anna mafuwersa baggina a umang so kulolawat.)
30 Finuutna i Jesus sikwana “Nenay ngannu?”
Kunna, “Rinifu,” se oddu a demonyu a tinumallung so baggina. 31 Nakigumallak ino demonyuwera sike Jesus se ammenera a pulin so kaarollamman a abbut a awan pakiyaranna.
32 Ana yo oddu a bafuyera a mangnga-angngan so idag na dangutul. Nakigumallak ino demonyuwera sike Jesus a patallungngannera so bafuyera. Antu neyannutna i Jesus ino inarangga. 33 Nallawan ino demonyuwera so lalaki e tinumallung ira so bafuyera. Kapiyena tinumallung ino demonyuwera so bafuyera, nakkakarantut ino bafuyera so dabbak e nadarannag ira so balanaw e nalimat ira.
34 Sin naiteno gumattaron ira si bafuyera nu nenay yo nedemmu, nakkakarantut ira e netundura so tolayera so lubbun anna so pallebutan na tarabbunan ira nu nenay yo nedemmu. 35 Antu inang initeno tolayera nu nenay yo nedemmu. Sin inang ira sike Jesus, naitareno lalaki a naaffunan si demonyuwera a nakatuttud so dunan na takki i Jesus a nakabarasiyen anna matunungin ino nonotna. Natalawan ino tolayera. 36 Inoyera a nakaita nu nenay yo nedemmu e ira yo nangitundu so korwan ira nu kasanna a napammapiya i Jesus ino naaffunan a lalaki. 37 Antu inarang ino tolayera so Gerasa anna so pallebuttanna sike Jesus se anawannera. Antu nattakay i Jesus anneno disipulunera so barangay e naddammang ira a nuli so balanaw. 38 Nakigumallak yo lalaki a nallawanan ino demonyuwera a mebulun sike Jesus. Udde kinaabidna i Jesus baggina a nakkun, 39 “Mulikan so familyam anna itundum amminan a inangwa i Dios sikwam.”
Nanaweno lalaki e nebalaggona so interu a lubbu-lubbun ino inangwa i Jesus sikwana.
Nantotolayeno Abbing a Bafay anna Nammapiyeno Bafay
40 Sin nuli i Jesus anneno disipulunera so Capernaum, odduwengke a tolayera a mangga-anggam a nangarasaw sikwana se ininda-indagganda baggina.
41 E dinumatang ino tata lalaki a minganan si Jairo, afu-afu na sinagoga. Nallabba baggina so takki i Jesus anna nakigumallak sikwana se umang so balena, 42 se ana mittata anaknga a abbing a bafay a maddawun si tafulu adwa a gammamatayin.
Dengke a nebulun i Jesus sikwana, nassisinnissik ino tolayera sike Jesus. 43 Ana tata bafay so kaodduwan na tolayera a nassalasufri a nappadā si tafulu adwa rawun anna nagastunan amminan a pakkukwanera a pappaga so gumàuruwera udde awan a nakapammapiya sikwana. 44 Inang baggina so likud i Jesus anna sinenggidneno lelay na barasina e siddarat a nimemmak ino paddāna. 45 Naffuut i Jesus, “Yanya yo nanenggid sikwak?”
Sin neyambafagga amminan, kunna i Pedro, “Mestru, napalebutangka si oddu a tolayera anna nassisinnissik ira sikwam.”
46 Udde kunna i Jesus, “Ana nanenggid sikwak anna napammapiya na pakapangwak.”
47 Sin naammuwan ino bafay a ammenan maitawu nu nenay yo nedemmu, inumaranni baggina sike Jesus a mayyayya-yayyak anna nallabba so lubag so allanganna. Sinapitna sikwana so allangan na amminan a tolayera nu saay sinenggidneno barasi i Jesus anna nu kasanna a siddarat a napammapiya baggina.
48 Kunna i Jesus sikwana, “Wayi, yo angngurugnguweno nakapammapiya sikwam. Ammekan maburung se nammapiyakan.”
49 Sikwana kepay a mabi-abid i Jesus, ana tata tolay a naggabwat so balay i Jairo e kunna sikwana, “Natayin ino anakngu, ammemun talantanan i Mestru.”
50 Sin nadingngag iyaw i Jesus, kunna sike Jairo, “Ammeka mattalaw. Mangurugka lamang e mammapiyana baggina.”
51 Sin dinumatang i Jesus so balay, awan ingke pinatallungnga nu bakkan i Pedro, Juan, anni Santiago, anneno gagginafan na abbing. 52 Tinangita-tangitan anna sinamba-sambaluwan amminan ino tolayera na abbing a bafay udde kunna, “Amme kayu mattangit se ammena a natay udde nakaturug lamang baggina.”
53 Kinatawanda i Jesus se ammura a natayeno abbing. 54 Iniggammanneno kamat na abbing e negirawana, “Eteng, gumumbwatka!” 55 Nantotolay baggina e siddarat a ginumumbwat. Antu netun i Jesus sikwara a indanda baggina si maakkan. 56 Nalaggat ino gagginafanna, udde netun i Jesus sikwara se awan nad a pangitunduwanda si maski sanna a tolay nu nenay yo nedemmu.